Ditrọnọmi 4 - Ika

Isi Nke Ẹnọ Mozizi A Gwa Ndị Izrẹlụ Gbaye Osolobuẹ

¹ Ndị Izrẹlụ-e, nụkwọ nị nwan uhi lẹ iwu ndị m sikọ nwan d'e ye ụnụ. E mẹ ni wẹ kẹni ụnụ rị ndụn, banye d'e weri alị ahụn Osolobuẹ wụ Chuku ndị nẹdi ụnụ rị e ye ụnụ.

² Ewechelẹ ni oku ndịnị m rị a gwa ụnụ mọbụ webelụa ihiẹn Osolobuẹ wụ Chuku ụnụ ku hụn m rị a gwa ụnụ.

³ Ụnụ e gighọ ẹnya ụnụ hụn ẹka Osolobuẹ gi sọn oku mmọn Baalụ alị Pioru ụfọdụ jẹn d'a rụa, kẹ Osolobuẹ wụ Chuku ụnụ dọn gbuchanrịn ndị ile rị imẹ igunrun ụnụ hụn rụa Baalụ alị Pioru,

⁴ kanị ụnụ ile ndị hụn kwọnkẹnmẹ Osolobuẹ wụ Chuku ụnụ hụkwọ nwan ndụn d'e ru tannị.

⁵ Lee n'ẹ: e yigụọnị m ụnụ uhi, ye ụnụ iwu kẹ Osolobuẹ wụ Chuku m dọn gwa m, kẹni ụnụ hụn ụzọ e mẹ wẹ imẹ alị ahụn ụnụ sikọ nwan d'a banye, bikin.

⁶ Hụn n'a nị ụnụ e mẹ wẹ, makẹni ọhụn k'a ghọsị ndị alị ọzọ rị ichẹn-ichẹn nị ụnụ marịn ihiẹn, nwọn uche. Wẹ nụ iwu ndịnị wẹ, e yi wẹ, “Eziẹ ndị okẹn alịnị marịnkwọ ihiẹn-o; wẹ nwọnkwọ uche-o!”

⁷ Elee alị wụ okẹn alị ẹnịna? Alị hụn mmọn wẹ a nọkunmẹ wẹ ụdị hụn Osolobuẹ wụ Chuku ẹnyi a nọkunmẹ ẹnyi ogẹn ọwụlẹ ẹnyi kpọ a?

⁸ Elee alị ọzọ wụ okẹn alị ẹnịna? Alị hụn nwọn uhi lẹ iwu rị mma kẹ iwu ndịnị ile m rị e ye ụnụ tannị?

⁹ Ka we ni ẹnya ru alị! Kpachanpụ ẹnya: hụn a nị y'a zọnị ihiẹn ndị ahụn ẹnya ị hụn mọbụ nị wẹ gha ị obi pụ y'e we bigụ. Kuzi ụmụ ị lẹ ụmụ-oyẹ i ya.

¹⁰ Nyanhan nị ụhụọhịn ahụn ụnụ wuzo ihun Osolobuẹ wụ Chuku ụnụ ẹhụ Ugu Horẹbụ, ogẹn ahụn o gi sị m, “Kpọkikomẹ ndị Izrẹlụ ihun m ebeni, nị wẹ nụ ihiẹn m k'e ku, mụ kẹ wẹ dọn a gbaye m e we wẹ bigụ alị ahụn, lẹni wẹ kuzi ụmụ wẹ ya.”

¹¹ Ụnụ nọ nọzụnhan, wuzo ukun ugu ahụn — ugu ahụn hụ e nwun ọkụn hụn rudẹ igwere, orukpu ogi lẹ ẹkpa-ishi e jun ẹ.

¹² Osolobuẹ nọ gha imẹ ọkụn ahụn gwa ụnụ oku. Olu ẹ kẹ ụnụ nụ, onwọnni ihiẹn ọwụlẹ ụnụ hụn ụnụ e gi sị “Lee kẹ Osolobuẹ nọ.” Olu sụọ kẹ ụnụ nụ.

