E̩sta 9 - O̩TAKADA O̩LA O̩JO̩ 1970

AmaJu fʼame̩nebi-ma kpa

¹ Oñ ochu e̩ke̩gweji, owñ chʼochu Adar, o̩jo̩ e̩ke̩gwe̩ta ochu le̩, e̩gba kʼo̩da kʼonu ñwa kpai o̩la kʼi dute̩ me̩ru eche, o̩jo̩ kʼame̩nebi amaJu kibeno ka kʼama anʼo̩da-ma, (o̩la le̩ muda murida ojoji, oñ amaJu nʼo̩da abo ku ma chulaka ma,)

² tak amaJu kʼo̩la-ma jeju jo̩ ewo ewo-ma ugbo du ojane̩ ojane̩ onu Ahasurus chaka, ku ma gwo̩nyʼabo ku ma tene eche ma e̩bie̩ne̩. E̩ne̩ du la bʼuma jo̩ n, todu ailo-ma kwobʼamone̩ du ma.

³ Oñ amagboji ojane̩ ojane̩ chaka, kpai amakomonu kpai amigobina kpai abo ku ma chʼuko̩lo̩ onu, bʼamaʼJu che, todabu kʼailo Morde̩kai bʼumama.

⁴ Todu Mo̩rde̩kai chʼe̩ne̩lile ef unyi onu, uwohi-wñ le̩ dufu tʼojane̩ ojane̩ chaka; todu e̩ne̩ ku ma do̩ ko̩ Mo̩rde̩kai le̩ nanana alo waa.

⁵ Oñ amaju nʼo̩kwo̩chageli chaka kpai one̩ ekpa kpai echile̩che̩ gwʼame̩nebi-ma chaka dajane̩; oñ ma che abo ku ma chulaka ma e̩wñ du ki dʼuma e̩do̩.

⁶ Efu Shushan, unyi onu le̩, amaJu fʼone̩ oli me̩gwa kpa, ma fʼuma chile̩che̩,

⁷ manyu Parshandata kpai Dalfon kpai Aspata

⁸ kpai Porata kpai Adalia kpai Aridata

⁹ kpai Parmashta kpai Arisai kpai Aridai kpai Faizata.

¹⁰ Ma fʼamo̩ma e̩ne̩ke̩le̩ Heman o̩ma Hamedata, e̩ne̩ ki kobʼamaʼJu le̩ me̩gwa kpa; ma muda do̩wo̩-kadʼane̩-ma n.

¹¹ O̩jo̩ le̩ ma ño̩ mʼaluka one̩ ku ma kpa efu Shushan unyi onu du ka ñw onu.

¹² Tak onu ka ñw E̩sta o̩ya-wñ kakini, AmaJu fʼaboke̩le̩ oli me̩gwa kpa efu Shushan unyi onu-i, manyʼamo̩ma Heman me̩gwa le̩. Abu e-kʼuma che ojane̩ ojane̩ onu ki bo̩ ade̩? E̩wñ chʼebi kʼe̩ ñʼabi ge̩? Ma la adʼu ñw e̩. E̩wñ chʼe-kʼe̩ ñʼatene manyʼu ge̩? Ma la ache.

¹³ Tak E̩sta kakini, Iche̩wñ ki rʼonu e̩do̩, e̩ je̩ ñwu ma dʼo̩da ñw amaJu ku ma jo̩ Shushan ku ma ño̩ che alu kʼo̩da e-eñini de̩ o̩na ge̩. Kʼe̩ laño̩ je̩ ñw ma kʼamo̩ma Heman me̩gwa lo̩ko̩li oku le̩.

¹⁴ Tak onu ñwañwu ma ku ma fʼabe̩le̩ che, ma ño̩ dʼo̩da le̩ wʼane̩ Shushan; oñ ma kʼamo̩ma Heman me̩gwa le̩ lo̩ko̩li.

¹⁵ Tak amaJu ku ma jo̩ Shushan ño̩ kʼo̩la-ma jeju o̩jo̩ e̩ke̩gwe̩le̩ ochu Adar ge̩, oñ ma fʼaboke̩le̩ oli me̩fa kpa Shushan; ma muda do̩wo̩kadʼane̩-ma n.

¹⁶ Oñ amaJu ki bo̩ ku ma jʼojane̩ ojane̩ onu le̩kʼo̩la-ma jeju ku ma jadu ojima, taku ma nʼuñmi ugbo ame̩ne̩bi-ma, ma la kpʼone̩ icham nyʼo̩gwo̩ko̩ u-gbo e̩te̩gwa nyoke me̩lu kwef abo ku ma chʼulaka-ma; ma muda do̩wo̩kadʼane̩-ma n.

¹⁷ O̩jo̩ e̩ke̩gwe̩ta ochu Adar ma che-i; taku ma kwoñmi o̩jo̩ e̩ke̩gwe̩le̩-wñ, oñ ma dʼu chʼojo uje̩wñ eje̩ kpai e̩do̩ e̩bo̩.

¹⁸ Ama amaju ku ma jo̩ Shushan kʼo̩la-ma jeju o̩jo̩ e̩ke̩gwe̩ta-wñ kpai o̩jo̩ e̩ke̩gwe̩le̩-wñ; tak o̩jo̩ e̩ke̩gwe̩-lu ochu le̩ ma ñmi, oñ ma mʼu du chʼo̩jo̩ uje̩wñ eje̩ kpai e̩do̩ e̩bo̩.

