Akwodufu 36 - O̩TAKADA O̩LA O̩JO̩ 1970

Ane̩ uko̩lo̩ unyabo le̩

¹ Taku Be̩zale̩l kpai Oholiab kpai e̩ne̩ du ki nʼofili efu, owñ chʼe̩ne̩ ku Jihofa mʼibe kpai oji e̩wñ ema du tʼowñ efu kʼi meju uko̩lo̩ du tod e̩wñ ef uña kiafo̩ le̩ eche, achʼuko̩lo̩ likpa alu du ki Jihofa ñwa ñwu ma.

² Taku Mose̩s fu Be̩zale̩l kpai Oholiab do̩, manyʼe̩ne̩ du ki nʼofili efu, e-ki Jihofa dʼibe tʼowñ efu; owñ chʼe̩ne̩ du kʼe̩do̩-wñ kwane̩ kʼi wa che uko̩lo̩ le̩;

³ taku ma mʼe̩wñ du ku ma ko̩ nyʼate̩ kʼamo̩ma Israe̩l ko wa ku ma ne̩ chʼuko̩lo̩ e̩wñ du ku ma ache ef uña kiafo̩, gba o̩wo̩ Mose̩s. Ma laño̩ gʼe̩do̩la-ma ako e̩wñ wʼugbo-wñ odudu o̩jo̩ duu.

⁴ Tak amanibe chaka ku ma che uko̩lo̩ uña kiafo̩ le̩ du, e̩ne̩ne̩ne̩ne̩ kwo bʼuko̩lo̩-wñ kʼi ache te̩ wa,

⁵ oñ ma ka ñwu Mose̩s kakini, E̩wñ kʼamone̩ ako wa-i tʼuko̩lo̩ ki Jihofa ñwa ñw a kʼa che le̩ gu e̩gu du.

⁶ Taku Mose̩s ñwa ñwu ma, oñ ma fʼakoya-wñ ta ugbo du ef uru le̩ kakini, Tʼe̩ne̩ke̩le̩ tʼonobule̩ ki ño̩ che uko̩lo̩ e̩wñ omune̩ ku ma ko̩ nyʼate̩ tod uña kiafo̩-i ge̩ n. Abe̩le̩ ma fʼamone̩ ba ku ma we ekʼe̩wñ wa.

⁷ Todu e̩wñ ku ma ne̩ bʼuko̩lo̩ le̩ jo̩ kwubo̩.

⁸ Oñ aboke̩le̩ du ku ma nʼofili ef e̩do̩ chaka ku ma jʼef abo ku ma che uko̩lo̩ le̩ kʼibali ukpo me̩gwa ta che uña ugugu le̩; ukpo-wñ che line̩n ku ma hi reju kʼowu-wñ chʼe̩da bie̩, kʼi chʼodufa kpai odufa ekpikpa kpai ekpikpa; ma famiche̩rub chenyʼu e̩te̩le̩.

⁹ Ujiji ibali ukpo ku ma ko ta le̩ okoke chʼo̩hibo̩wo̩ ogu nyoke me̩jo̩, unabe̩ ibali-wñ okoke la chʼo̩hibo̩wo̩ me̩le̩; e̩ñwa ibali-wñ du la chʼalukate.

¹⁰ Oñ i fʼibali ukpo ku ma ta le̩ me̩lu gamʼomune̩, ibali ukpo me̩lu ki bo̩ i ño̩ fʼu gamʼomune̩.

¹¹ I la che ate odufa nyʼeti ibali ukpo ki dʼotitala e̩gwodama-wñ ejodudu; i ño̩ fʼabele̩ che nyʼeti ibali ukpo ki dʼotitala e̩gwodama-wñ o̩wo̩ ekeji;

¹² i fʼate ooje che nyʼeti e̩gwodama ukpo le̩ oka, i laño̩ fʼate ooje che nyʼeti ibali ukpo otitala ef e̩gwodama-wñ ekeji; ate-wñ la kpejurʼomune̩.

¹³ Tak i nʼo̩jamalia che atanyi ooje, oñ i nʼatanyi le̩ fʼe̩gwodama ukpo meji le̩ ta tʼomune̩; abe̩le̩ oñ uña ugugu le̩ mud alukate.

¹⁴ I ño̩ nʼedudu ewo hi ibali ibali ukpo ku ma ata kʼi chʼunyabo uña ugugu le̩; i fʼibali ukpo ku ma ta le̩ me̩gwaka che.

¹⁵ Ujiji ibali-wñ okoke la chʼohibo̩wo̩ ogue̩gwa, unabe̩ ibali-wñ okoke la chʼohibo̩wo̩ me̩le̩; e̩ñwa ibali ukpo ku ma ta me̩gwaka le̩ chʼalukate.

¹⁶ I fʼibali me̩lu gamʼomune̩; oñ i fʼibali me̩fa gamʼomune̩ ojoji.

¹⁷ Tak i fʼate ooje che nyʼeti ibali ukpo ki dʼotitala e̩gamʼomune̩-wñ oka; i laño̩ che ate ooje nyʼeti ibali ukpo ki dʼotitala e̩gamʼomune̩-wñ o̩wo̩ ekeji ge̩.

