Ẹbụ-ọma 147 - Ika

Isi Nke Ẹsa Kwasị Ọgụn-ẹsa

¹ Ja nị Osolobuẹ mma! Makẹni ọ rịka mma ịbụnị Chuku ẹnyi ẹbụ ịja-mma; ịja Osolobuẹ mma a rịka mma; o furu efuru!

² Osolobuẹ rị a tụndọnzi Jerusalẹm, e wekinhẹn ndị Izrẹlụ ọ chụpụ alị wẹ.

³ Ọ kasị ndị obi rị a gbawa obi, o kẹnmẹ wẹ ebe wẹ rụsọnmẹ ẹhụ.

⁴ Ịya marịn kokisẹ ole rịnị, marịndẹ ẹfan wẹ ile.

⁵ Di-nwọnni-ẹnyi e hikẹ ogbe, ikẹn ẹ e hizikwọ ogbe; nghọta a enwọn okẹn.

⁶ Osolobuẹ e weli ndị welụa enwẹn wẹ alị; kanị o nutu ndị njọ.

⁷ Gi nị ẹbụ kpanmịn Osolobuẹ ẹnyi; gi ni ụbọ bụnị Osolobuẹ ẹbụ ịja-mma.

⁸ O gi orukpu gbama igwere, o mẹ mirin e zueye alị, e mẹ ẹfịfịa e sue elu òke ichẹn-ichẹn.

⁹ O ye anụmanụ ihiẹn-oriri wẹ, e yezikwọ ụmụ-nnụnụ nke wẹ wẹ rịama.

¹⁰ Ihiẹn a sụọ Osolobuẹ ẹlẹ ẹshin-agha nwọn ndụn mọbụ onyẹ nwọn akwanran.

¹¹ Ihiẹn a sụọ Osolobuẹ wụ ndị hụn a tụ egun ẹ, ndị bu obi tụkwasị ihiẹn-ọsụsụọ a.

¹² Jerusalẹm, ja Osolobuẹ mma! Zayọnụ, ja Chuku i mma!

¹³ Makẹni, o fidọnkẹnmẹ ọnụ-mgbọn i; ọ gọzi ndị nke i hụn rị imẹ i.

¹⁴ O mẹ ihiẹn a rịnị alị ụnụ mma, e gi ọka kachanrịn mma e yejun i ẹfọ.

¹⁵ O ku ihiẹn ọ chọ n'o mẹ elu ụwa, ihiẹn o ku e mẹ ozigbo-ozigbo.

¹⁶ O zihẹ mirin oyi ọchan wụ sno hụn a kpụkpụrụnị, ọ nọ kẹ oruru wẹ tanma; o fe imọn e ye ụzọ ile lekẹ ntụn.

¹⁷ Ọ ma ẹkwan-igwere e ye imẹ ụwa nọkẹ mbụrụ. Onyẹ k'a saẹka che oyi hụn o zihẹ?

¹⁸ O kuzi oku, e dẹnhin wẹ, o mẹ ufere femẹ, mirin e huru.

¹⁹ Ọ gwagụọ ụmụ Jekọpụ ihiẹn ọ chọ n'o ku; o butọgụọnị Izrẹlụ ọdịnalị a lẹ uhi ẹ.

²⁰ Onwọnni alị ọzọ o mẹni ihiẹnni; amarịn wẹ uhi ẹ. Ja nị Osolobuẹ mma!