Ekaluka 23 - O̩TAKADA O̩LA O̩JO̩ 1970

Belam chane̩ ekache̩

¹ Oñ Belam ka ñw Bele̩k kakini, E̩ fʼubo̩ iche̩bo̩ mebie ne ñw mi emi, kʼe̩ la fʼamo̩kokuno̩ mebie kpai amokolo mebie ñwo̩che jo̩ ñw mi emi.

² Oñ Bele̩k che alu ku Belam ka le̩; taku Bele̩k kpai Belam mʼo̩kokuno̩ʼka kpai okoloʼka ko che iche̩bo̩ oji ubo̩ iche̩bo̩ le̩ okoke lale.

³ Taku Belam ka ñw Bele̩k kakini, Kwodago ugbo iche̩bo̩ e̩gujo-we̩ le̩, oñ nalo; ikani Jihofa awa de kpai omi; e̩wñ du kʼi adu ña mi naka ñw e̩. Tak i nyʼoj oteteʼka.

⁴ O̩jo̩ la de kpai Belam; oñ Belam ka ñw u kakini, U fʼubo̩ iche̩bo̩ le̩ ne me̩, oñ u mʼo̩kokuno̩ʼka kpai okoloʼka ko che iche̩bo̩ oji ubo̩ iche̩bo̩ le̩ okoke lale.

⁵ Taku Jihofa dʼo̩laʼka tunyu Belam alu, oñ i kakini, Mudabi nyʼugbo Bele̩k, kʼe̩ fʼabe̩le̩ ka ñw u.

⁶ Tak i mudabi nyʼugbo-wñ, e̩ la go, owñ kpai amagboji Moab chaka la dago kpenyʼiche̩bo̩ e̩gujo-wñ le̩,

⁷ tak i mʼita-wñ du tʼalu akpa kakini, Bele̩k, onu Moab, du mi kwʼAram wa, akwo uwo uwo olodudu le̩: Lewa, kʼe̩ fʼama na ñw Jeko̩b ñw mi, lewa, kʼe̩ la fo̩ko̩ abo Israe̩l!

⁸ Abu nale kʼu nanʼama ñw e̩ne̩ kʼO̩jo̩ ma nʼama ñw u n? Abu nale kʼu nafo̩ko̩ e̩ne̩ kʼO̩jo̩ ma fo̩ko̩-wñ n?

⁹ Todu u dago oj okuta-i u cheliʼu, U dʼoji uwo uwo le̩ eju-mi la dʼo; go, amone̩ kʼama kate dodo kpai o̩la-ma ma che, ma la alo ma rʼef abo uche̩ichi n!

¹⁰ E̩ne̩ neke kaluka ebutu e-Jeko̩b? E̩ne̩ la neke kaluka ukpe̩re̩le̩ abo Israe̩l? Je̩ ñw onugo-mi kʼi ku uku e̩no̩kpakpa, ukpoji e-mi otitala ki dab e-wñ!

¹¹ Taku Bele̩k ka ñw Belam kakini, E̩wñ e̩ che mi-i ta? Omi dʼuwe̩ wa kʼe̩ nama ñw ame̩nebi-mi, e̩ la go, e̩ la chʼe̩wñ du tʼedʼe̩nye̩ ñw ma le n.

¹² Tak i dohi kakini, I chʼo̩la ku Jihofa du tʼumi alu oñ nʼalebo̩ kʼu naka tila n?

¹³ Taku Bele̩k ka ñw u kakini, Agba, e̩ le bʼumi nyʼugbo omune̩, ugbo kʼuwe̩ ali ma; o̩mo̩ uwe̩ ali ukpoji-ma otitala kate, i chʼo̩chaka-ma uwe̩ ali n. Tak e̩ dʼano̩mo̩ anama ñw ma ñw mi.

¹⁴ Tak i mʼowñ du le tʼegbili Zofim, tʼoji Pisga, i la fʼubo̩ iche̩bo̩ mebie ne o̩mo̩, oñ i mʼo̩kokuno̩ʼka kpai okoloʼka ko che iche̩bo̩ oj ubo̩ iche̩bo̩ le̩ okoke lale.

