Azaya 5 - Ika

Isi Nke Isẹn Ẹbụ Ugbo-vaịnị Mị Eje-vaịnị

¹ Nị m bụnị Nke-m ẹbụ, ẹbụ gbashịarị alị vaịnị a: Nke-m nwọn alị vaịnị, hụn rị alị rị mma mkpọtu òke.

² Ọ dụkpọ alị a, kpọnpụchanrịn ọmụma junn'ẹ, gbọ ezigbo vaịnị ye ẹ. Ọ tụn ụlọ-nche ye imẹ ẹ, nọzịkwọ ọmụma rị alị tụ ebe wẹ nọ a pịnpụha manya vaịnị. Ọ nọ tụma ẹnya ogbe vaịnị rị mma, kanị ọ mịn'a vaịnị rịlẹni mma.

³ Ụnụ ndị bi imẹ Jerusalẹm lẹ ndị alị Juda ile hannị nị nwan mmẹ lẹ alị vaịnị m eṅẹn.

⁴ Kẹ m k'e mẹzini alị vaịnị m karị hụn m mẹn'ẹ? Kẹ m chọjẹn vaịnị rị mma, k'ọ mịnịnị m nwan vaịnị rịlẹni mma?

⁵ Nị m gwa nwan ụnụ ihiẹn m k'e mẹ alị vaịnị m: m k'e wepụ ihiẹn m gi gbọnhunmẹ ẹ, e wiwi w'ẹ; e tikpọpụ m mgbọn ẹ, a zọtịta w'a.

⁶ M k'e mẹ ẹ họnrin alị la iwi, alị wẹ ghalẹni e befọn ihiẹn rịn'a mọbụ a rụn ugbo, ogun lẹ ọkịnkan e pu ẹ. M k'a sị igwere e zueyelẹ ẹ mirin.

⁷ Alị vaịnị Osolobuẹ, Onyẹ ihiẹn ile rị okpuru ẹ, wụ ikpụlọ Izrẹlụ; ndị alị Juda rịn'a wụ ugbo-nta a hụn rị a obi. Ọ tụ ẹnya ezigbo-eṅẹn, kanị igbu-ọchụn k'ọ hụn; ọ tụ ẹnya ezi-omumẹ, kanị ẹkwan ndị wẹ rị a bịangbu k'ọ nụ.

Ikpe Hụn Osolobuẹ Ma Izrẹlụ

⁸ Nsọngbu rị e che ụnụ ndị rị e nwọnrin ụlọ e cheni ụlọ, e nwọnrin ọfịa e cheni ọfịa d'e ru n'o nwọnzini ebe họdụnị ndị ọzọ, ụnụ sụọ e biri nwan alị nwẹn.

⁹ Osolobuẹ, Onyẹ Nwọn ikẹn ile, e kugụọ a hụn m nụ, sị, “Okẹn ụlọ ndị hụ ile k'a gbarịrị okpokoro, onwọnni onyẹ k'e bi okẹn ụlọ ndị hụ ile ma mma.

¹⁰ Anị vaịnị wẹ gi okẹn efin ọgụn rụn eyekarịkọ ụnụ galọnụ manya ohu; ẹkpa ọka iri ụnụ k'a kụn amịkarịkọnị ụnụ ẹkpa ohu.”

¹¹ Nsọngbu rị e che ndị hụn a zọpụ ụz'ọtụntụn d'a ra manya ahụn w'a ra, a ra manya d'e ru imẹ abalị, d'e ru n'ọ tụma wẹ.

¹² Wẹ hụ a kpọ ụbọ-hapụ lẹ ụbọ-layẹ imẹ oriri wẹ, a kụ ẹgede-chakachaka, e gbu ẹkpịrị, a ra manya, kanị, onwọnni ihiẹn wẹ kpọ ihiẹn Osolobuẹ rị e mẹ, w'a ra rodẹ ihiẹn ọ chọ n'o mẹ wẹ.

¹³ Ufiri ẹ, wẹ k'a kpụn ndị nke m shi alị ọzọ makẹni ndị nke m enwọn nghọta; ẹgụn-ọnụ k'e gbu ndị-isi wẹ, ẹgụn-mirin e gbu ndị-mmaka.

¹⁴ Ili rị nwan e lue ẹkpịrị e che we ọda-ọda, ọ shịapụchanrịngụọ ọnụ; ndị-isi lẹ ndị-mmaka rịn'a sikọ d'a danye imẹ ẹ, wẹ lẹ ndị ọgụn-lẹ-mkpọtụ wẹ lẹ ndị oriri-lẹ-ọrịra wẹ.

¹⁵ Wẹ k'e welụachanrịn ịhịan alị, budanchanrịn ịhịan ile, kwa ndị nhọnrọn nku.

