Ekaluka 1 - O̩TAKADA O̩LA O̩JO̩ 1970

Ma fʼabo o̩lo̩pu me̩gwaka le̩ kaluka

¹ Oñ Jihofa dʼef unyabo ujeju aje̩tachi Sainai ako̩la ñwu Mose̩s, o̩jo̩ ejodudu ochu ekeji, o̩do̩ ekeji, ku ma kwʼoj ane̩ Ijipti awa, i kakini,

² E̩ nafʼuwewe oji one̩ o̩gbadu abo Israe̩l chaka ma, akwo̩ra unyi akwo̩ra unyi, kpai ikpo unyi ikpo unyi amata-ma, owñ chʼaluka odu one̩ odu one̩-ma, oji oji e̩ne̩ke̩le̩-ma du;

³ owñ chʼabo du ku ma jʼef abo Israe̩l kʼo̩do̩-ma jo̩ ogu nyʼate̩to̩gba-wñ ku ma nʼukpahiu ku ma anyi oko ogu. Uwe̩ kpai Aro̩n ki fʼuma kaluka udala udala.

⁴ Oñ e̩ne̩ʼka e̩ne̩ʼka kʼi kwʼef o̩lo̩pu o̩lo̩pu du amanyʼuwe̩; e̩ne̩ne̩ne̩ne̩ abo le̩ achʼuto̩gba unyi amata-wñ.

⁵ Odu aboke̩le̩ ku ma la adago manyʼuwe̩ le̩ de̩: E̩ne̩ Rube̩n chʼE̩lize̩r o̩ma Shede̩ur;

⁶ e̩ne̩ Simeo̩n che She̩lumie̩l o̩ma Zuri-shadai;

⁷ e̩ne̩ Juda che Nasho̩n o̩ma Aminadab;

⁸ e̩ne̩ Isakar che Netane̩l o̩ma Zuar;

⁹ e̩ne̩ Ze̩biulo̩n che Eliab o̩ma Helo̩n;

¹⁰ abo amo̩ma Jose̩f, e-e̩ne̩ Ifraim che E̩lishama o̩ma Amihud; e̩ne̩ Manasa che Gamelie̩l o̩ma Pedazur;

¹¹ e̩ne̩ Be̩njamin che Abidan o̩ma Gideoni;

¹² e̩ne̩ Dan che Ahieze̩r o̩ma Amishadai;

¹³ e̩ne̩ Ashe̩r che Pagie̩l o̩ma Okran;

¹⁴ e̩ne̩ Gad che Eliasaf o̩ma De̩ue̩l;

¹⁵ e̩ne̩ Naftali chʼAhira o̩ma Enan.

¹⁶ Abo-i chʼabo o̩gbadu le̩ ku ma do̩, amidachi o̩lo̩pu o̩lo̩pu amatama ma che; ama chʼoji oji amone̩ icham nyʼo̩gwo̩ko̩ icham nyʼo̩gwo̩ko̩ e-abo Israe̩l.

¹⁷ Taku Mose̩s kpai Aro̩n mʼaboke̩le̩ ku ma do̩ odu-ma le̩ ko,

¹⁸ oñ ma fʼabo o̩gbadu le̩ chaka do̩ jeju ugbokate o̩jo̩ ejodudu ochu ekeji, taku ma choli ebi ku ma bi ma akwo̩ra unyi akwo̩ra unyi, alu kʼikpo unyi ikpo unyi amata-ma de̩, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, oji one̩ oji one̩-ma,

¹⁹ alu ki Jihofa ñwa ñwu Mose̩s. Abe̩le̩ i fʼuma kaluka ef aje̩tachi Sainai le̩.

²⁰ Oñ amo̩ma Rube̩n, o̩mo̩gba Israe̩l le̩, o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, oji one̩ oji one̩-ma, e̩ne̩ke̩le̩ du kʼo̩do̩-wñ jo̩ ogu nyʼate̩to̩gba-wñ, abo du ku ma bʼoko ogu enyi jo̩:

²¹ abo e-o̩lo̩pu Rube̩n ku ma kaluka le̩ chʼone̩ icham nyʼo̩gwo̩ko̩ o̩gbo̩ meji nyoke me̩fa nyʼone̩ oli me̩gwa.

²² E-amo̩ma Simeo̩n o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, abo-ma ku ma kaluka likpa aluka odu-ma ku ma ko̩, oji one̩ oji one̩-ma, e̩ne̩ke̩le̩ du akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩.

²³ Abo e-o̩lo̩pu Simeo̩n ku ma kaluka le̩ chʼone̩ icham nyʼo̩gwo̩ko̩ ooje nyoke me̩la nyʼone̩ oli me̩fa.

²⁴ E-amo̩ma Gad o̩gba o̩gbo-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

²⁵ abo o̩lo̩pu Gad ku ma kaluka le̩ chʼone̩ icham nyʼo̩gwo̩ko̩ ugbo o̩gbo̩ meji nyoke me̩lu nyʼone̩ oli me̩gwe̩ta.

²⁶ E-amo̩ma Juda o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

²⁷ abo e-o̩lo̩pu Juda ku ma kaluka le̩ chʼone̩ icham nyʼo̩gwo̩ko̩ ugbo e̩te̩gwa nyoke me̩lu nyʼone̩ ulo̩gwa.

²⁸ E-amo̩ma Isakar o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

²⁹ abo e-o̩lo̩pu Isakar ku ma kaluka le̩ chʼone̩ icham nyʼo̩gwo̩ko̩ ugbo ooje nyoke me̩le̩ nyʼone̩ ulo̩ko̩.

