Ẹbụ-ọma 28 - Ika

Isi Nke Ẹsatọ Kwasị Ọgụn Osolobuẹ Dodo Agbakwọlẹ Nkịtịn!

Ẹbụ Defidi.

¹ Ịyụ kẹ m rị a kpọku, Osolobuẹ; Ọmụma m gi dọn ẹnya! Agbakwọlẹ m nkịtịn. Nị ị gbakwọ m nkịtịn, e sọn m ndị nwụnnị la imẹ ili.

² Nụ ẹkwan m gi a rịọ ị n'i mẹni m omikẹn, a kpọ ị d'e yeni m ẹka, a kịshi ẹka m elu e zinmẹ Ebẹhụ kachanrịn nsọ ị rị.

³ Adọkpụnpụkwọlẹ m kẹ y'e mẹ ndị-njọ, ndị e mẹ eje-ihiẹn — a mụyeni ibe wẹ ẹmụ kanị wẹ bu iwe wẹ obi.

⁴ Kụ wẹ ụgwọ ihiẹn ndị wẹ mẹ lẹ eje-ọrụn wẹ; mẹgwarị wẹ ihiẹn ẹka wẹ mẹ, y'e mẹ wẹ gi isi buru ihiẹn wẹ mẹ.

⁵ Ebe o mẹni onwọnni ihiẹn wẹ kpọ ẹka-ọrụn Osolobuẹ lẹ ihiẹn ẹka a mẹmẹ, o k'e tikpọ wẹ, tikpọchanrịn.

⁶ Ọjịja-mma ya rịnị Osolobuẹ, makẹni ọ nụgụọ ẹkwan m kẹ m rịọ a n'o mẹni m omikẹn.

⁷ Osolobuẹ wụ ikẹn m lẹ akpaịn m; Ịya k'e obi gi e ru m alị, o yeni m ẹka. Obi m hụ a tụshi elu, a ghọghọ, m hụ e gi ẹbụ a kpanmịn a.

⁸ Osolobuẹ wụ ikẹn ndị nke ẹ, Ụlọ-nche hụn a zụọpụha onyẹ hụ o tumẹ.

⁹ Dodo, Zụọpụha ndị nke i, y'a gọzi ukuu i; Du wẹ kẹ anụ ị, pa wẹ jẹnrin ejẹn.