O̩la E̩bite 18 - O̩TAKADA O̩LA O̩JO̩ 1970

Ewo lile le̩ lewane̩

¹ Anubi e̩wñ-i u li onuche̩ omune̩ kʼi agwo̩ru kwʼefojale, i chenʼo̩da nana; oñ ane̩ ile̩ mune̩ pee ef oji-ma-wñ.

² Oñ i nʼomu ki gbo̩ka kwa kakini, I lewane̩! Babilo̩n lile le̩ lewane̩ me̩, oñ i mud ugbo kʼamebili adodo, kpʼile̩ amafu du ku ma ma de̩ hiolo n, kpʼile̩ ame̩we̩ du ku ma ma de̩ hiolo n kʼulaka-ma achʼone̩;

³ todabu kʼabo uche̩ichi du fʼo̩te̩ wain e-e̩do̩fulu abutabu-wñ che ñmo̩ me̩, amonu ane̩ ile̩ la bʼo̩ chʼabutabu, oñ amachinyama ane̩ ile̩ mud anana kwef ukpahiu ura-wñ kʼi ali.

⁴ Tak u gbʼomuko̩la omune̩ kʼi aka kwʼefojale kakini, Amone̩-mi, me̩ kwʼef uwñ dufu wa, todu ku me̩ ki we etuta ef adure-wñ, todu ku me̩ ki we e̩gba e̩wñ kwef uchobi-wñ;

⁵ todabu kʼadure-wñ nʼe̩dʼomune̩ gbogbo kad efojale, O̩jo̩ la fʼuji-wñ rewa me̩.

⁶ Alu kʼi ko ñw one̩ me̩ ko ñw u koji, alu kʼuko̩lo̩-wñ de̩ me̩ ko ñw u teju-wñ onu meji; ef ago kʼi fʼe̩wñ gwe̩gwa nyʼu ñw one̩ me̩ ki fʼe̩wñ gwe̩gwa nyʼago e-le̩ onu meji ñw owñ.

⁷ Alu du kʼi dojima ñw o̩la-wñ kʼi laño̩ gugu ali ura, alu le̩ me̩ nadʼuwa kpʼaido̩ eda ñw owñ. Todabu kʼi aka ef e̩do̩-wñ kakini, Ugugu onu onobule̩ u gugu-i, u la chʼo̩yaukuo̩ko̩ n, i la nʼugbo du kʼeju-mi adʼedaido̩ n.

⁸ Lef e-kide̩ oñ uchobi-wñ awa o̩jo̩ʼkate, owñ chʼuku kpʼedaido̩ kpʼukpo̩ta, ma la anʼuna fʼu gujo rinyo̩, todu Ondu O̩jo̩ kʼi fʼajo̩-wñ ka da chʼegbiñmi.

⁹ Tak amonu ane̩ ile̩ ku ma bʼo̩ chʼabutabu ku ma ño̩ gugu ali ura kpʼowñ araku ma la akʼo̩wo̩ fiʼe̩do̩ tod owñ, owñ chʼe̩gba ku ma li odudu ejo-wñ,

¹⁰ ma adago jʼo̩najiji tod ailo uwa-wñ akakini, Atogwo, atogwo, ewo lile le̩, Babilo̩n, ewo ki gbiñmi! Todabu ki chʼef auwa okate oñ oj ajo̩-we̩ kpa-i.

¹¹ Oñ amachinyama ane̩ ile̩ araku ma la adaido̩ tod owñ, todabu kʼe̩ne̩ du ma ñʼala e̩wñ aja-ma ge̩ n;

¹² adu e̩wñ aja-ma chʼo̩jamalia kpʼajifa kpʼokuta akoko kpai pure̩l kpʼukpo line̩n ki nyo̩ kpʼe-odufa ekpikpa kpʼisiliki, kpʼekpikpa, kpʼoli taine chaka, kpʼe̩wñ eku du ku ma nʼenyi adagba che, kpʼe̩wñ eku du ku ma nʼoli o̩me̩me̩le̩ che, kpʼe-udo̩ kpʼe-ebije, kpʼe-marbe̩l

¹³ kpai sinamo̩n kpʼe̩wñ ido̩ro̩ kpʼotulale kpʼekpo ku ma du kurʼo̩la kpai frankinse̩ns kpʼomi achiwebe̩te̩ma kpʼekpo kpʼomu te̩ke̩ te̩ke̩ kpʼo̩ka wit kpʼamokuno̩ kpʼamala, kpʼamanya, kpʼo̩ko̩ kʼanya afo̩ kpʼaño̩la one̩, kpʼamonugo amone̩.

