Azaya 11 - Ika

Isi Nke Mmanaị Agalaba Jese

¹ Mkpọgụn Jese họdụ alị k'a gbọrị, mkpọgụn a họdụ alị k'a gbọrị, wapụha agalaba; agalaba hụ k'a mị mkpụrụ.

² Mmọn Osolobuẹ k'a rị imẹ ẹ — Mmọn amamihiẹn lẹ nghọta; Mmọn ndụnmọdụn, Mmọn o gi e nwọn ikẹn; Mmọn o gi a marịn ihiẹn, Mmọn o gi a tụ egun Osolobuẹ;

³ ịgbaye Osolobuẹ k'a gha a sụọ a ụsụọ. O gikọ ihiẹn ẹnya a legha kin ikpe mọbụ gi ihiẹn ntịn a nụ han eṅẹn;

⁴ O k'e kinni ndị rị e ri ụya ọnụ; o k'a hannị ndị igbẹnnyẹ ụwanị ezigbo eṅẹn, ye wẹ ihiẹn runi wẹ. Mkpịnsịn rị a ọnụ k'o k'e gi gbu ụwanị; umẹrẹn rị a ụgb'ọnụ k'o k'e gi gbupụ ndị eje-omumẹ.

⁵ Ezi-omumẹ k'a wụ akpụkpọ-ukun ẹ, ịwụ onyẹ wẹ gi e dọn ẹnya a wụrụ nfifie o kẹnmẹ ukun.

Ogẹn Udọn Hụn Zu Oke

⁶ Eje-anụ wụ wofu lẹ nwa-atụnrụn k'e bigbama ogẹn hụ; liopadị lẹ ewu k'e dinẹgbama, nwa-efin lẹ nwa-ẹwọrọ lẹ mmụ anụ ndị ọzọ k'a nọgbama; nwa-ndu k'a rị e du wẹ.

⁷ Efin lẹ eje-anụ wụ biẹ k'a wị a kpa nni; ụmụ wẹ k'a gha e dinẹgbama, ẹwọrọ nkẹ k'a rị e ri ẹfịfịa kẹ okẹn-efin.

⁸ Nwa-ẹka k'a gha e gu egu ọnụ agwọ rị, nwa-ndu e budẹ ẹka che ẹkụ eje-agwọ rị.

⁹ Ịrụ-ẹhụ lẹ ntikpọ arịkọzị elu ugu nsọ m ile — makẹni ịmarịn-Osolobuẹ k'e jun elu-ụwa ile kẹ mirin dọn jun ohimin.

¹⁰ Ogẹn hụ, Mkpọgụn Jese ahụn jẹnkọ d'e suepụhanị k'a wụrụnị alị ichẹn-ichẹn ahịma wẹ tumẹni wẹ hụn w'e gi e dọn ẹnya; ndị alị ichẹn-ichẹn jẹnkọ d'e buruhẹ ẹ, ebe o bi jẹnkọ d'e nwọn ọghọ ọda-ọda.

¹¹ Ogẹn hụ, Osolobuẹ jẹnkọ d'a tịnpụ ẹka nke mgbe ẹbụọ, wekinhẹnzi ndị nke ẹ họdụnị hụn rịsọnmẹ Asiria, Ijiptu ndịdan Iyi Naịlị, Ijiptu Ibe-elu wụ Patrọsị, Ẹtiopịa, Ẹlam, Shina wụ Babilọnụ, Hamatị lẹzi alị ndị teni rị mkpẹnrẹn ohimin.

¹² O k'e weshi ahịma elu zinmẹni alị ichẹn-ichẹn, gi wegbama ndị Izrẹlụ wẹ kpụnrụn, welụa wẹ; o k'a gha ẹbamịn ẹnọ ụwa wegbama ndị Juda feyịyanị.

¹³ Ẹnya afụkọzị Ifrem; Ndị rị e kpokpo Juda k'a gụ; ẹnya Juda afụkọzị Ifrem, Juda egikọzị iwe e sọn Ifrem.

¹⁴ Wẹ ẹbụbụọ k'a wị maye ndị Filistia ndị bi mkpọtu òke ẹbamịn Ọdịdan-ẹnyanwụn, wịzị d'a maye ndị rị nkọ ọwụwa-ẹnyanwụn, kwarị ihiẹn wẹ. Wẹ k'e mẹ Ẹdọm lẹ Mụabụ ihiẹn; ndị Amọnụ k'a rị okpuru wẹ.

¹⁵ Osolobuẹ k'e mẹ Ohimin Ufie hụn rị ẹhụ Ijiptu kọrọhị; o k'e fezikwọ ẹka a, fe ufere rị a nụ ọkụn ye elu Iyi Yufretisi, kebe ẹ ụzọ ẹsa hụn w'e gi gidẹ akpụkụ mmaka fetu ẹ.

¹⁶ Ụzọ shịanị k'a rịnị ndị nke ẹ họdụnị — hụn wẹ k'e gi gha Asiria pụha, k'o dọn rịnị ndị Izrẹlụ ogẹn wẹ gi gha alị Ijiptu pụha.