Ẹbụ-ọma 115 - Ika

Isi Nke Mmisẹn Kwasị Ọgụn-isẹn Osolobuẹ Sụọ Wụ Chuku Nke-esi

¹ Ẹlẹ ẹnyi, Osolobuẹ, ẹlẹ ẹnyi kẹ w'e ye ọghọ, kama wẹ ye ẹfan ị ọghọ, makẹ ihiẹn-ọsụsụọ ị lẹ ezioku i!

² Kịnị kẹ ndị alị ọzọ k'a jụma, “Elebe Chuku wẹ rị nwan?”

³ Bụ Chuku ẹnyi rị elu-igwee, e mẹ ihiẹn ọ chọ n'o mẹ.

⁴ Kanị mmọn wẹ wụsọnmẹ siliva lẹ goru mmakalaka, ọrụn-ẹka ịhịan mmaka.

⁵ Wẹ nwọn ọnụ, bụ w'ara ku oku; wẹ nwọn ẹnya, bụ w'ara legha ụzọ.

⁶ Wẹ nwọn ntịn, bụ w'a ra nụ ihiẹn; wẹ nwọn imi, bụ w'a ra nụ ishin.

⁷ Wẹ nwọn ẹka, bụ amarịn wẹ ihiẹn nụ ọkụn lẹ ihiẹn jụ oyi; wẹ nwọn ụkụ bụ w'ara jẹn ijẹn: wẹ nwọn ẹkpịrị, bụ w'a ra nụ olu wẹ!

⁸ Ndị ile a kpụnị wẹ jẹnkọ d'a rị kẹ wẹ, ndị ile gi wẹ e dọn ẹnya!

⁹ Ndị Izrẹlụ, gi ni Osolobuẹ dọn ẹnya! Ịya e yeni Izrẹlụ ẹka; ịya wụ akpaịn e che Izrẹlụ nche.

¹⁰ Ebọn Ẹrọnụ, ndị nchụn-ẹjan, gi ni Osolobuẹ dọn ẹnya. Ịya e yeni ụnụ ẹka; ịya e che ụnụ nche.

¹¹ Ụnụ ndị a tụ egun Osolobuẹ, gi ni Osolobuẹ dọn ẹnya! Ịya e yeni ụnụ ẹka; ịya e che ụnụ nche.

¹² Osolobuẹ a nyanhangụọ ẹnyi kẹni ọ gọzi ẹnyi; o k'a gọzi ndị Izrẹlụ ile; o k'a gọzi ndị ebọn Ẹrọnụ, ndị nchụn-ẹjan;

¹³ o k'a gọzi ndị ile a tụ egun Osolobuẹ: kẹ onyẹ uku kẹ onyẹ nta!

¹⁴ Osolobuẹ ya dodo mẹ ụnụ ba ụba: kẹ ụnụ kẹ ụmụ ụnụ!

¹⁵ Osolobuẹ ya dodo gọzi ụnụ, Osolobuẹ hụn ke elu-igwee lẹ ụwa!

¹⁶ Elu-igwee wụ nke Osolobuẹ; kanị, o wegụọ elu-ụwa ye ịhịan.

¹⁷ Ẹlẹ ndị nwụnnị a ja Osolobuẹ mma, ẹlẹ ndị hụn kpọtugụ shi ebẹhụ wẹ nọ a gbachanrịn nkịtịn;

¹⁸ ẹnyi rọ; ẹnyi jẹnkọ d'a ja Osolobuẹ mma, gha ogẹnni jẹnmẹ, ja a jẹnrin ejẹn. Ja nị Osolobuẹ mma!