¹⁴ Oñ e̩ro kʼonugo-we̩ che̩ño̩-wñ le̩ kwo bʼuwe̩ te̩ me̩, kpʼe̩wñ e̩mucha kpʼe̩wñ ki adojiji du lenyo̩ bʼuwe̩ te̩ me̩; i nʼugbo du ku ma ñʼali-i ge̩ n!

¹⁵ Abo ku ma chinyama e̩wñ-i ku ma mud anana lugbo-wñ adago o̩najiji tod ailo uwa-wñ ku ma ra, ma ajʼaraku kpʼaido̩ eda,

¹⁶ ma akakini, Atogwo, atogwo, ewo inaina-i e-ki dʼukpo line̩n ki nyo̩ kpʼodufa ekpikpa kpʼekpikpabʼo̩la-wñ ma, kʼi laño̩ nʼo̩jamalia kpʼokuta akoko kpai pure̩l cho̩ñwe̩nyʼo̩la-wñ!

¹⁷ Todu auwa okate oñ e̩wñ anana abe̩-i mud alache̩-i. Tak e̩ne̩ du kʼi añʼo̩ko̩ o̩na kpʼamagwo̩ko̩ kpʼe̩ne̩ du kʼi atʼo̩ko̩ nyʼule̩ kpʼaluka one̩ du ku ma chuko̩lo̩ ej ohimini kwodago o̩najiji,

¹⁸ oñ abu ku ma li odudu ejo-wñ, ma kwa kakini, E̩wñ dab ewo inaina-i?

¹⁹ Taku ma fʼebutu gba nyʼo̩la-ma oji oñ ma kwukwa, ma raku, ma daido̩, ma kakini, Atogwo, atogwo, ewo inaina-i, e-kʼabo du ku ma nʼo̩ko̩ ej ohimini mud anana ef uwñ kwef e̩wñ akoko-wñ! todu auwa okate oñ i mud alache̩.

²⁰ Me̩ nagwoguyo̩ rʼowñ oji, uwe̩ efojale kpʼame̩ abo kiafo̩ kpʼame̩ ame̩nukpuche̩ kpʼame̩ amakache̩, todabu kʼO̩jo̩ fʼajo̩ e-me̩ ka nʼowñ oji.

²¹ Tak onuche̩ʼka ki gbiñmi mʼokuta ki dab okuta une̩wñ lile du, oñ i mʼu durikpolo tef ohimini, i kakini, Abe̩i ma adu Babilo̩n ewo inaina le̩ akpulu rikpolo gwomʼane̩, i la nugbo ku ma ñʼali ge̩ n.

²² Oñ i nugbo du ku ma ñʼagbo̩ omuko̩la abo ku ma nʼumolo, kpʼamakeli kpʼabo ku ma fa o̩kpachine̩ kpʼabo ku ma fa o̩kakachi ef uwe̩ ge̩ n; i la nugbo du ku ma ali achʼo̩na du ef uwe̩ ge̩ n; ma ñagbʼekuku okuta-une̩wñ ef uwe̩ ge̩ n.

²³ I la nugbo du kʼugane̩ agege atejugede ef uwe̩ ge̩ n; i nugbo du ku ma ñʼagbo̩ omuko̩la o̩ko̩ya-etito̩ kpʼo̩ya etito̩ ef uwe̩ ge̩ n; todabu kʼamachinyama e-we̩ chʼame̩ne̩lile ane̩-ile̩; todabu kʼe̩wñ obochi-we̩ mʼabo uche̩ichi du ko la.

²⁴ Oñ ma ño̩ fʼe̩bie̩ amakache̩ kpʼe-abo kiafo̩ kpʼe-abo du ku ma kpa ane̩-ile̩-i li ef uwñ.