Azaya 44 - Ika

Isi Nke Ẹnọ Kwasị Ọgụnnaị

¹ Ka gọn nwan ntịn, yụ wụ odibo m Jekọpụ, Izrẹlụ, hụn m họrị!

² Lee ihiẹn Osolobuẹ ku — Osolobuẹ hụn ken'i, hụn mẹmẹ i imẹ ẹfọ nnẹ i, hụn jẹnkọ d'e yen'i ẹka — ọ sị, “Odibo m Jekọpụ, atụlẹ egun. Jẹshurunu hụn m họrị, atụlẹ egun.

³ M jẹnkọ d'e hu mirin ye akpakalị ẹgụn mirin rị a gụn, mẹ iyi rịsọnmẹ alị mirin te rịlẹni; m k'e hu mmọn m kpu ụmụ ị, hu ngọzi m kpu ẹbozo i.

⁴ Wẹ k'e pu, sue, lekẹ irurue rị imẹ ogige, lekẹ osisi-wilo rị e sue mkpẹnrẹn iyi.

⁵ Ogẹn hụ, onyẹ ohu k'a sị, ‘M wụ nke Osolobuẹ’, onyẹ ọzọ a kpọ enwẹn ẹ ‘Jekọpụ’; onyẹ ọzọ k'e de ‘Nke Osolobuẹ’ ye enwẹn ẹ ẹka, zama Izrẹlụ.”

⁶ Lee ihiẹn Osolobuẹ ku — Eze Izrẹlụ, Onyẹ-mgbapụha Izrẹlụ, Onyẹ ihiẹn ile rị okpuru ẹ, ọ sị: “Mmẹ wụ Ibuzọ, mmẹ wụ Ikpanzụụn. Chuku arịa — wezụka m.

⁷ Onyẹ nọ nwan kẹ mmẹ? Ya ku. Ya ku; ya ghọsị m'a — ya ku k'o dọn mẹ ihiẹn ile mẹni kete m tumẹlẹ ndị nke m; ya kuzikwọ ihiẹn rị ihun, ẹghẹẹ, ya kuzikwọ lalanị.

⁸ Amalẹ ni piripiri, ndị nke m; atụlẹ ni egun. Agwatọgụọnị m ụnụ kete-kete nị ihiẹn ndịnị jẹnkọ d'e mẹ? Ụnụ wụ ọshẹri m! Gwa nị m nwan kẹ o nwọn Chuku rịnị wezụka m! Mba! Ọmụma ọzọ arịa — amarịn m ọzọ!”

⁹ Ndị ile e mẹmẹrin mmọn enwọn ihiẹn wẹ wụ; mmọn ndị hụ wẹ bu obi enwọnzikwọ isi. Ndị ile e kuni mmọn ọnụ wẹ wụ ẹnya-mpịn — onwọnni ihiẹn wẹ marịn — ifẹnrẹn ya mẹgbu wẹ.

¹⁰ Nanị kẹ ịhịan a dọn kpụ nwa-mmọn hụn nwọnlẹni erere o k'a bann'a?

¹¹ Ịya lẹ ndị nọ kẹ ya k'a fakwọ! Ndị omẹ-nka hụn a kpụ mmọn wụhụ ịhịan mmaka. Wẹ ile wẹ pụhachanrịn d'e kin nwan; wẹ k'e wetu wẹ alị — egun a tụgbu wẹ, ifẹnrẹn e mẹgbu wẹ.

Ihiẹn Wẹ Kpụ Akpụ Kẹ Mmọn Wụ

¹² Ọkpụ-ụzụn weri ihiẹn o gi a kpụ ụzụn, o mẹ ẹ k'o mẹ ẹ imẹ ọkụn — o gi otutu-ụzụn a kụ a n'ọ rị k'ọ chọ; ẹka a zeni k'o gi a kụ a; ẹgụn gụnma a, ndụn a gụ a; omẹni ọ ranị mirin, ẹhụ a rọ a.

¹³ Ọpịn-osisi mapụha hụn ọ chọ imẹ osisi, o gi pẹnsụlụ kayesọnmẹ ẹ isini lẹ isini; o gi izẹ o gi a tụ osisi tụsọnmẹ ẹ k'o dọn chọ; o gi ihiẹn a kayesọnmẹ ebe ọ chọ n'ọ tụ. Ọ tụ a n'o yi ịhịan — yi ẹ, yichanrịn a; o bu ẹ che ụlọ-mmọn.

¹⁴ Ikẹnkwọ sida k'o gburu mọbụ saịprẹsị mọbụ osisi okuu — ikẹnkwọ hụn gi ihiẹn-ẹka a sue imẹ ọfịa rọ mọbụ paịnị ọ kụn hụn gi mirin zueni sue.

