Ẹbụ-ọma 106 - Ika

Isi Nke Isin Kwasị Ọgụn-isẹn Osolobuẹ E Mẹkẹni Ndị Nke Ẹ

¹ Ja nị Osolobuẹ mma! Kpanmịn nị Osolobuẹ, makẹni ọ rịka mma; ihiẹn-ọsụsụọ a rị jẹnrin ejẹn!

² Onyẹ k'a s'ẹka kugụ okẹn-ihiẹn ile Osolobuẹ mẹ? Onyẹ k'a s'ẹka kuchanrịn ihiẹn ile w'e gi ja a mma?!

³ Ngọzi wụ nke ndị ghalẹni e mẹgbu ịhịan, ndị e mẹsọnmẹ ihiẹn furuni.

⁴ Osolobuẹ, dodo nyanhan m ị gha e mẹni ndị nke i ọhụnma, dodo zụọpụha m ị gha a zụọpụha ndị nke i;

⁵ kẹni m hụn ebe ihiẹn nọ rịzịnị ndị ị họrị mma; kẹni m sọn ndị alị ị ghọghọ; kẹni m sọn ndị nke i nyan isi.

⁶ Ẹnyi lẹ ndị nẹdi ẹnyi wẹ e mẹgụọ njọ; ẹnyi e mẹgụọ ihiẹn rịlẹni mma; ẹnyi e mẹgụọ eje-ihiẹn.

⁷ Ndị nẹdi ẹnyi wẹ aghọtanị ọrụn-atụmẹnya ị kẹ wẹ rị Ijiptu; anyanhannị wẹ okẹn ihiẹn-ọsụsụọ i gi sọn wẹ, wẹ nọ nupụ isi okpuru i mkpẹnrẹn Ohimin hụ, mkpẹnrẹn Ohimin Ufie, nupụ isi okpuru Onyẹ hụn Kachanrịnnị.

⁸ Kanị ọ nọ gi ufiri ẹfan a zụọpụhakwọ wẹ, kẹni ọ ghọsị ikẹn ẹ:

⁹ ọ jụgbọ Ohimin Ufie, ọ tahị; o we wẹ fetu akpakalị Ohimin ahụn nọkẹ sị alị-ọkpọnkụn rị imẹ atụ rọ.

¹⁰ Ọ zụọpụha wẹ ẹka ndị rị e we iwe wẹ; ọ gbapụha wẹ ẹka eṅẹnrẹn.

¹¹ Mirin ahụn e rukpumẹ ndị-iṅẹnrẹn wẹ, akpụ onyẹ ohu ahọdụnị.

¹² Ndị nke ẹ nọ gi oku ẹ dọn, wẹ nọ bụn'a ẹbụ ọjịja-mma.

¹³ Kanị, a zọ wẹ ihiẹn o mẹ ozigbo; echerikọ wẹ nụ uche ẹ.

¹⁴ Ihiẹn-oriri nọ lagbu wẹ ẹnya imẹ atụ ahụn, wẹ nọ chọma ihiẹn rị Osolobuẹ ọnụ.

¹⁵ Ọ nọ ye wẹ ihiẹn ahụn wẹ chọ, kanị ọ tụ wẹ eje-emu e fie ịhịan ẹhụ.

¹⁶ Ọ hụ a fụ wẹ imẹ atụ ebẹhụ nị Mozizi lẹ onyẹ ahụn Osolobuẹ dọn nsọ wụ Ẹrọnụ rị a kị.

¹⁷ Alị nọ kpupụ, bu Datanị lue, o kpumẹ wẹ ile wẹ lẹ Abiram wị;

¹⁸ ọkụn e benwunrun imẹ wẹ, ọkụn a dụngbu ndị-njọ ahụn.

¹⁹ E ru wẹ ugu Horẹbụ, ndị Izrẹlụ a kpụrụ nwa-efin; e femẹ wẹ mmọn hụ wẹ kpụ.

²⁰ E gi wẹ okẹn-efin e ri ẹfịfịa hụn wẹ kpụ nọkin ẹnya Osolobuẹ hụn wụ Ọghọ wẹ.

²¹ A zọ wẹ Chuku hụn a zụọpụhanị wẹ, onyẹ hụn mẹsọnmẹ okẹn ihiẹn imẹ alị Ijiptu;

²² onyẹ hụn rụn ọrụn-atụmẹnya ndị hụ imẹ alị ụmụ Ham hụ, rụn ihiẹn ndị hụ a tụ egun imẹ Ohimin Ufie!

²³ Ya kẹ Osolobuẹ nọ sị n'o tikpọ wẹ; omẹni ẹlẹ hụn onyẹ ahụn ọ họrị wụ Mozizi wuzo ẹgbata ya lẹ uwẹ, rịọma a, amamgbe o gi olulu tikpọ wẹ, nkẹ o tikpọ wẹ.

