Ditrọnọmi 15 - IkaIsi Nke Mmisẹn Ahụa Wẹ Gi A Kagbu Ụgwọ 1 Njẹndemẹ ahụa ẹsa ọwụlẹ, ụnụ k'a kagburịrị ụgwọ wẹ gi ụnụ. 2 Ẹnịna kẹ ụnụ a dọn e mẹ ẹ: Onyẹ ọwụlẹ wẹ gi ụgwọ sikọ d'a kagbu ụgwọ ọwụlẹ onyẹ Izrẹlụ ibe ẹ gi ẹ. Ọ dọkọ onyẹ Izrẹlụ ibe ẹ mọbụ nwẹnẹ ẹ ụgwọ ọwụlẹ, makẹni a maọlẹ wẹ ọkwa n'o ruọlẹ ogẹn Osolobuẹ gi a kagbu ụgwọ. 3 N'ị s'ẹka dọ abịamabịa ụgwọ, kanị ị k'a kagburịrị ụgwọ onyẹ Izrẹlụ ibe i gi i. Ọnọdị O Gi Rịnị Wẹ Mma 4 Kanị, o furudẹni nwan nị ogbẹnnyẹ rị imẹ igunrun ụnụ, makẹni Osolobuẹ wụ Chuku ụnụ k'a gọzi ụnụ ọhụnma-ọhụnma imẹ alị ahụn ọ rị e ye ụnụ nọ wụrụ ukuu ụnụ — 5 kasị a mẹni ụnụ hụ e humẹni Osolobuẹ wụ Chuku ụnụ isi, e dọnrin ẹnya e mẹchanrịn ihiẹn ile m rị a gwa ụnụ tannị. 6 Makẹni, Osolobuẹ wụ Chuku ụnụ jẹnkọ d'a gọzi ụnụ k'o dọn kwe nkwa: ụnụ k'e zinye alị bu ọda kanị ụnụ ezinnarịnkọ onyẹ ọwụlẹ; ụnụ k'a kị ndị alị bu ọda, kanị onwọnni hụn k'a kị ụnụ. Ịha-ẹka 7 Omẹni onyẹ nke ụnụ a dan ogbẹnnyẹ imẹ obodo ọwụlẹ rị alị ahụn Osolobuẹ wụ Chuku ụnụ rị e ye ụnụ, akpọkinkwọlẹni nwẹnẹ i ahụn wụ ogbẹnnyẹ obi mọbụ kwọnkẹnmẹn'ẹ ẹka. 8 Ka ha ẹka, shịapụ ẹfọ zinye nwẹnẹ i ihiẹn ọwụlẹ rị a mkpa. 9 Kpachanpụkwọ ẹnya amamgbe y'e bu eje-iroroni che obi, a sị, “Ahụa nke ẹsa, ahụa wẹ gi a kagbu ụgwọ, e rugụọ; asakọkwọ m ẹka” — y'e gi eje-iroroni jọ nwẹnẹ i ihiẹn rị a fụ ọrụn ẹfọ, y'e yen'ẹ ihiẹn, ọ kwanghọsị Osolobuẹ, ikpe a ma ị. 10 Han'a ẹka; shịapụkwọ ẹfọ ye ẹ ya! Ogẹn ahụn, Osolobuẹ wụ Chuku i e gi ufiri ẹ gọzi ihiẹn ile ị rị a rụn lẹ ihiẹn ile i buche ẹka. 11 Ndị dan ogbẹnnyẹ jẹnkọ d'a rịrịrị alị ụnụ. M rị nwan e ye ụnụ iwu a sị ụnụ, “A hanị nị umunẹ ụnụ lẹ ndị igbẹnnyẹ lẹ ndị ihiẹn rị a fụ ọrụn rị alị ụnụ ẹka.” Ịhatu Onyẹ Izrẹlụ Ibe I Hụn Wụ Igbọn 12 Onyẹ Hibru (onyẹ Izrẹlụ) ibe i re enwẹn ẹ ye i, ọsụọn'a okẹnnyẹ, ọsụọn'a okpoho, ahụa isin k'o sikọ d'e fe i, hụn mẹ ahụa ẹsa i jẹnkọ d'a haturịrị a n'ọ lama. 13 O ru ogẹn y'e gi hatu ẹ, agbakwọl'a ẹka la. 14 Du ẹ ụla ọhụnma-ọhụnma: nọ atụnrụn lẹ ewu lẹ ọka lẹ manya ị weri hụn bu ọda gi kwaman'a, ye ẹ kẹ Osolobuẹ wụ Chuku i gọzihan ị. 15 Nyanhankwọ nị ụnụ te wụ igbọn imẹ alị Ijiptu, Osolobuẹ wụ Chuku ụnụ nọ gbapụha ụnụ; ịya kẹ m gi rị e ye ụnụ iwuni tannị. Igbọn Jụ N'ọ Lakọ 16 Kanị okẹnnyẹ ahụn rị e fen'i sị ị, “Achọnị m nị m la ị tọ,” makẹni ihiẹn ịyụ lẹ ezi-lẹ-ụlọ i sụọ a lẹni hụn o sọn ị nọdị a bọghọ a, 17 y'e weri aha, ha a ọnụnụ-ntịn limẹni ẹhue (ọnụmụzọ), o wụrụchanrịn igbọn i o we nwụn. Ẹrịra kẹ i k'e mẹzikwọ igbọn i okpoho. 18 Ewerilẹ ẹ nị ụya rọ ebe i nọ hatu ẹ n'o weri enwẹn ẹ, makẹni hụn o fe i ọrọgbọ ahụa isinni a hangụọ kẹ hụn onyẹ wẹ we ọrụn k'e fe ụzọ ẹbụọ. Osolobuẹ wụ Chuku ụnụ k'a gọzi ihiẹn ọwụlẹ i buche ẹka. Nwa-ibuzọ Anụ Mụ 19 Wepụhanị Osolobuẹ wụ Chuku i okẹn ibuzọ ile anụ ị mụ — kẹ efin kẹ atụnrụn kẹ ewu; eyimẹkwọlẹ okẹn efin ibuzọ ị agbụn n'i gi ẹ rụn ọrụn; akọrịkwọlẹ ebulu ibuzọ atụnrụn ị mụ ẹṅẹnrẹn. 20 Ahụa-ahụa kẹ ịyụ lẹ ikpụlọ ị e gi a nọ ihun Osolobuẹ wụ Chuku ụnụ e ri wẹ; ebahụn o k'a họrị kẹ ụnụ k'a nọrịrị ri wẹ. 21 Omẹni anụ nwọn nsọngbu ẹhụ, omẹni ọ wụ ngụrọ mọbụ ẹnya-ishi mọbụ n'o nwọn k'o dọnlẹni zu oke, egikwọl'a chụnyeni Osolobuẹ wụ Chuku i ẹjan. 22 Nọ imẹ obodo i bi ri ẹ, kẹ ndị rị ọchan kẹ ndị rịlẹni ọchan nwọn ikẹn ri ẹ, nọkẹ sị mgbadan mọbụ ele rọ. 23 Ka erikwọlẹ ẹdeke ẹ: hu ẹ ye alị nọkẹ mirin. |
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
Wycliffe Bible Translators, Inc.