¹³ Ọ nọ gwa ụnụ ihiẹn ọ chọ ẹka ụnụ, Iwu iri ahụn, hụn ọ gwa ụnụ e dọnmẹ; ọ nọzị de wẹ ye ibe ọmụma ẹbụọ.

¹⁴ Ogẹn hụ, Osolobuẹ nọ sị m kuzi ụnụ uhi lẹ iwu ndị ụnụ k'e gi e bi imẹ alị ahụn ụnụ jẹnkọ nwan d'e fetu Iyi Jọdanị weri.

Mozizi Sị Wẹ Arụalẹ Mmọn

¹⁵ Ụhụọhịn ahụn Osolobuẹ gha imẹ ọkụn rị elu Ugu-Saịnaị wụ Horẹbụ gwa ụnụ oku: onwọnni ihiẹn ụnụ hụn ụnụ e gi sị, “Lee kẹ Osolobuẹ nọ”. Ya wụ, kpachanpụ nị nwan ẹnya ọhụnma-ọhụnma,

¹⁶ amamgbe ụnụ a rụ, kpụrụma mmọn ọwụlẹ w'a kpụ — kẹ hụn yi okẹnnyẹ, kẹ hụn yi okpoho;

¹⁷ kẹ hụn yi anụ a kpa alị, kẹ hụn yi nnụnụ e fe imẹ elu;

¹⁸ kẹ hụn yi ihiẹn a rịnị, kẹ hụn yi azụn rị imẹ mirin; akpụrụlẹni hụn ọwụlẹ.

¹⁹ Ụnụ lekwọ ẹnya elu-igwere, hụn ẹnyanwụn lẹ ifọn lẹ kokisẹ, ihiẹn ile rị igwere, anịkwọlẹni wẹ chanban ụnụ ẹnya, ụnụ a kpọma nị wẹ isi alị, femẹ ihiẹn-okike mmaka ndị ahụn Osolobuẹ wụ Chuku ụnụ ketọnị ụwa ile.

²⁰ Ka nyanhan nị nị Osolobuẹ gha alị Ijiptu, okẹn ọkụn ọkpụ-ụzụn hụ, wepụha ụnụ, nị ụnụ wụrụ ndị nke ẹ, kẹ ụnụ dọn nwan wụ.

²¹ Kanị, Osolobuẹ gi ufiri ụnụ busọn m olulu, ọ nọ kun enwẹn ẹ nị efetukọ m Iyi Jọdanị banye alị hụ rị mma hụn Osolobuẹ wụ Chuku ụnụ rị e ye ụnụ n'ọ wụrụ ukuu ụnụ.

²² Ya wụ, m sikọ d'a nwụntọ alịnị; efetukọ m Iyi Jọdanị; kanị, ụnụ nwẹn sikọ d'e fetu nwan d'e weri alị ahụn rị mma.

²³ Wekwọ nị ẹnya ru alị makẹ ụnụ gha a zọ Iwu Osolobuẹ wụ Chuku ụnụ gi kwọngbama ụnụ lẹ ịya; akpụrụkwọlẹ ni ihiẹn ọwụlẹ femẹ — makẹni Osolobuẹ wụ Chuku ụnụ a gwagụọ ụnụ emẹlẹ ẹ.

²⁴ Makẹni, Osolobuẹ wụ Chuku ụnụ wụkwọ ọkụn e bu ihiẹn e ri, Chuku ghalẹni e gi ẹnya a hụn kẹ ihiẹn ọzọ weri ọnọdị a k'ọ wụ.