²⁴ Wẹ nọzị legberi alị ọma hụ Osolobuẹ wejẹnkọ wẹ, egini wẹ nkwa a dọn.

²⁵ A nọ wẹ ọdụ wẹ dẹnnwịnwịnma, jụ nị emẹkọ wẹ ihiẹn Osolobuẹ ku.

²⁶ Ya kẹ Osolobuẹ nọ kishi ẹka elu, kun enwẹn ẹ, sị o k'e mẹ wẹ nwụntọsọnmẹ imẹ atụ ahụn,

²⁷ n'o k'e mẹ ụmụ wẹ nwụntọsọnmẹ alị ichẹn-ichẹn, feyịya ụmụ wẹ alị ndị ọzọ.

²⁸ E wezighọ wẹ enwẹn wẹ kwanị mmọn wụ Baalụ alị Pioru, rimẹ anụ wẹ gi chụnyeni ndị-mmọn ẹjan.

²⁹ Wẹ nọ gi ihiẹn ndị hụ wẹ rị e mẹ kpasu Osolobuẹ iwe, ọnwụn nọ gbumẹ wẹ.

³⁰ Kanị Finẹhasị nọ lihi, mẹ ihiẹn olulu Osolobuẹ gi rọ, ọnwụn nọ gbubehi wẹ.

³¹ Ya kẹ Finẹhasị gi wụrụ onyẹ ezi-omumẹ ẹnya Osolobuẹ, gha agbọ pụ agbọ, jẹnrin ejẹn.

³² Wẹ nọzị gi oku mirin kpasu Osolobuẹ iwe imẹ Mẹriba, oku wẹ nọ sehẹni Mozizi eje-ihiẹn,

³³ makẹni isi wẹ nnupụ fụru ẹ akpobi, ọ nọ kufie oku.

³⁴ Egbuchanrịnnị wẹ ndị alị ichẹn-ichẹn kẹ Osolobuẹ dọn gwa wẹ.

³⁵ Kama, e sọn wẹ alị ndị ahụn e mẹgbama, mụnarịn wẹ ihiẹn wẹ e mẹ.

³⁶ E femẹ wẹ mmọn alị ndị ahụn, gi ẹ dan ọnyan.

³⁷ E gi wẹ ụmụ wẹ ikẹnnyẹ lẹ ikpoho chụnmanị eje-mmọn ẹjan,

³⁸ gbumẹ ụmụ wẹ ikẹnnyẹ lẹ ikpoho nwọnlẹni ihiẹn wẹ mẹ, e gi wẹ a chụnyeni mmọn ẹjan mmọn ndị rị alị Kenaanị; ẹdeke ndị ahụn ile wẹ gbu nọ mẹrụ alị.

³⁹ E mẹrụchanrịn wẹ enwẹn wẹ yeni ihiẹn ndị hụ wẹ rị e mẹ, gi ẹ họnrin ịgbaraja ẹnya Osolobuẹ.

⁴⁰ Ya kẹ Osolobuẹ nọ gi olulu sọn ndị nke ẹ, ize ndị nke ẹ nọ zemẹ ẹ;

⁴¹ o bu wẹ che ẹka alị ndị ọzọ, ndị rị e we iwe wẹ nọ kịma wẹ.

⁴² Ndị-iṅẹnrẹn wẹ nọ kịgbumẹ wẹ, bu wẹ che okpuru.

⁴³ Imẹrinmẹ ogẹn kẹ Osolobuẹ gbapụha wẹ, kanị a tọ wẹ e nupụ isi ebe wẹ rị e ro nke wẹ, d'e ru ni njọ wẹ e budan wẹ.

⁴⁴ Kanị, ọ tọ a tụnị wẹ ụya ogẹn nsọngbu, ọ nụ arịrịọ wẹ.

⁴⁵ O gi ufiri wẹ a nyanhan nkwa a, e mẹni wẹ omikẹn, yeni okẹn ihiẹn-ọsụsụọ a.

⁴⁶ Ọ nị omikẹn wẹ e mẹ ndị ile gini wẹ.

⁴⁷ Osolobuẹ Chuku ẹnyi, dodo zụọpụha ẹnyi dodo wepụha ẹnyi alị ndị gisọnmẹni ẹnyi, kẹni ẹnyi kpanmịn ẹfan nsọ ị, a ja ị mma, e gi ẹ a dụ ẹka obi.

⁴⁸ Ịja-mma ya rịnị Osolobuẹ wụ Chuku Izrẹlụ ya rịn'a jẹnrin ejẹn, jẹnrin ejẹn! Ịhịan ile wẹ sị, “Isẹẹ!” Ja nị Osolobuẹ mma!