Izikie̩l 18 - O̩TAKADA O̩LA O̩JO̩ 1970

Onugo e̩ne̩ ki dure aku

¹ O̩la Jihofa ño̩ wʼugbo mi ge̩ kakini,

² E̩wñ chʼofe-wñ ku me̩ kpa ita-i ugbo ane̩ Israe̩l kakini, Ama-ta fʼe̩ro achiwebe̩te̩ma e̩ka je̩, oñ enyi abimo̩to̩ akpijele ta?

³ Oji-mi, Ondu Jihofa ka-i, me̩ ñʼanʼugbo ku me̩ akpʼita-i oj ane̩ Israe̩l ge̩ n.

⁴ Me̩ go, amonugo one̩ du chʼe-mi; alu kʼonugo ata chʼe-mi abe̩le̩ onugo o̩ma ño̩ de̩: onugo one̩ ki dure, owñ le̩ aku.

⁵ Iche̩wñ kʼone̩ chʼe̩no̩kpakpa, kʼi la ache e̩wñ kʼo̩da je̩ kpʼe̩wñ ki chʼeju-wñ,

⁶ kʼi ma la fʼe̩wñ je̩ oj uwo uwo-i n, kʼi ma la dʼeju go ode ode abunyi Israe̩l in, kʼi ma la kpʼoya ekeji-wñ bie̩ n, kʼi ma la te̩me̩rʼonobule̩ kʼo̩la-wñ daji n,

⁷ kʼi ma la chʼe̩ne̩ du ihianyi n, kʼi muda dabi dʼe̩wñ uhiowe̩ ñw e̩ne̩ ki nʼowñ o̩me̩, kʼi ma la dʼe̩wñ du inya n, kʼi mʼuje̩wñ-wñ ko ñw abo kʼebi akpa ma, kʼi laño̩ kʼe̩wñ o̩la bʼabo ku ma tago ofo o̩la ma;

⁸ e̩ne̩ kʼi ma dʼo̩ko̩ ta n, kʼi ma la gbʼile n, kʼi mʼo̩wo̩-wñ gwo̩ bʼuji eche te̩, kʼi la fʼale ochochi da agbagba one̩ meji,

⁹ kʼi te̩talule̩ ef e̩wñ uhio̩me̩-mi, kʼi la fʼalu kʼoji ajo̩-mi ka de, kʼi ache ochochi; e̩ne̩ le̩ chʼo̩kpakpa, i adeju chuu, Ondu Jihofa ka-i.

¹⁰ I muda che̩wñ kʼi fʼo̩ma e̩ne̩ke̩le̩ bi kʼi mud adinya, abe̩k akpone̩, kʼi la achʼo̩maye-wñ e̩wñ-i okate,

¹¹ kʼi ma la ade e̩wñ-i chaka n, kʼi muda aje̩ e̩wñ oj uwo oj uwo, kʼi la fʼo̩ya ekeji-wñ kpabie̩,

¹² kʼi la chʼame̩no̩bata kpʼame̩nale ihianyi, kʼi adʼinya, kʼi ma la adʼe̩wñ ku ma du hiʼo̩ o̩wo̩ dabi wa ñwu ma n, kʼi la dʼeju-wñ gʼode ode, kʼi la fʼe̩wñ ihje̩ne̩ che,

¹³ kʼi la dʼo̩ko̩ ta kʼi jʼile—e̩ne̩ abe̩-i ñʼadeju? i adeju n; i fʼe̩wñ ihie̩ne̩-i du che me̩; eku i aku chuu, e̩bie̩-wñ anʼoji o̩la e-wñ.

¹⁴ E la go, iche̩wñ kʼi fʼo̩ma e̩ne̩ke̩le̩ bi kʼi fʼe̩wñ adure du kʼata-wñ che li, kʼi arailo, kʼi ma la che abe̩le̩ n;

¹⁵ kʼi ma je̩ e̩wñ oj uwo oj uwo n, kʼi ma la dʼeju go ode ode abunyi Israe̩li n, kʼi ma fʼoya ekeji-wñ kpabie̩ n,

¹⁶ i la che e̩ne̩ du ihianyi n, i la gba e̩wñ uhi-o̩wo̩ du n, i la dʼe̩wñ du inya n, i muda kʼuje̩wñ-wñ ñw abo kʼebi akpa ma, i la kʼe̩wñ o̩la bʼabo ku ma tago ofo o̩la ma;

¹⁷ kʼi ma hi o̩wo̩ mʼame̩no̩bata n, kʼi ma gbʼo̩ko̩ ugwo̩la n, kʼi la gbʼo̩ko̩ oji n, kʼi fʼe̩wñ che teju alu kʼoji ajo̩-mi ka, kʼi te̩talule̩ ef e̩wñ uhio̩me̩-mi; i aku tod udu kʼata-wñ fe̩ n, edeju i adeju chuu.