¹⁵ Ịya kẹ ịhịan gi a fiye ọkụn: o weri hụn o gi a fiye ọkụn a nyan, o weri hụn o gi e shi ihiẹn-oriri — kanị o gizikwọ osisi hụ tụ mmọn, e fe ẹ, o gi ẹ pịnrịn nwa-mmọn, a kpọn'a isi-alị.

¹⁶ Ẹghẹẹ, o gi azụụn ohu họnrin nkụn o gi ẹ shi ihiẹn-oriri, o gi ẹ hụnma anụ, ri, rijun ẹfọ. O gizi ẹ a nyan ọkụn, a sị, “Ẹhẹn, ẹhụ e kpọn m ọkụn! Ọkụnnị arịka mma.”

¹⁷ O gi hụn họdụnị pịnrịn nwa-mmọn — pịnrịn mmọn o k'e fe; ọ kpọn'a isi-alị, fe ẹ. Ọ kpọku ẹ, sị a, “Zụọpụha m, nị ịyụ kẹ m'e fe!”

¹⁸ Onwọnni ihiẹn wẹ marịn; onwọnni ihiẹn w'a ghọta! A nyankingụọ wẹ wẹ ẹnya — w'a ra legha ụzọ, uche wẹ kpukin ekpukin — w'a ra s'ẹka a ghọta.

¹⁹ Onwọnni onyẹ e rokpọn'a; onwọnni onyẹ nwọn amamihiẹn mọbụ nghọta hụn o gi sị enwẹn ẹ, “Ịya kẹ m nọ warị nkụn, gi shi ihiẹn-oriri, gizikwọ a hụnma anụ, ri. Nanị m'a dọnzị nwan gi hụn họdụnị mẹmẹ mmọn, mẹmẹ ihiẹn rụnị, femẹ ẹ? Nị m'a kpọnị nwan ogwe-nkụn isi-alị?”

²⁰ Hụnyẹ rịhụ e ri ntụn! Uche ẹ hụn gbayịyagụnị e dufiegụọ a. Ọ sakọ ẹka zụọpụha enwẹn ẹ mọbụ sị enwẹn ẹ, “Ẹlẹ ihiẹn nwọnlẹni isi kẹ m kwọndọn ẹka-nni m ihiẹnni?”

²¹ Nyanhan nị ihiẹn ndịnị, ebọn Jekọpụ, makẹni ịyụ wụ Izrẹlụ wụ odibo m; mmẹ ke i; odibo m kẹ ị wụ. Azọkọ m'ị, Izrẹlụ.

²² E finchanpụgụọ m mmẹfie ụnụ ile rịkẹ igwere gitọnị, zapụ njọ ụnụ lekẹ igirigi ụtụntụn. Kinhẹn ni nwan d'e kunrun m, n'a gbarịgụọ m ụnụ.

Osolobuẹ: E Ku A Bụn!!

²³ Igwere, bụma ẹbụ ịghọghọ, makẹni Osolobuẹ e mẹgụọ ihiẹnni! Alị, yi oro! Ugu ichẹn-ichẹn, bụye ni ẹbụ — kẹ ọfịa lẹ osisi ile rịn'a! Makẹni Osolobuẹ a gbapụhagụọ ebọn Jekọpụ, o giọlẹ ụmụ Izrẹlụ ghọsị ọghọ a.

²⁴ Lee ihiẹn Osolobuẹ ku — ihiẹn Onyẹ hụn gbapụhan'ị ku, Onyẹ hụn mẹmẹ i imẹ ẹfọ-nnẹ i: ọ sị: “Mmẹ wụ Osolobuẹ hụn ke ihiẹn ile; mmẹ sụọ setịnpụ igwere; gi ẹka m gbama ụwa kẹ ẹkwa.

²⁵ Mmẹ haịn ndị-amụma ntụ gi e ku ọzọ, ọzọ e mẹ, e mẹ ndị a hụn-ụzọ a nọ kẹ ndị ẹwobi; mmẹ haịn o gi arụnahịn ndị marịn ihiẹn, ihiẹn wẹ marịn e họnrin ihiẹn nwọnlẹni isi.

²⁶ Mmẹ e mẹ oku idibo m a bụn, e mẹzu ihiẹn ndị odibo m ku. Mmẹ ku oku Jerusalẹm, sị, ‘Ịhịan k'e bizi imẹ ẹ;’ kuzi oku obodo rịsọnmẹ Juda, sị, ‘Wẹ k'a tụndọnzi wẹ;’ mmẹ ku oku mkpọkọ ụlọ ndịnị, sị, ‘Wẹ k'e welizi wẹ.’

²⁷ Mmẹ sị ohimin, ‘Tahị; m k'e mẹ mirin i tahị.’

²⁸ Mmẹ ku oku Saịrọsị, sị, ‘Ịya wụ onyẹ e duni m anụ. O k'e mẹkwama uche m’; o k'a sị wẹ, ‘Tụndọnzi ni Jerusalẹm’, sị wẹ, ‘Gbedọnzi ni iyetọ Ụlọ-NSỌ Osolobuẹ.’ ”