³⁰ E-amo̩ma Ze̩biulo̩n o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

³¹ abo e-o̩lo̩pu Ze̩biulo̩n ku ma kaluka le̩ chʼone̩ icham nyʼo̩gwo̩ko ugbo ooje nyoke mebie nyʼone̩ ulo̩ko.

³² E-amo̩ma Jose̩f: owñ chʼe-amo̩ma Ifraim o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩;

³³ abo e-o̩lo̩pu Ifraim ku ma kaluka le̩ chʼone̩ icham nyʼo̩gwo̩ko̩ ugbo o̩gbo̩ meji nyʼone̩ oli me̩gwa.

³⁴ E-amo̩ma Manasa o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

³⁵ abo e-o̩lo̩pu Manasa ku ma kaluka le̩ chʼone̩ icham nyʼo̩gwo̩ko̩ ugbo ogue̩gwa nyoke meji nyʼone̩ ogwoko.

³⁶ E-amo̩ma Be̩njamin, o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

³⁷ abo e-o̩lo̩pu Be̩njamin ku ma kaluka le̩ chʼone̩ icham nyʼo̩gwo̩ko̩ ugbo ogue̩gwa nyoke me̩lu nyʼone̩ ulo̩ko̩.

³⁸ E-amo̩ma Dan, o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

³⁹ abo e-o̩lo̩pu Dan ku ma kaluka le̩ chʼone̩ icham nyʼo̩gwo̩ko̩ ugbo o̩gbo̩ me̩ta nyoke meji nyʼone̩ oli me̩gwe̩le̩.

⁴⁰ E-amo̩ma Ashe̩r, o̩gba o̩gba-ma, akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

⁴¹ abo e-o̩lo̩pu Ashe̩r ku ma kaluka le̩, chʼone̩ icham nyʼo̩gwo̩ko̩ ugbo o̩gbo̩ meji nyokeʼka nyʼone̩ oli me̩gwa.

⁴² E-amo̩ma Naftali, o̩gba o̩gba-ma akwo̩ra unyi akwo̩ra unyi-ma, ikpo unyi ikpo unyi amata-ma, likpa aluka odu-ma ku ma ko̩, akwʼo̩do̩ ogu nyʼate̩to̩gba-wñ, abo du ku ma bʼoko ogu enyi jo̩:

⁴³ abo e-o̩lo̩pu Naftali ku ma kaluka le̩, chʼone̩ icham nyʼo̩gwo̩ko̩ ugbo ooje nyoke me̩ta nyʼone̩ ulo̩ko̩.

⁴⁴ Abo-i chʼabo ku ma kaluka le̩, owñ chʼabo ku Mose̩s kpai Aro̩n kpai amidachi e-abo Israe̩l ku ma chʼone̩ me̩gweji kʼe̩ne̩ne̩ne̩ne̩-ma koji unyi ata-wñ le̩ kʼuma aluka.

⁴⁵ Abe̩le̩ aluka amo̩ma Israe̩l du, ikpo unyi ikpo unyi amata-ma, akwʼo̩do̩ ogu nyʼate̩to̩gba-wñ, owñ chʼabo du ku ma jʼefu abo Israe̩l ku ma bʼoko ogu enyi jo̩—

⁴⁶ aluka-ma du chʼone̩ icham nyʼo̩gwo̩ko̩ ugbo ulo̩gwa nyoke me̩ta nyʼone̩ oli me̩gwaka.

Abo Lifai

⁴⁷ Ma muda kaluka o̩lo̩pu amata abo Lifai efu-ma n.

⁴⁸ Todu Jihofa ka ñwu Mose̩s kakini,

⁴⁹ Chai o̩lo̩pu abo Lifai kate oñ e̩ ma kaluka n, e̩ ki la fʼoji one̩-ma lo tʼef amo̩ma Israe̩l in;

⁵⁰ e̩ ki la ko abo Lifai jo̩ ku ma nʼo̩da uña ugugu e-ibenu le̩ kpai ane̩-wñ chaka kpai e̩wñ kwe̩ kwe̩ kwe̩ du ki jʼo̩la-wñ; ama ane̩ uña ugugu le̩ kpai ane̩-wñ chaka, oñ ama ache e̩wñ ñw u, uru-ma la ale uña ugugu le̩ daka.

⁵¹ Tak e̩gba kʼuña ugugu le̩ achi e̩re̩ nyʼo̩gba, abo Lifai amʼu ta wane̩; oñ e̩gba ku ma che ku ma fʼuña ugugu le̩ fa dago, abo Lifai le̩ afa dago. E̩ne̩ ejaduña te̩me̩rʼu, ekpa ma akpa.

⁵² Oñ amo̩ma Israe̩l afa unyabo e-ma udala udala, e̩ne̩ne̩ne̩ne̩ adʼugbo uru-wñ, e̩ne̩ne̩ne̩ne̩ la adʼugbo agaliga e-wñ.

⁵³ Abo Lifai muda afa unyabo-ma lʼuña ugugu ibenu le̩ daka, todu kʼuwe̩do̩ ki we ebʼo̩gbadu amo̩ma Israe̩l ma; abo Lifai la ade e̩wñ ide uña e-ugugue̩-ibenu le̩.

⁵⁴ Amo̩ma Israe̩l fʼabe̩le̩ che; likpa e̩wñ du ku Jihofa ñwa ñwu Mose̩s, abe̩le̩ ma che.