¹⁸ I chʼe-ata-wñ, todabu kʼi chʼone̩ o̩lachi, kʼi la fʼe̩wñ o̩maye-wñ dinya, kʼi la fʼe̩wñ ki ma nyo̩ n che ef abo-wñ, go eku i aku ef abi-wñ kʼi je̩ le̩.

¹⁹ Me̩ muda kakini, E̩wñ chi kʼo̩ma ma anʼadu udu kʼata-wñ fe̩ n? E̩gba kʼo̩ma le̩ fʼe̩wñ che tʼeju o̩da kʼi chʼe̩wñ o̩kpakpa, kʼi la fʼe̩wñ uhio̩me̩-mi du de, kʼi laño̩ fʼu che, edeju i adeju chuu.

²⁰ Onugo e̩ne̩ ki dure, onugo le̩ aku: o̩ma anʼudu ata-wñ n, ata la anʼudu o̩ma-wñ n. O̩kpakpa e̩no̩kpakpa bʼe̩no̩kpakpa le̩ ma, oñ e̩wñ bibi e̩ne̩bibi abʼe̩ne̩bibl le̩ ma.

Uku e̩ne̩bibi rʼO̩jo̩ e̩do̩ n

²¹ I muda che̩wñ kʼe̩ne̩bibi murida bʼe̩wñ adure du kʼi che te̩, kʼi la fʼe̩wñ uhio̩me̩-mi du de, kʼi la ache e̩wñ ki chʼeju o̩da kpʼe̩wñ o̩kpakpa, edeju i adeju chuu, i aku n.

²² Ma ñʼarewa ada du kʼi je̩ ku ma dʼu gwunyʼu ge̩ n: i adeju ef e̩wñ o̩kpakpa kʼi che.

²³ Uku ame̩ne̩bibi nyo̩ mi eju re? Ondu Jihofa ka-i; kʼi ma chʼedabi bʼo̩na-wñ te̩ kʼi deju n?

²⁴ Oñ e̩gba kʼe̩no̩kpakpa muna bʼe̩wñ o̩kpakpa-wñ te̩ kʼi la akwochʼe̩wñ uji, kʼi nache teju e̩wñ ihie̩ne̩ du kʼe̩ne̩bibi ache, i adeju? Ma ñʼarewa e̩wñ o̩kpakpa du kʼi che n: ef e̩re̩ ubi kʼi ro̩ ñwu mi kpʼef adure kʼi ta oñ i aku ef uwñ.

²⁵ Me̩ muda kakini, O̩na Ondu chʼokujo̩ n kpo̩. Me̩ gbo̩ ta, O abunyi Israe̩l: o̩na-mi chʼokujo̩ n? I chʼo̩na e-me̩ ma chʼokujo̩ n in?

²⁶ E̩gba kʼe̩no̩kpakpa muna bʼe̩wñ o̩kpakpa-wñ te̩ kʼi la akwoche e̩wñ uji, kʼi la ku ef uwñ, i aku ef e̩wñ uji kʼi che le̩.

²⁷ Omune̩ de̩ ge̩: e̩gba kʼe̩ne̩bibi murida bʼe̩wñ bibi kʼi che te̩, kʼi la ache e̩wñ teju o̩da kpʼe̩wñ o̩kpakpa, i agbʼonugo o̩la-wñ ki deju.

²⁸ Todabu kʼi fʼibe-wñ kpe̩, oñ i murida bʼada du kʼi je̩ te̩ edeju i adeju chuu, i aku n.

²⁹ Abunyi Israe̩l muda kakini, O̩na Ondu chʼokujo̩ n kpo̩. O abunyi Israe̩l, o̩na o̩na-mi chʼokujo̩ n? i chʼo̩na o̩na e-me̩ ma chʼokujo̩ n in?

³⁰ Todule̩ ami akajo̩ me̩, O̩ abunyi Israe̩l, nakajo̩ e̩ne̩ne̩ne̩ne̩ teju alu kʼo̩na o̩na-wñ de̩, Ondu Jihofa ka-i. Me̩ mudabi wa ku me̩ rida bʼada du ku me̩ je̩ te̩, todu kʼudu efe̩ ki wo echʼe̩wñ uke̩re̩-me̩.

³¹ Me̩ mʼada du ku me̩ te̩taje̩ le̩ ko rinyo̩ bʼo̩la-me̩ te̩, ku me̩ fʼe̩do̩ etito̩ kpʼafu etito̩ che ñw o̩la-me̩! E̩wñ chi ki dʼume̩ e̩do̩ kʼame̩ aku. O abunyi Israe̩l?

³² Todu uku e̩ne̩ ki aku nyo̩ mi eju re n, Ondu Jihofa ka-i; todule̩ me̩ ki rʼo̩la-me̩ da ku me̩ deju.