Akwodufu 31 - O̩TAKADA O̩LA O̩JO̩ 1970

Ma chi Be̩zale̩l kpai Oholiab tod uko̩lo̩ unyabo

¹ Taku Jihofa ka ñwu Mose̩s kakini,

² Go, omi fʼodu Be̩zale̩l o̩ma Uri, o̩ma He̩r kʼi chʼabo o̩lo̩pu Juda do̩.

³ Omi la je̩ ñw u kpe̩ko̩ ñw Afu O̩jo̩, kpai ibe kpai oji o̩la ema kpai e̩wñ ema kpai emeju uko̩lo̩ e̩wñ ojoji ojoji du eche,

⁴ kʼi ñwa uko̩lo̩ o̩ka, kʼi che uko̩lo̩ o̩jamalia kpai ajifa kpai ebijeikpa,

⁵ kpai okuta eda ku ma du tunyʼe̩wñ, kpai igbo oli efa, kʼi chʼuko̩lo̩ ojoji ojoji du.

⁶ E̩ la go, omi fʼOholiab, o̩ma Ahisamak, kʼi chʼabo o̩lo̩pu Dan, chi manyʼu, u laño̩ dʼibe tʼibe tef e̩do̩ amone̩ chaka ku ma nʼibe efu, ku ma ki che e̩wñ du kʼomi ñwa ñw e̩:

⁷ unyabo ujeju kpai akpati ibenu kpai ugugu unye̩do̩ kʼi dʼoji-wñ kpai ane̩ unyabo le̩ chaka

⁸ kpai itebulu le̩ kpai ane̩-wñ kpai akete hiolo le̩ manyʼane̩-wñ chaka kpai ubo̩ iche̩bo̩ ku ma gu e̩wñ kʼi akpo jo oji-wñ

⁹ kpai ubo̩ iche̩bo̩ e̩wñ egujo manyʼane̩-wñ chaka kpai ukpachi ugwo̩wo̩ kpai e̩wñ ki agugu oji-wñ

¹⁰ kpai otogbo ku ma hi reju kpai otogbo e-efo̩ todu Aro̩n, atama le̩, kpai otogbo amo̩ma-wñ, ku ma ne̩ che e̩wñ atama,

¹¹ kpai ekpo ku ma ba tʼo̩la kpai otulale ki akpo todu uña kiafo̩. Likpa alu du kʼomi ñwa ñw e̩, ama ki che.

O̩jo̩ uñmi ede

¹² Taku Jihofa ka ñwu Mose̩s kakini,

¹³ Uwe̩ ki ño̩ ka ñw amo̩ma Israe̩l kakini, Ame̩ ki fʼo̩jo̩ uñmi-mi de chuu, todu owñ chʼujiwe ki tʼagbagba omi kpai ame̩ gbogbo nyʼo̩hio̩gu-me̩, todu kʼame̩ ki ma ka kʼomi, Jihofa, ache me̩ ku me̩ fo̩.

¹⁴ Abe̩le̩ ame̩ ade o̩jo̩ uñmi, todu i afo̩ todu me̩; e̩ne̩ du ki fʼu daji, ekpa ma akpa; e̩ne̩ du kʼi fʼuko̩lo̩ʼka che o̩jo̩ le̩, ma akʼonugo e̩ne̩ le̩ da bʼamone̩-wñ te̩.

¹⁵ O̩jo̩ me̩fa oñ ma achʼuko̩lo̩ kade; o̩jo̩ e̩kebie-wñ muda chʼo̩jo̩ uñmi e-uñmi kiafo̩ todu Jihofa; e̩ne̩ du ki fʼuko̩lo̩ du che o̩jo̩ uñmi, ekpa ma akpa.

¹⁶ Todule̩ oñ amo̩ma Israe̩l ade o̩jo̩ uñmi, ku ma dejute̩ o̩jo̩ uñmi gbogbo nyʼo̩hio̩gu-ma, kʼi mud alo ekpe̩ ogbegbele̩.

¹⁷ Owñ chʼujiwe ki tʼagbagba omi kpai amo̩ma Israe̩l ogbegbele̩, todu o̩jo̩ me̩fa Jihofa che efojale kpai ane̩-ile̩, tak i ñmi o̩jo̩ e̩kebie, oñ i rʼiñmi.

¹⁸ E̩gba kʼi fʼoluka che kpai Mose̩s oj uwo Sainai kpa, i la mʼalo ibenu meji le̩ ko ñw u, alo okuta i che, o̩wo̩ O̩jo̩ ko̩.