Ẹbụ-ọma 111 - Ika

Isi Nke Mmanaị Kwasị Ọgụn-isẹn Chuku Furu W'a Ja Mma

¹ Ja nị Osolobuẹ mma! M k'e gi obi m ile kpanmịn Osolobuẹ imẹ igunrun ndị kụrụ ọtọ lẹ imẹ ozuzu ndị nke ẹ.

² Ihiẹn Osolobuẹ rụn e hikẹ ogbe! Ndị ile ọrụn-ẹka a a sụọ a lịlịma nị wẹ ghọta wẹ.

³ Ihiẹn ile o mẹ nwọn mgbaye lẹ ọghọ; o mẹsọnmẹ ihiẹn furuni jẹnrin ejẹn.

⁴ O mẹgụọ ihiẹn wẹ gi a nyanhan ọrụn-atụmẹnya ndị ọ rụn; Osolobuẹ wụ onyẹ ẹfọma lẹ onyẹ-omikẹn!

⁵ O ye ndị a gbayen'ẹ ihiẹn-oriri; ara zọ nkwa o kwe.

⁶ Ọ ghọsịgụọ ndị nkẹ ẹ ikẹn ẹ ebe ọ nọ we alị ndị ọzọ ye wẹ.

⁷ Ezioku lẹ ẹka ri mma k'o gi e mẹ ihiẹn ẹ ile; iwu ẹ ile furu wẹ gi e dọn ẹnya:

⁸ wẹ turu jẹnrin ejẹn; wẹ dọnmẹsọnmẹ wẹ ogẹn ile, obi kụrụ ọtọ kẹ wẹ gi e dọnmẹ wẹ.

⁹ Ịya zụọpụha ndị nke ẹ; o mẹsọnmẹ ihiẹn o kwe nkwa a jẹnrin ejẹn! Ẹfan a wụ ẹfan rị nsọ w'a tụ egun ẹ!

¹⁰ Ịtụ egun Osolobuẹ wụ mbidọn amamihiẹn; ndị gi ẹ e bi e nwọnrin ezigbo nghọta. Ịja-mma k'a rịnị Osolobuẹ jẹnrin ejẹn.