¹⁸ Tak i nʼebijeikpa che atanyi ooje kʼi ne̩ fʼunyabo le̩ ta tʼomune̩ kʼi chʼalukate.

¹⁹ I laño̩ nʼaño̩ amokolo ku ma hi ekpikpa ko che e̩wñ ki abʼoji unyabo le̩ ma, kpai año̩ e̩la omi le̩ kʼi bʼe-le̩ ma ate̩.

²⁰ Tak i nʼoli akesia chʼakatakpo ki adago kpakpa todu uña ugugu le̩.

²¹ Ujiji akatakpoʼka chʼohibo̩wo̩ me̩gwa, unabe̩ akatakpoʼka la chʼohibo̩wo̩ʼka nyʼukpe̩reji.

²² Akatakpo du nʼe̩re̩ meji, efa ma fa tunyʼu; i fʼabe̩le̩ che todu akatakpo uña ugugu le̩ chaka.

²³ Abu kʼi chʼakatakpo todu uña ugugu le̩ de̩: akatakpo todu o̩wo̩-wñ o̩pata awo̩to̩ chʼogu;

²⁴ tak i nʼajifa che o̩ka o̩gbo̩ meji kʼi jʼofe akatakpo ogu le̩; o̩ka meji jʼofe akatakpoʼka tod e̩re̩-wñ meji le̩, o̩ka meji la jʼofo akatakpo omune̩ tod e̩re̩-wñ meji ge̩.

²⁵ Taku todu o̩wo̩ ekeji uña ugugu le̩, owñ chʼakolo-wñ o̩wo̩ awohi i fʼakatakpo ogu che ge̩

²⁶ kpai o̩ka ajifa o̩gbo̩ meji, o̩ka meji jʼofe akatakpoʼka, o̩ka meji la jʼofe akatakpo omune̩.

²⁷ I la fʼakatakpo me̩fa che todu ejubi uña ugugu le̩, o̩wo̩ olane̩-wñ.

²⁸ Oñ i fʼakatakpo meji che todu ejubi uña ugugu le̩ ugbo ku ma dʼalo-wñ meji.

²⁹ Ma chʼegamʼomune̩ o̩gane̩; tak oji-wñ ate̩ tunyʼelikaʼka, abe̩le̩ i fʼeji che tod ugbo kʼalo-wñ meji ade.

³⁰ Abe̩le̩ akatakpo-wñ chʼe̩jo̩, manyʼoka ajifa-wñ; o̩ka-wñ la chʼe̩gwe̩fa, oka meji jʼofe akatakpo okoke du.

³¹ Oñ i nʼoli akesia fʼoli ugbo̩lo, e̩lu-wñ chʼutodu akatakpo o̩woʼka uña ugugu le̩.

³² Oli ugbo̩lo̩ me̩lu la chʼutodu akatakpo o̩wo̩ ekeji uña ugugu le̩, oli ugbo̩lo̩ me̩lu la chʼutodu akatakpo ejubi uña ugugu, o̩wo̩ olane̩-wñ.

³³ I la che oli ugbo̩lo̩ ki dʼalumeji ki tunyu alumeji akatakpo akatakpo akwʼo̩wo̩ʼka-wñ gbogbo tʼo̩wo̩ ekeji.

³⁴ Tak i fʼo̩jamalia wenyʼakatakpo akatakpo le̩; i nʼo̩jamalia che elika-wñ todu kʼi chʼugbo kʼoli ugbo̩lo̩-wñ atunyu, i laño̩ fʼo̩jamalia wenyu oli ugbo̩lo̩-wñ ge̩.

³⁵ Tak i nʼodufa kpai odufa ekpikpa kpai ekpikpa kpai ukpo line̩n ku ma hi reju kʼowu-wñ chʼe̩da bie̩ che ukpo ugbeju le̩. Amiche̩rub jʼo̩la-wñ, uko̩lo̩-wñ chʼuko̩lo̩ o̩ka.

³⁶ Tak i fʼoli urane̩ akesia me̩le̩ fa todu-wñ, i la dʼo̩jamalia wenyʼu; uko̩-wñ chʼo̩jamalia; i laño̩ fʼo̩ka ajifa me̩le̩ da todu-wñ.

³⁷ I ño̩ fʼukpo uro̩na che todu alugbo̩na unyabo le̩, i chʼodufa kpai odufa ekpikpa kpai ekpikpa kpai ukpo line̩n ku ma hi reju kʼowu-wñ chʼe̩da bie̩; uko̩lo̩ e̩ne̩ kʼi achiya nyʼukpo jʼo̩la-wñ;

³⁸ manyʼoli urane̩-wñ me̩lu kpai uko̩-wñ. I kʼo̩jamalia wenyʼoji-wñ, oli ugbo̩lo̩-wñ ate̩ chʼo̩jamalia, o̩ka-wñ me̩lu kʼi jʼofe-wñ muda chʼebijeikpa.