¹⁹ Todule̩ amaJu adogbe adogbe ku ma dodo ewo ewo ki ma nʼaku n, adʼo̩jo̩ e̩ke̩gwe̩le̩ ochu Adar chʼo̩jo̩ e̩do̩ e̩bo̩ kpai uje̩wñ eje̩, kpai o̩jo̩ e̩nyo̩ ku ma kʼe̩wñ kpuche̩ rʼo̩la-ma.

Ujeju uyo̩ Purim chane̩

²⁰ Taku Mo̩rde̩kai fʼe̩wñ le̩ ko̩ rʼef o̩takada, oñ i mʼo̩takada le̩ ko kpuche̩ rʼamaJu chaka ku ma jʼojane̩ ojane̩ onu Ahasurus tʼabo ku ma me̩ru tʼabo ku ma jʼo̩najiji,

²¹ kʼi dʼu dago ñwu ma ku ma fʼo̩jo̩ e̩ke̩gwe̩le̩ ochu Adar de, kpai o̩jo̩ e̩ke̩gwe̩lu-wñ ge̩, o̩do̩ o̩do̩,

²² abu kʼi chʼo̩jo̩ kʼamaJu ñmi ñw ame̩nebi-ma, kpai ochu ku ma rida ñwu ma kwef e̩do̩dudu tef e̩do̩ e̩bo̩, kpai akwo edaido̩ tef o̩jo̩ e̩nyo̩; kʼama ki che kʼo̩jo̩ meji le̩ ki chʼo̩jo̩ uje̩wñ eje̩ kpai e-e̩do̩ e̩bo̩ kpai o̩jo̩ ku ma kʼe̩wñ kpuche̩ rʼo̩la-ma, kʼama ki chʼame̩nale ele.

²³ Tak amaJu mʼu gba ku ma che alu ku ma chane̩ eche le̩, kpai alu ki Mo̩rde̩kai kʼo̩lubutu ñwu ma.

²⁴ Todabu ku Heman o̩ma Hamedata, e̩ne̩ Egag, kʼi akobʼamaJu chaka, ñwa nyʼamaJu kʼi fʼuma kpabie̩ rinyo̩, kʼi laño̩ fu pur le̩ ro̩, owñ chʼifa-wñ kʼi abo̩, kʼi fʼuma lie̩, kʼi laño̩ fʼuma kpabie̩ rinyo̩;

²⁵ ama e̩gba kʼo̩la le̩ lewʼo̩gba onu, i fuñwa ñwu ma lef o̩takada kʼe̩wñ bie̩ne̩ kʼi ñwa nyʼamaJu le̩ ki mudabi abʼoji-wñ onugo ma, ku ma ño̩ mʼowñ kpai amo̩ma-wñ ko kpa oku.

²⁶ Todule̩ ma fʼodu o̩jo̩ meji le̩ do̩ ko̩ Purim, alu kʼodu pur de̩. Todule̩, tod o̩la ki dʼef o̩takada-i du, kpai e̩wñ du ku ma li ugbo e̩wñ-i, kpai e̩wñ ki wʼugbo ma le̩,

²⁷ amaju mudu dago, ma mugba nʼo̩la-ma kpʼamugbe̩-ma kpʼabo du ku ma kʼo̩la-ma dama kpʼama oji, todu ki we enʼuda, kʼama ki de o̩jo̩ meji le̩ alu kʼolubutu-wñ de̩, alu kʼiko-wñ ku ma date̩ de̩ o̩do̩ o̩do̩,

²⁸ kʼama ki rewa iko le̩ ku ma ki fʼu de gbogbo nyʼo̩hio̩gu-ma, o̩lo̩pu o̩lo̩pu du, ojane̩ du, kpai ewo du, kʼo̩jo̩ Purim ki de̩ ki we̩ ekpachi ef amaJu, kʼure-wa-wñ ki we enʼuda ef amugbe̩-ma ge̩.

²⁹ Tak E̩sta, o̩ya onu, kʼi chʼo̩ma Abihail, kpai Mo̩rde̩kai e̩ne̩Ju le̩, fʼo̩la ko̩ nyʼo̩takada kpaka adʼo̩la o̩takada Purim ekeji le̩ lonyane̩.

³⁰ Abe̩le̩ i mʼo̩takada ko kpuche̩ rʼamaju chaka, ojane̩ ojane̩ onu Ahasurus o̩gbo̩ me̩fa nyoke mebie le̩, o̩la-wñ chʼure̩do̩ kpai e-ochochi,

³¹ ku ma ki fʼo̩jo̩ Purim le̩ lonyane̩ iko iko-wñ ki chʼe̩date̩ alu ku Mo̩rde̩kai e̩ne̩Ju le̩ kpai E̩sta, o̩ya onu, du dago ñwu ma kpai alu ku ma du dago ñw o̩la-ma kpai todu amugbe̩-ma ge̩, ugbo o̩la alueji kpai aku ku ma ro̩ le̩.

³² Oñ o̩la kʼE̩sta ka le̩ fʼe̩wñ Purim le̩ lonyane̩; taku ma fʼu ko̩ rʼef ibuku.