²⁵ Ụnụ bibiegụ alị ahụn, mụgụ isi-nwa, mụgụdẹ ụmụ-oyẹ, nị ụnụ a rụ, kpụrụma mmọn yi ihiẹn ọwụlẹ, mẹmẹ ihiẹn rịlẹni mma ẹnya Osolobuẹ wụ Chuku ụnụ, gi ẹ kpasumẹ ẹ iwe,

²⁶ m rị nwan a kpọ elu-igwee lẹ ụwa nị wẹ shịagbu ụnụ ẹri tannị, nị ụnụ mẹ ẹ, wẹ k'e kpọnchanpụkẹnrin ụnụ alị ahụn ụnụ fetukọ Iyi Jọdanị d'e weri. Ụnụ ebibiekọ ebahụn kaka; wẹ k'e gbuchanrịn ụnụ kọkọrọkọ.

²⁷ Osolobuẹ k'e feyịya ụnụ ye alị ndị ọzọ rị ichẹn-ichẹn; ndị k'a hụn isi pụha imẹ alị ndị ahụn Osolobuẹ k'a chụyesọnmẹ ụnụ ebukọ ọda.

²⁸ Ụnụ k'a nọ ebẹhụ fe mmọn wẹ gi osisi pịn lẹ ndị wẹ gi ọmụma tụ, mmọn ndị ghalẹni a s'ẹka e legha ụzọ mọbụ a nụ ihiẹn mọbụ e ri ihiẹn-oriri mọbụ a nụ ishin.

²⁹ Kanị, ụnụ nọ ebẹhụ chọ Osolobuẹ wụ Chuku ụnụ, ụnụ sikọ d'a hụn a, omẹni ụnụ e gighọ obi ụnụ ile lẹ umẹ-ndụn ụnụ ile chọ a.

³⁰ Ẹghẹẹ, ụnụ hụngụ ụya ndịnị ile ogẹn hụ, rogharị buru Osolobuẹ wụ Chuku ụnụ, mẹ ihiẹn o ku,

³¹ makẹni Osolobuẹ wụ Chuku ụnụ wụ Chuku omikẹn, ọ jụtọkọ ụnụ mọbụ gbupụ ụnụ mọbụ zọ nkwerigbama rị ẹgbata ịya lẹ ndị nẹdi ụnụ, hụn o gi ufiri ẹ kunni wẹ enwẹn ẹ.

Osolobuẹ Sụọ Wụ Chuku

³² Jụkwọ nị wẹ ihiẹn mẹ mbụ-mbụ nị wẹ d'a mụ ụnụ, gha ụhụọhịn hụ Osolobuẹ ke ịhịan elu-ụwa; jẹndẹ ni ebe ile ụwa ru d'a jụ kẹ okẹn ihiẹn nọ ẹnịna e mẹtughọ ra a nụtughọdẹ wẹ ihiẹn nọ ẹnịna?

³³ O nwọntughọ alị ọwụlẹ nụ olu Osolobuẹ ebe ọ n'a gha imẹ ọkụn a gwa wẹ oku k'o dọn gha imẹ ọkụn gwa ụnụ, a nụgụ w'a rị ndụn kẹ ụnụ dọn nwan rị ndụn?

³⁴ O nwọntughọ mmọn ọwụlẹ nwantu n'ọ gha imẹ alị ọzọ wepụhanị enwẹn ẹ ndị alị ọzọ rị alị hụ ghahanị afụnfụn o gi lele wẹ, ihiẹn-nghọsị, ahụnlele, agha, ikẹn hi-ogbe, ịkpa-ikẹn lẹ ọrụn ndị a tụ egun — nọkẹ ndị ahụn ile Osolobuẹ wụ Chuku ụnụ mẹsọnmẹ imẹ alị Ijiptu idẹnya ụnụ?

³⁵ Ọ ghọsị ụnụ ihiẹn ndịnị kẹni ụnụ marịn nị Osolobuẹ wụ Chuku, wezụka a, ọzọ arịzị a.

³⁶ Ọ gha elu-igwee mẹ ụnụ nụ olu ẹ n'o gi ẹ kuzi ụnụ, ọ nọ nọ elu-ụwa ebeni ghọsị ụnụ okẹn ọkụn a, ụnụ a nụ k'ọ gha imẹ ọkụn hụ gwa ụnụ oku.

