Ẹbụ-ọma 121 - Ika

Isi Nke Ohu Kwasị Ọgụn-isin Osolobuẹ Wụ Onyẹ Hụn E Yeni Ẹnyi Ẹka

Ẹbụ Wẹ Gi E Jẹn Ụlọ-nsọ.

¹ E lehunmẹ m ugu ndịnị: elebe kẹ m'a nọ hụn eyemẹka?

² Ẹka Osolobuẹ kẹ m'a nọ hụn eyemẹka, Osolobuẹ hụn ke elu-igwee lẹ ụwa.

³ Ọ nịkọ ụkụ ị kpori; onyẹ-nche i eruekọ ụran.

⁴ Ẹghẹẹ, Onyẹ-nche Izrẹlụ eruekọ ụran mọbụ ranhịn ụran.

⁵ Osolobuẹ wụ onyẹ-nche i; Osolobuẹ rị ị ẹka-nni e kpumẹ i kẹ igungun dọn e kpumẹ ịhịan:

⁶ anwụn arụkọ ị ẹhụ efinaị; ifọn arụkọ ị ẹhụ imẹ uhinhin.

⁷ Osolobuẹ k'e che i nche makẹ eje-ihiẹn ọwụlẹ gha e ru i ẹhụ; o k'e che ndụn ị nche.

⁸ O k'e che i nche ị pụkọnị lẹ ị banlanị, che i nche kikẹnni, che i jẹnrin ejẹn.