E̩zra 4 - O̩TAKADA O̩LA O̩JO̩ 1970

Ame̩no̩la-ma fʼuma dahi

¹ Oñ e̩gba kʼabo ku ma che Juda kpai Be̩njamin o̩pe̩cha gbo̩ ka kʼamo̩ma amu le̩ jo̩ akʼunyi ñwu Jihofa, O̩jo̩ Israe̩l,

² ma te̩ me̩ru Zerubabe̩l, kpai amata ku ma dʼoji dufu le̩, oñ ma ka ñwu ma kakini, A abʼume̩ kʼunyi; todu a tene O̩jo̩-me̩ alu ku me̩ tene owñ; a te̩tʼakpa e̩wñ e̩bie̩ ñw u akwʼiko E̩zar-hadon, onu Asiria, e-ki ko wa wʼemi le̩.

³ Ama Ze̩rubabe̩l kpai Je̩shua kpai abo ki bo̩ ef amata ku ma dʼoji dufu Israe̩l, ka ñwu ma kakini, O̩wo̩-me̩ dʼef uko̩lo̩ unyi eko̩ ñw O̩jo̩-wa kpai awa n; awa o̩to̩to̩la-wa kate akʼo̩ ñwu Jihofa, O̩jo̩ e-Israe̩l, alu ki Sairo̩s onu Pe̩rsia ñwa ñwu wa.

⁴ Tak amone̩ ane̩ le̩ fʼamone̩ Juda le̩ o̩wo̩ bulo̩, ma chane̩ echʼuma e̩do̩ ñwañwala tod unyi ku ma ko̩ le̩.

⁵ Taku ma fʼo̩gu che ñw amulo̩la tʼuma o̩la, ku ma kpʼo̩na nyʼuma o̩jo̩ du ki Sairo̩s onu Pe̩rsia deju, gbogbo taku Darius wa jʼonu Pe̩rsia.

⁶ Tak iko onu Ahasue̩rus, abu kʼi jʼonu ababa, ma fʼo̩takada ko̩ agwajo̩ nʼabo ku ma dodo Juda kpai Je̩rusale̩m.

⁷ Oñ ef o̩kpanachi Artaze̩rksis, Bishlam kpai Mitre̩dat kpai Tabee̩l kpai ame̩numana-ma ki bo̩, fʼo̩takada ko̩ ru Artaze̩rksis, onu Pe̩rsia; ma fʼo̩takada le̩ ko̩ alu kʼabo Siria ako̩ kpai ichi Siria ge̩.

⁸ Rehum, kʼi chʼagboji amatohio̩la, kpai Shimshai, ako̩takada, fʼo̩takada ko̩ rʼonu Artaze̩rksis nyu abo Je̩rusale̩m abe̩le̩—

⁹ Taku Rehum, agboji amatohio̩la, kpai Shimshai, ako̩takada le̩, kpai ame̩numana-ma ki bo̩, owñ chʼabo Daine kpʼabo Afarsat kpʼabo Tarpe̩l kpʼabo Afar kpʼabo Arkefai kpʼabo Babilo̩n kpʼabo Shushan kpʼabo Deha kpʼabo Elam

¹⁰ kpʼabo uche̩ichi kibo̩ e-kʼe̩ne̩lile kpai e̩nojima ku ma do̩ ko̩ Osnappar ko daba wa gugu ef ewo Samaria, kpʼojane̩ kibo̩ ejudaba ohimini le̩, kpʼe-ki bo̩.

¹¹ Alu ku ma ko̩ nyʼef o̩takada ku ma du kpuche̩ rʼArtaze̩rksis kʼi chʼonu le̩ de̩, kakini, Amadu-we̩, kʼa chʼabo udaba ohimini, abe̩le̩ abe̩le̩.

