Ẹbụ-ọma 116 - Ika

Isi Nke Mmisin Kwasị Ọgụn-isẹn Okele Onyẹ Wanahịn Ọnwụn

¹ Ihiẹn Osolobuẹ a sụọka m makẹni ọ nụ olu m lẹ arịrịọ m.

² Makẹni o gọngụọ m ntịn, m k'a gha a kpọku ẹ, e we m nwụn!

³ Ọnwụn te kụhunmẹ m, egun ili a tụgbu m; okẹn nsọngbu lẹ ụya kẹ m te rị imẹ ẹ.

⁴ Ya kẹ m nọ hị ẹfan Osolobuẹ, sị, “Euu Osolobuẹ, dodo, zụọpụha m!”

⁵ Osolobuẹ e mẹyeni ịhịan, e mẹ ihiẹn furuni; Chuku ẹnyi wụ onyẹ omikẹn.

⁶ Osolobuẹ e che onyẹ nwọnlẹni ihiẹn ọ marịn nche; ogẹn m gi rị imẹ nsọngbu, ịya zụọpụha m.

⁷ Obi m, zumẹzi nwan ikẹn, nị Osolobuẹ e mẹkẹmẹkẹni m.

⁸ Makẹni y'a zụọpụhagụọ m ẹka ọnwụn, Osolobuẹ; y'e finchanpụgụọ m ẹnya-mirin; y'a nịnị m kpọgburu.

⁹ M hụkwọ ndụn elu ụwanị, a ghahunmẹ ihun Osolobuẹ.

¹⁰ Okukwe kẹ m gi sị ị, “E gweriẹn wẹ m!”

¹¹ Ebe egun rị a tụ m, m te nọ sị, “Onyẹ ezioku arịzị a.”

¹² Kị m'e gi kụ Osolobuẹ ụgwọ ihiẹn-ọmanị ile o mẹni m?

¹³ M k'e weshi mkpu elu liyeni Osolobuẹ makẹni ọ zụọpụha m, m k'a ja ẹfan Osolobuẹ mma.

¹⁴ A nọ m idẹnya ndị nke Osolobuẹ ile mẹzu nkwa m kwe ẹ.

¹⁵ Ọnwụn ndị e mẹ uche Osolobuẹ wụ okẹn ihiẹn ẹnya Osolobuẹ!

¹⁶ Dodo Osolobuẹ, nị odibo i kẹ m wụ; m wụ odibo ị, nwa odibo i okpoho. Y'a tọpụgụọ m ẹgbụn.

¹⁷ M k'a chụnyen'i ẹjan-ekele, kpọ ẹfan Osolobuẹ.

¹⁸ M k'e mẹzu nkwa m kwe Osolobuẹ, mẹ ẹ idẹnya ndị nke ẹ ile;

¹⁹ imẹ ezi-ọgwa Ụlọ Osolobuẹ daị, imẹ i, Jerusalẹm. Ja nị Osolobuẹ mma!