Azaya 51 - Ika

Isi Nke Mmanaị Kwasị Ọgụnnaị Nzụọpụha Hụn K'a Rị Jẹnrin-ejẹn

¹ Osolobuẹ sị: Gọn ni m ntịn, ụnụ ile hụn a chọ nị ihiẹn rịzị k'o furu — ụnụ ndị rị a chọ nke Osolobuẹ: Bu ni nwan ẹnya ọmụma hụ wẹ gha bepụha ụnụ lẹ ebahụn wẹ nọ bepụha ụnụ.

² Leri ni nẹdi ụnụ wụ Ebraham lẹ Sẹra nnẹ mụnị ụnụ. Ogẹn m gi kpọ Ebraham, onyẹ ohu k'ọ wụ. Kanị, a gọzi m'ẹ, mẹ ẹ mụba.

³ Osolobuẹ k'a rọkọrịrị Zayọnụ obi, mẹ omikẹn dọnzi ebe ile rịn'a wiwini. O k'e mẹ alị a te kpọgụ nkụn mẹmẹ ihiẹn ọhụnma nọkẹ Idẹni; o k'e mẹ alị a te wiwini n'ọ nọ kẹ ugbo-nta Osolobuẹ. Ịghọghọ lẹ obi-ụsụọ k'a rị alị a, Ịkpanmịn Osolobuẹ lẹ ịbụ-ẹbụ.

⁴ Ndị nke m, gọn ni m ntịn; ndị alị m, gọn ni m ntịn. M k'e mẹ Iwu m ghagbarị, ezigbo-eṅẹn m jẹnkọ d'a wụrụnị alị ile ukpẹ.

⁵ M lala d'e mẹni ụnụ ihiẹn furuni, nzụọpụha m lala alala, ẹka m k'a kị alị ile. Alị ndị teni rị ohimin k'a rịzịdẹ e lee ẹnya m; wẹ k'a rị e che m nị m d'a tụnị wẹ ụya.

⁶ Lee ni ẹnya igwere, ụnụ e lezikwọ ẹnya elu-ụwa rị okpuru ẹ: igwere jẹnkọ d'e fopụ nọkẹ ẹnwụnrụn, elu-ụwa nkẹ jẹnkọ d'a fahị nọkẹ ẹkwa, ndị bi imẹ ẹ a nwụnhụn nọkẹ nzinzin. Kanị nzụọpụha m k'a rị jẹnrin-ejẹn, Ihiẹn hụ furuni m k'e mẹni ụnụ agụkọ.

⁷ “Gọn ni m ntịn, ụnụ ndị marịn ihiẹn furuni, ụnụ ndị iwu m rị obi: Atụlẹ ni egun nkọrịanị ịhịan mọbụ mama piripiri ni wẹ rị a kpari ụnụ.

⁸ Makẹni, ẹkịka k'e ripụ wẹ kẹ ẹkwa; ọhọrị k'e ripụ wẹ kẹ oruru. Kanị ọzụọpụha m jẹnkọ d'a zụọpụha k'a rị jẹnrin ejẹn, nzụọpụha m k'e ru agbọ ile.”

⁹ Tẹnhin! Tẹnhin!! Ẹka Osolobuẹ gi a kpa ikẹn, tẹnhin! Jeri ikẹn i nọkẹ ẹkwa; tẹnhin kẹ y'e tẹnhin mbụ, kẹ y'e tẹnhin ogẹn ndị mbụ! Ẹlẹ ịyụ jakịka eje-anụ wụ Rehabụ? Ẹlẹ ịyụ zupu eje-anụ ohimin hụ ẹfọ?

¹⁰ Ẹlẹ ịyụ mẹ ohimin hụ tahị — mirin ahụn migbu enwẹn ẹ? Ẹlẹ ịyụ bedẹ ụzọ ye okẹn-ohimin hụ kẹni ndị ị gbapụha fetu?

¹¹ Ya wụ, ndị Osolobuẹ k'a gbapụha k'e kinhẹn; wẹ k'e gi ẹbụ banhan Zayọnụ Jerusalẹm; ịghọghọ itẹbitẹ k'a wụrụ ihiẹn wẹ gi tu wẹ ugọn. Obi-ụsụọ lẹ ịghọghọ k'e rukpumẹ wẹ, ẹkwan lẹ ịsụn-udẹn k'a gba ọsọ.