¹² Onu ki ma kakini, amaju ku ma kwugbo we̩ wa le̩, ma lewa ugbo wa Je̩rusale̩m; ma jʼemi ane ewo ugbite̩re̩ ki bie̩ne̩ le̩, ma la fʼaku-wñ ne kpa me̩, ma la fʼe̩re̩ ane̩ e̩re̩ ane̩-wñ ñwo̩che lale me̩.

¹³ Onu ki nama fai kakini, Iche̩wñ ku ma fʼewo-i ne, ku ma fʼaku-wñ ne kpa, ma jʼadʼo̩ko̩ are̩ kpai o̩ko̩ ane̩ kpai o̩ko̩ ku ma bu ñwu ma wa n; ukpoji-wñ abie̩ne̩ ñw amonu.

¹⁴ Fai todabu kʼa afʼomu unyi onu na, i la chʼeju-wñ ñw a kʼa li ku ma chi onu ukata n, todule̩ oñ a kpe̩ uche̩ wa arʼonu aino̩-i;

¹⁵ ku ma ki natejane̩ ef o̩takada iko e̩wñ amata-we̩ le̩; abe̩le̩ tak uwe̩ ali ef o̩takada iko e̩wñ le̩ alu kʼewo-i chʼagbite̩re̩, kʼi akpʼe̩wñ amonu bie̩, kpai e̩wñ ojane̩ ojane̩, kʼama la dʼamone̩ utu ku ma la gbʼo̩la-ma tane̩ igbelegbele, e̩wn ki chi ku ma fʼewo-i gwʼalache̩ te̩ le̩ de̩.

¹⁶ A agbʼibenu ñw onu kakini, Ma fʼewo kide̩ ne, ku ma la fʼaku-wñ ne kpa, lu-gbo kide̩ uwe̩ añʼanʼukpe̩ du ejudaba ohimini-i n.

¹⁷ Tak onu mʼohi-wñ du kpuche̩ ru Rehum, agboji amatohio̩la, kpai Shimshai, ako̩takada le̩, kpai abo umana-ma ku ma dodo Samaria, kpai ugbo ki-bo̩ ejudaba ohimini le̩ kakini, I ra ñw me̩ kpoo̩, abe̩le̩, abe̩le̩.

¹⁸ Ma fʼo̩takada ku me̩ du kpuche̩ rʼuwa le̩ kalata jʼane̩ o̩gba-mi pee.

¹⁹ Tak u dʼo̩da te̩, ma fu tejane̩ me̩, oñ ma fu li ka kʼewo le̩ kwane̩ tʼamonu o̩la igbele, kʼugbite̩re̩ kpai utu ku ma gbʼo̩la-ma tane̩ da ewo le̩ akwoubi.

²⁰ Amonu ki gbiti nʼo̩da Je̩rusale̩m igbele, ma ño̩ nʼo̩da udaba ohimini le̩ chaka, abo kibo̩ la dʼo̩ko̩ are̩, kpʼo̩ko̩ ane̩, kpʼo̩ko̩ ku ma bu ñwu ma ñw amonu le̩.

²¹ Me̩ ki dʼo̩da te̩ ku me̩ je̩ ñw abo-i we, kʼama we ekʼunyi ewo kide̩, gbogbo tak u dʼo̩da-wñ te̩.

²² Me̩ fʼo̩la mu, me̩ ki la bʼo̩wo̩ lo̩ ef e̩wñ-i n: e̩wñ chi kʼe̩wñ akpabie̩ abe̩i, kʼofu ki bʼamonu?

²³ Tak e̩gba ku ma fʼo̩takada onu Artaze̩rksis ku ma da le̩ kalata o̩gba Rehum, kpai Shimshai ako̩takada, kpʼame̩numana-ma, ma hio̩wane̩ te̩gu nyi Je̩rusale̩m ugbo amaJu, ma nʼukpahiu o̩wo̩-ma je̩ ñwu ma we.

²⁴ Tak uko̩lo̩ unyi O̩jo̩ kʼi de̩ Je̩rusale̩m chi; oñ i chi gbogbo wʼo̩do̩ ekeji ki Darius jʼonu Pe̩rsia.