¹⁵ Tak i ka ñw Bele̩k kakini, Kwodago ugbo iche̩bo̩ e̩gujo-we̩ emi, kʼu nade kpai owñ ano̩mo̩.

¹⁶ Taku Jihofa de kpai Belam, oñ i dʼo̩laʼka tunyʼu alu, oñ i kakini, Mudabi nyʼugbo Bele̩k, kʼe̩ fʼabe̩le̩ ka ñw u.

¹⁷ Oñ i lewa ugbo-wñ, e̩ la go, i dago ugbo iche̩bo̩ e̩gujo-wñ, amagboji Moab la jʼugbo-wñ. Taku Bele̩k ka ñw u kakini, Abu Jihofa ka?

¹⁸ Tak i mʼita-wñ du tʼalu akpa, i kakini, Kwane̩ Bele̩k, kʼe̩ gbo̩; ne̩tirʼumi, uwe̩, o̩ma Zipo̩r:

¹⁹ O̩jo̩ chʼone̩ ofo kʼowñ aremi n, i la chʼo̩ma one̩, kʼowñ kʼi rʼibe da n. I ka, kʼi ma la ache n? Abe̩k i akʼo̩la, kʼi ma la ache tʼeju-wñ n?

²⁰ E̩wñ kʼu gba de̩, owñ chʼe̩nyo̩ edu; i la mʼe̩nyo̩ du ñw ma me̩, u la neke rʼo̩ ida n.

²¹ I li e̩wñ ibe̩te̩ efu Jeko̩b in; i la li akanya ef Israe̩l in. Jihofa, O̩jo̩-wñ, dʼugbo-wñ, ma jʼachʼo̩ga dabe̩ne̩ kʼonu dʼalumeji-ma.

²² O̩jo̩ ko ma kwʼIjipti dufu wa-i; i chenʼukpahiu dab o̩ke̩fa.

²³ I la nʼe̩wñ eche ru Jeko̩b kʼi amʼu n, i nʼifa ebo̩ nʼIsrae̩l in; fai taku ma anʼo̩la Jeko̩b kpai Israe̩l aka kakini, gʼe̩wñ kʼO̩jo̩ che-i!

²⁴ Go, amone̩ le̩ akwane̩ dab ole idu! I adʼo̩la-wñ kwane̩ dab o̩ko̩ idu; i ñʼadachi gbogbo tak i kpʼe̩la le̩ je̩, kʼi la fʼe̩bie̩ e̩wñ kʼi kpa le̩ ñmo̩ n.

²⁵ Taku Bele̩k ka ñw Belam kakini, Abe̩k enama ñw ma, abe̩k ekadua ñw ma, e̩ ki che kilikili n.

²⁶ Ama Belam dohi ñw Bele̩k kakini, Omi ka ñw e̩ kakini, E̩wñ du ku Jihofa ka, e-le̩ nache tila n?

²⁷ Taku Bele̩k ka ñw Belam kakini, Lewa ta, oñ nadʼe̩ nyʼugbo omune̩; ikani i anyo̩ O̩jo̩ eju kʼuwe̩ ki nama ñw ma ñw mi o̩mo̩.

²⁸ Taku Bele̩k mu Belam du le tʼoji uwo Peo̩r, e-kʼi bʼo̩do̩go̩ ne aje̩tachi le̩.

²⁹ Taku Belam ka ñw Bele̩k kakini, E̩ fʼubo̩ iche̩bo̩ mebie ne ñw mi emi, kʼe̩ fʼo̩kokuno̩ mebie kpai okolo mebie ñwo̩che ñw mi emi.

³⁰ Taku Bele̩k che alu ku Belam ka le̩, oñ i mʼo̩kokuno̩ʼka kpai okoloʼka ko che iche̩bo̩ oj ubo̩ iche̩bo̩ le̩ okoke lale.