¹⁶ Kanị Osolobuẹ, Onyẹ nwọn ikẹn ile k'e gi ezigbo-eṅẹn ẹ nwọnrin ọghọ, Chuku hụn rị nsọ k'e gi ezi-omumẹ ẹ ghọsị n'ọ rị nsọ.

¹⁷ O mẹgụ wẹ ihiẹn, alị wẹ e họnrin ọfịa atụnrụn a nọ a kpa nni, mmụ-atụnrụn k'a nọ ụlọ ndị-ịdanfịn ndị hụ k'e mẹ mkpọkọ-mkpọkọ e ri ihiẹn-oriri.

¹⁸ Nsọngbu rị e che ndị gi ntụ wẹ rị a tụ a dọkpụn njọ nọkẹ eriri, ndị dọkpụnkọ eje-omumẹ wẹ nọkẹ ibu wẹ gi eriri dọkpụnkọ,

¹⁹ ndị hụn a sị, “Chuku ya mẹmẹ ozigbo, ya rụnkẹnrin ihiẹn nwẹn o k'a rụn, nị ẹnyi hụn a; ihiẹn ahụn Onyẹ-nsọ Izrẹlụ romẹ ya mẹmẹ nwan; ya mẹmẹ kẹni ẹnyi marịn ihiẹn hụ.”

²⁰ Nsọngbu rị e che ndị hụn a kpọ eje-ihiẹn ihiẹn rị mma; a kpọ ihiẹn rị mma eje-ihiẹn. Hụn a sị ishi wụ ukpẹ, a sị ukpẹ wụ ishi; hụn e sị ihiẹn rị e lu ilu rị a nẹnẹ, a sị nị ihiẹn rị a nẹnẹni rị e lu ilu.

²¹ Nsọngbu rị e che wẹ ile rị e ro nị a marịnka wẹ ihiẹn, nị e nwọnkẹ wẹ uche.

²² Nsọngbu rị e che ndị wụ dikẹn manya lẹ ndị ma hugbama manya e nwunye ẹnya a ra;

²³ hụn a narịn ọgị-azụụn a hatu onyẹ ikpe ma, a hangbu onyẹ ẹka a rị ọchan eṅẹn.

²⁴ Ufiri ẹ, kẹ ọkụn dọn e ripụ irurue-ọkpọnkụn lẹzi kẹ ẹfịfịa-ọkpọnkụn rị ọkụn dọn a nyụnlụa, ẹrịra kẹ mkpọgụn wẹ k'a dọn rehi, ufere e bupụ obobo wẹ nọkẹ ntụn; makẹni a jụgụọ wẹ Iwu Osolobuẹ, Onyẹ ahụn kachanrịnnị, legberi oku Osolobuẹ Onyẹ-nsọ Izrẹlụ.

²⁵ Ịya haịn Osolobuẹ gi gi olulu sọn ndị nke ẹ; o weshi ẹka, titu wẹ: ugu e mẹhunmẹ, ozun e jun rịkẹ ẹfịfịa rị ụwaya. Kanị, ihiẹnni ile arọkwọn'a nwan olulu, echẹn kẹ ẹka a rịkwọ elu n'o tizi wẹ.

²⁶ O weligụọnị alị ndị rị ebe teni ahịma nị wẹ bịa, kẹni wẹ bịa d'a lụsọn ndị nke ẹ agha; o gigụọ ọfịfị kpọ alị ndị rị njẹndemẹ ụwa. E lee wẹ kẹ wẹ lala warawara, gbala ozigbo-ozigbo!

²⁷ Onwọnni onyẹ ndụn a gụ, onwọnni onyẹ a kpọgburuni; onwọnni onyẹ e ru ụran, onwọnni onyẹ a ranhịnnị; onwọndẹni akpụkpọ-ukun ọwụlẹ a tọpụnị, onwọnni eriri akpụkụ ọwụlẹ a dọbeni.

²⁸ Ọbara-ụta wẹ tụ nkọ, e kwọnchanrịngụọ wẹ ụta wẹ ile; akpụkụ ẹshin-agha wẹ ze kẹ ọmụma, ụkụ ụgbọ-ẹshin agha wẹ a gba fịafịafịa nọkẹ ufere.

²⁹ Oro wẹ nọ kẹ ebe ẹwọrọ rị e dẹn; wẹ hụ e dẹn kẹ ikoro ẹwọrọ; wẹ hụ a nwụndọn ihiẹn wẹ chụha, e dẹn; e bu ẹ a la, onwọnni onyẹ a saẹka a gbapụha a ẹka wẹ.

³⁰ Ụhụọhịn hụ, wẹ k'e yi Jerusalẹm oro kẹ ẹwọrọ, oro hụn nọ kẹ ebe ohimin rị a zụn ụzụn. Onyẹ lee alịnị ẹnya ogẹn ahụn, ọ hụn ishi lẹ ụya; igwere k'e gitọ, kpumẹdẹ ukpẹ.