³⁷ Ufiri ni o nwọn ihiẹn-ọsụsụọ ndị nẹdi ụnụ kanị, ọ nọ họrị ụnụ ụmụ wẹ, gi ịnọyeni ụnụ lẹ okẹn-ikẹn ọ kpa gha alị Ijiptu wepụha ụnụ,

³⁸ kẹni ụnụ d'a napụsọnmẹ alị ndị ọzọ alị wẹ, alị ndị ka ụnụ ọda, ka ụnụ ikẹn, lẹni o wẹhẹ ụnụ alị wẹ, we ẹ ye ụnụ k'o dọn nwan rị tannị.

³⁹ Marịn nị nwan, ụnụ e gi ẹ dọn, nị Osolobuẹ wụ Chuku, kẹ imẹ elu-igwee kẹ elu-ụwa. Osolobuẹ ọzọ arịzị a!

⁴⁰ Dọnmẹ ni uhi ẹ, e mẹ ihiẹn ọ sị ụnụ mẹ hụn m rị a gwa ụnụ tannị, n'ọ hụn ụzọ rịnị ụnụ lẹ ụmụ ụnụ lalanị mma lẹni ụnụ hụn ụzọ tọ imẹ alị ahụn Osolobuẹ wụ Chuku ụnụ rị e ye ụnụ nị ụnụ weriferi.

Obodo Onyẹ kpachanpụlẹni Ẹnya Gbu Ịhịan A Gbashi

⁴¹ Ya Mozizi nọ họtọ obodo ẹtọ ẹbamịn ọwụwa ẹnyanwụn Iyi Jọdanị,

⁴² hụn onyẹ gbu ịhịan k'a gbashi omẹni ọ kpachanpụnị ẹnya gbu ẹ, o rotọn'a. O nwọn ikẹn gbashi obodo ohu imẹ wẹ ẹtịtọ gi ghe isi ẹ.

⁴³ Obodo ndị ahụn wụ: Bẹza hụn rị alị-aradan rị elu-ugu imẹ atụ hụn o wepụhanị ndị ebọn Rubẹni; Ramọtụ rị Gilẹdị hụn o wepụhanị ndị ebọn Gadị; Golanị rị Bashanị hụn o wepụhanị ndị ebọn Manasẹ.

Oku Iwu E D'e Bidọn

⁴⁴ Hụnnị wụ Iwu Mozizi butọnị ndị Izrẹlụ:

⁴⁵ ndịnị wụ usọnrọn lẹ uhi lẹ iwu ndị ahụn Mozizi ye wẹ ogẹn wẹ gi gha Ijiptu pụha,

⁴⁶ ogẹn ahụn wẹ gi rị ọdanmgbugbu rị ẹhụ Bẹt-Pioru. Ẹbamịn ọwụwa-ẹnyanwụn Iyi Jọdanị kẹ Bẹt-Pioru rị, alị Sihọnụ eze Amọ nọ Hẹsh'bọnụ kị. Mozizi lẹ ndị Izrẹlụ mẹri Sihọnụ ogẹn wẹ gi gha Ijiptu pụha;

⁴⁷ e weri wẹ alị a lẹ alị Ọgụ eze Bashanị. Ndị-nze ẹbụbụọnị te kị ndị Amọ ẹbamịn ọwụwa ẹnyanwụn Iyi Jọdanị.

⁴⁸ Alịnị wẹ weri gha Arụa hụn rị mkpẹnrẹn ọdanmgbugbu Iyi Anọnụ d'e rukwọrị Ugu Siyọnụ (hụn wụ Ugu Hẹmọnụ);

⁴⁹ atụ Araba ile rị ẹbamịn ọwụwa-ẹnyanwụn Iyi Jọdanị rịzị imẹ ẹ d'e rukwọrị Ohimin Nnu Araba hụn wụ Ohimin Nwụnnị, ukun ugu Pisga.