Ẹbụ-ọma 146 - Ika

Isi Nke Isin Kwasị Ọgụn-ẹsa Onwọnni Onyẹ Osolobuẹ A Zọ

¹ Ja nị Osolobuẹ mma! Obi m, ja Osolobuẹ mma!

² M k'a ja Osolobuẹ mma e we m nwụn; m k'e gi ẹbụ ja Osolobuẹ m mma e we nwụn.

³ Egikwọlẹ okẹn-ịhịan dọn ẹnya; egilẹ ịhịan mmaka ghalẹni a saẹka a zụọpụha dọn ẹnya.

⁴ Makẹni, mmọn ịhịan pụhụ, ịhịan e họnrinzi ẹjan, ihiẹn ile o romẹ a la iwi.

⁵ Onyẹ Chuku Jekọpụ e yeni ẹka e nwọnkẹ ngọzi, onyẹ bu obi tụkwasị Osolobuẹ wụ Chuku ẹ,

⁶ Onyẹ hụn ke elu-igwee lẹ ụwa lẹ ohimin lẹ ihiẹn ile rị imẹ wẹ, Osolobuẹ hụn e mẹsọnmẹ hụn run'ẹ jẹnrin ejẹn.

⁷ O kuni ndị wẹ rị a bịangbu ọnụ wẹ, e ye ndị ẹgụn rị a gụn ihiẹn-oriri. Osolobuẹ e wepụha ndị rị ngan;

⁸ Osolobuẹ a shịapụ ẹnya ndị ishi. Osolobuẹ e weli ndị rị imẹ nsọngbu; ihiẹn ndị rị ọchan a sụọ Osolobuẹ a ụsụọ.

⁹ Osolobuẹ e che abịamabịa nche, o yeni ndị nwọnlẹni nẹdi lẹ ikpoho di wẹ nwụn ẹka; kanị, o mẹ ndị-ejẹ uke.

¹⁰ Osolobuẹ k'a kị jẹnrin-ejẹn! Zayọnụ, Chuku i k'a kịsọnmẹ gha agbọ pụ agbọ! Ja nị Osolobuẹ mma!