Azaya 42 - Ika

Isi Nke Ẹbụọ Kwasị Ọgụnnaị Odibo Osolobuẹ

¹ Lee ni odibo m, hụn m kwadọn, onyẹ hụn m họrị hụn ihiẹn ẹ a sụọ m! E bugụọ m Mmọn m kwasị a; o k'e ye ndị alị ichẹn-ichẹn iwu rị mma.

² O mẹkọ onyẹ-ndọndọ mọbụ onyẹ-oro, anụkọ wẹ olu ẹ ọgbara-ogbe.

³ Ọ kpagipụkọ achara rị a kpagini, o tinyụnpụkọ ukpẹ rị e tinyụnnị; o k'e turu, wepụhachanrịn ezioku ifọn;

⁴ ẹhụ arọkọ a, ndụn agụkọ a — d'e ru n'o yegụ ezioku ọnọdị a elu-ụwa. Alị ndị rịdẹ nfetu ohimin k'a gha e che iwu ẹ.

⁵ Lee ihiẹn Chuku wụ Osolobuẹ ku — Chuku hụn ke igwere ile, gbama wẹ; hụn gbama elu-ụwa lẹ ihiẹn ile a gha imẹ ẹ a pụha, Chuku hụn e ye ndị rị elu-ụwa uzun, e ye ndị ile rịn'a ndụn:

⁶ ọ sị, “Mmẹ wụ Osolobuẹ kpọ ị ọkpụkpọnị furuni; m k'e kwọndọn i ẹka. M k'e dọnmẹ i, gi i họnrin onyẹ hụn mmẹ lẹ ndịnị gha ẹka a e mẹgbama, mẹ i wụrụzịkwọ ukpẹ ndị alị ọzọ

⁷ kẹn'i shịapụ ndị ẹnya-ishi ẹnya, wepụha ndị rị imẹ ngan, wepụhazịkwọ ndị ishi kpọma ẹgan.

⁸ Mmẹ wụ Osolobuẹ; ya wụ ẹfan m! Ewekọ m ọghọ runi m ye onyẹ ọzọ mọbụ we ịja-mma runi m ye mmọn wẹ kọma.

⁹ Lee ẹ, ihiẹn ile m gwa ụnụ mbụ e mẹgụọ. M rịzị nwan a gwa ụnụ ihiẹn ọhụn; m rị a gwatọ ụnụ ya hụnnị o kelẹni mẹ.”

Ẹbụ Wẹ Gi Ja Osolobuẹ Mma

¹⁰ Bụnị nị Osolobuẹ ẹbụ ọhụn, gi ni ẹbụ ja a mma ebe ile ụwa ru — kẹ ụnụ ile a gha ohimin kẹ ihiẹn ile rị imẹ ẹ, kẹ alị ndị teni rị mkpẹnrẹn ohimin lẹ ndị ile bi imẹ wẹ.

¹¹ Atụ lẹ obodo ile rịn'a wẹ weshi olu elu — kẹ mmụ alị ile ndị Kẹda bi wẹ ghọghọma. Ndị alị Sẹla wẹ bụma ẹbụ ịghọghọ — wẹ gha mkpọnụnụ ugu wẹ rị yimẹ oro.

¹² Wẹ ile wẹ ye Osolobuẹ ọghọ, wẹ ku ihiẹn o mẹ — kẹ alị ndị teni rị mkpẹnrẹn ohimin.

¹³ Osolobuẹ k'a pụha kẹ odogun-agha, o k'a kpasu enwẹn ẹ kẹ onyẹ-agha; o k'e weshi olu elu yi oro-agha, o k'e mẹri ndị-iṅẹnrẹn ẹ.

¹⁴ O k'a sị, “Agbabiegụọ m nkịtịn, e kpumẹgụọ m ọnụ ọda-ọda, kwọndọnchanrịn enwẹn m. M jẹnkọ nwan d'e yi oro kẹ okpoho rị a mụ nwa, m yi, a lụ m, a sụn m udẹn.

¹⁵ M k'e bu ugu lẹ òke la iwi, mẹ ihiẹn ile rị e sue elu wẹ shinwụnchanrịn; m k'e mẹ iyi tahị, akpakalị a pụhasọnmẹ ẹ, mẹ ọgọdọ-mirin tahị.

¹⁶ M k'e du ndị ẹnya-ishi — dughadẹ wẹ ụzọ wẹ marịnlẹni, m k'e we wẹ gha ozue wẹ marịnlẹni. M k'e mẹ ishi họnrin ukpẹ ebe wẹ ghakọ, mẹ ebe mẹ mkpọke-mkpọke riẹnni wẹ. M k'e mẹ ihiẹn ndịnị; agbakịtọkọ m ndị nke m azụụn.

¹⁷ Kanị ndị gi mmọn dọn ẹnya — ndị hụn sị ihiẹn wẹ kpụ nị uwẹ wụ chuku wẹ k'e gi ifẹnrẹn kin azụụn.

Ẹnya-mpịn Lẹ Ntịn-okin Kẹ Izrẹlụ Wụ

¹⁸ “Gọn ni ntịn, ndị ntịn-okin! Lee ni ẹnya, ndị ẹnya-ishi — nị ụnụ legha ụzọ!

¹⁹ Onyẹ wụ ẹnya-mpịn karị odibo m? Onyẹ wụ ntịn-okin nọkẹ onyẹ-ozi m? Onyẹ wụ ẹnya-mpịn nọkẹ onyẹni lachanrịn enwẹn ẹ tọnị m? Onyẹ wụ ẹnya-mpịn nọkẹ odibo Osolobuẹ?

²⁰ Y'a hụngụọ ihiẹn bu ọda, kanị y'e gini wẹ dọn; ntịn ị hụ oghe, kanị onwọnni ihiẹn y'a nụ.”

²¹ O te sụọghọ Osolobuẹ n'o gi ufiri ezi-omumẹ ẹ mẹ Iwu ẹ wụrụ okẹn-ihiẹn nwọn ọghọ,

²² kanị ndịnị a wụrụgụọ ndị wẹ rị a kwarị ihiẹn wẹ, a napụchanrịn ihiẹn wẹ; wẹ ile a danyesọnmẹgụọ olu tọ imẹ wẹ, mọbụ imẹ ngan ebe wẹ zuemẹsọnmẹ wẹ. E họnringụọdẹ wẹ ndị wẹ kpụnrụn, hụn nwọnlẹni onyẹ a zụọpụhanị wẹ; e họnringụọ wẹ ihiẹn wẹ narịn ịhịan, hụn nwọnlẹni onyẹ a sị, “Wekin wẹ.”

²³ Onyẹ imẹ ụnụ k'e gi ihiẹnni dọn mọbụ gọn ntịn ihun?

²⁴ Onyẹ wedẹ nwan Jekọpụ ye wẹ kpụnrụn? Onyẹ we Izrẹlụ ye ndị e gbu a kwarị? Ẹlẹ Osolobuẹ hụn ẹnyi mẹ njọ? Makẹni ekwerini wẹ gha ụzọ a, edọnmẹni wẹ iwu ẹ.

²⁵ Ya ọ nọ gi eje-olulu ẹ sọn wẹ, gi agha lẹ ogbugbu lẹ ntikpọ rịn'a sọn wẹ; agha nọ kpumẹ wẹ lekẹ ọkụn rị e nwunni — aghọtakwọnị wẹ; agha e bu wẹ ri kẹ ọkụn, egizikwọnị w'a dọn.