¹² “Mmẹ, mmẹ lẹ enwẹn, mmẹ a rọkọ ị obi. Onyẹ k'ị wụdẹ nwan i gi a tụ egun ịhịan mmaka ịhịan mmaka hụn a nwụnhụ kẹ ẹfịfịa?

¹³ Onyẹ k'ị wụ hụn i gi a zọ Osolobuẹ hụn ken'i, hụn shịshịapụ igwere, gbe iyetọ ụwa? Onyẹ k'ị wụdẹ nwan egun gi a tụ ị ụhụọkịn ile makẹ ọnụma onyẹ rị a bịangbuni, hụn rị a sị n'o k'e tikpọrịrị? Kịnị kẹ ọnụma onyẹ hụ rị a bịangbuni k'e mẹdẹ nwan?

¹⁴ Ọ họdụ ẹkẹrẹ nị ndị wẹ kwọndọn weri enwẹn wẹ — anwụntọkọ wẹ imẹ ngan, ihiẹn-oriri akọkọ wẹ.

¹⁵ Makẹni mmẹ wụ Osolobuẹ, Chuku ụnụ, hụn e mẹhunmẹ ohimin hụn mirin ẹ gi a tụhunmẹ; Osolobuẹ ihiẹn ile rị okpuru ẹ wụ ẹfan a.

¹⁶ E bugụọ m oku m che i ọnụ, gi ẹka m kpumẹ i. Mmẹ hụn dọnmẹ igwere ebe ọ rị, mmẹ hụn gbe iyetọ ụwa, mmẹ hụn rị a sị ndị Zayọnụ, ‘Ndị nke m kẹ ụnụ wụ.’ ”

Osolobuẹ Sị O K'a Napụ Zayọnụ Afụnfụn Ọ Rị Imẹ Ẹ

¹⁷ Tẹnhin! Tẹnhin ụran! Jerusalẹm, lihi ọtọ! Ịyụ hụn ragụ afụnfụn hụn Osolobuẹ zihẹ imẹ mkpu hụn o buche ọnụma a; y'a ragụọ a, rachanpụdẹ ẹrụrụ a, mkpu hụ hụn e mẹ ịhịan a hanfie ụkụ.

¹⁸ Ụmụ ile ọ mụ, onwọnni hụn sa ẹka ghọsị a ụzọ; ụmụ ile ọ zụn, onwọnni hụn sa ẹka kwọndọn ẹ ẹka, du ẹ.

¹⁹ Eje-ihiẹn ẹbụbụọnị e kunrungụọ ị nwan; onyẹ k'a sa nwan ẹka mẹn'i ihiẹn ọwụlẹ? Owiwi lẹ ntikpọ, ụnwụn lẹ ọpịa-agha — onyẹ k'a sa nwan ẹka hụhụ ị ẹkwan?

²⁰ Ụmụ ị ikẹnnyẹ a sọhịgụọ, fiẹnrinsọnmẹ ọgbara-ogbe ile, nọkẹ mgbadan ọnyan nwụndọn. A ragụọ wẹ ọnụma Osolobuẹ, rajun ẹfọ — ya lẹ ọjụgbọ Chuku i jụgbọ wẹ.

²¹ Gọn nwan ntịn, ịyụ wẹ rị e mẹshi ikẹn, ịyụ hụn ra tụ bụ ẹlẹ manya k'ị ra.

²² Di-nwọnni-ẹnyi wụ Osolobuẹ, Chuku i, hụn a lụnị ndị nke ẹ ọgụn, sị, “Lee ẹ, a napụgụọ m'ị mkpu ahụn e te mẹ i a hanfie ụkụ; y'a rakọzị ihiẹn rị imẹ mkpu hu, mkpu hụ m buche ọnụma m.

²³ M jẹnkọ nwan d'e bu mkpu ọnụma hụ ye ndị rị e mẹshi i ikẹn, ndị hụ te sị ị: ‘Fiẹnrin — nị ẹnyi zọ ị ụkụ ghafe!’ Ị nọ gi ụgba-azụụn ị họnrin akpak'alị w'a zọ ụkụ, ọkpụ-ụzọ w'a zọ ụkụ.”