Azaya 21 - Ika

Isi Nke Ohu Kwasị Ọgụn Ihiẹn Chuku Ku N'o K'e Mẹ Alị Babilọnụ

¹ Ọnwan wụ ihiẹn Chuku ku banyeni Alị ọkpọ-nkụn ahụn nọkunmẹ Ohimin: Kẹ okẹn ufere dọn a gha ẹbamịn ndịdan-mirin wụ Nẹgẹvụ a fehẹ, ẹrịra kẹ wẹ gha nwan alị-ọkpọnkụn lala d'a maye i, Babilọnụ; wẹ gha eje-alị w'a tụ egun ẹ lala.

² Ihiẹn ọ ghọsị m imẹ Ọhụn m hụn a jọka njọ: ẹro-ẹro lẹ ntikpọ-ntikpọ rịchanrịn a; Ndị Ẹlam, mayeni wẹ ọgụn! Ndị Mẹdịa, kehunmẹni wẹ! M jẹnkọ nwan d'a kụsị udẹn ile o mẹ ndị rị okpuru ẹ a sụn.

³ Ihiẹnni m hụn hụ a ta m ẹfọ, ọ tụrụ m kẹ ebe imẹ rị e mẹ okpoho; ihiẹn m nụ ọnụ Osolobuẹ rị a gụ m ndụn, ihiẹn ọ ghọsị m tụ m egun ọda-ọda.

⁴ Obi a nahịn m; ẹhụ a magbu m nni yeni egun; ẹnyasị nwẹn m chọkọ e họnringụọ m nwan ihiẹn egun.

⁵ E butọsọnmẹ wẹ ihiẹn-oriri, a gbamasọnmẹ wẹ ihiẹn wẹ gi a nọdị alị, e ri wẹ, a ra wẹ! Lihikwọ nị, ụnụ ndị-isi agha, Ozigbo ni, fichan nị akpaịn ụnụ!

⁶ Ọnwan wụ ihiẹn Osolobuẹ gwa m: “Jẹnmẹ, d'e tumẹ onyẹ-nche n'o lemẹ ụzọ, sị a ọ hụn ihiẹn ọwụlẹ lalanị ya ku.

⁷ Ọ hụn ụgbọ-ẹshin lẹ ẹshin ndị wẹ kwọngbama ẹbụọ-ẹbụọ hụn dọkpụnkọnị wẹ mọbụ ndị nyinkọ jaki mọbụ anyịnyan-mkpukpuke; ya we ẹnya ru alị ọhụnma-ọhụnma.”

⁸ Onyẹ-nche ahụn hụ e yi oro, a sị, “Diọkpa, m hụ a nọ elu-ụlọ nche ebeni e che nche ụhụọhịn-ụhụọhịn, m rịchanrịn ọnọdị-nche m uhinhin ọwụlẹ.

⁹ Lee ẹ, okẹnnyẹ ohu gi ụgbọ-ẹshin lala — lẹ ẹshin ndị wẹ kwọngbama ẹbụọ-ẹbụọ dọnkpụkọn'a. Ihiẹn ọ shịarị m wụ, ‘Babilọnụ a dangụọ! Mmọn ile wẹ kpụ e gungwọnpụgụọ tọ alị!’ ”

¹⁰ Euu, ọka m wẹ kụkpụkpọ, ndị nke m hụnjungụ ẹnya ebe wẹ nọ kụkpọ wẹ! Ihiẹn m rị a gwa ụnụ wụ ihiẹn m nụ ọnụ Osolobuẹ ihiẹn ile rị okpuru ẹ, ọnụ Chuku Izrẹlụ.

Ihiẹn Chuku Ku N'o K'e Mẹ Ẹdọm

¹¹ Ọnwan wụ ihiẹn Chuku ku banyeni Duma wụ alị Ẹdọm. Onyẹ ohu gha obodo Sẹẹ alị Ẹdọm hị m, “Onyẹ-nche, ebe eki fọnru? Onyẹ-nche, ebe eki fọnru?”

¹² Onyẹ-nche nọ sị, “Eki e d'e fọn, kanị uhinhin lalazị. Ị chọzị nị jụ, y'e kinhẹnzi d'a jụ.”

Ihiẹn Chuku Ku N'o K'e Mẹ Alị Arebịa

¹³ Ọnwan kẹ Chuku ku banyeni alị Arebịa: Ụnụ ndị Dedanị hụn a kwahunmẹni, hụn e ziẹntọ imẹ ọfịa Arebịa,

¹⁴ wẹhẹ ni mirin d'e ye ndị ẹkpịrị kpọ nkụn; ụnụ ndị hụn bi obodo Tẹma Arebịa, wẹhẹni ni ndị gbakọ ọsọ ihiẹn-oriri.

¹⁵ Wẹ gbakọnị ọpịa-agha — ọpịa-agha wẹ sepụhagụ lẹ ụta wẹ kwọngụ lẹ ihiẹn ya lẹ agha wị.

¹⁶ Lee ihiẹn Osolobuẹ gwa m: “Ahụa ohu gini d'a gụ — ahụa ohu wẹ gụn kẹ odibo rị e che n'o weri enwẹn ẹ dọn a gụn — ọghọ ile Kẹda nwẹn arịkọzị.

¹⁷ Ndị dikẹn ahụn ile a gbanị Kẹda ụta hụn bugbu nwan enwẹn wẹ ọda k'a họdụ akpụ madụ ole sụọ.” Osolobuẹ wụ Chuku ndị Izrẹlụ e kuọlẹ ẹ.