Akwodufu 26 - O̩TAKADA O̩LA O̩JO̩ 1970

Unyabo

¹ Tak uwe̩ ki kʼibali ukpo me̩gwa ta che uña ugugu; ukpo-wñ ki che line̩n ku ma hi reju kʼowu-wñ chʼe̩da bie̩ kʼi chʼodufa kpai odufa ekpikpa kpai ekpikpa; amiche̩rub kʼabo ku ma chʼo̩ka uko̩lo̩-wñ che ajʼo̩la-wñ.

² Ujiji ibali ukpo ku ma ko̩ ta le̩ okoke la achʼohibo̩wo̩ ogu nyoke me̩jo̩, unabe̩-wñ okoke la achʼo̩hibo̩wo̩ me̩le̩; e̩ñwa o̩chaka ukpo ku ma ko ta le̩ achʼalukate.

³ Ibali ukpo me̩lu agamʼomune̩; ukpo me̩lu ki bo̩ la agamʼomune̩ ge̩.

⁴ E̩ ki la che ate odufa nyʼeti ibali ukpo ku ma ko ta le̩ e-ki dʼotitala e̩gwodama-wñ oka; abe̩le̩ uwe̩ ñʼache nyʼeti ibali ukpo ki dʼoditala e̩gwodama-wñ ekeji.

⁵ Uwe̩ ki che ate ooje nyʼe̩gwodama ibali ukpo ku ma ko ta le̩ oka, e̩ ki laño̩ che ate ooje nyʼeti e̩gwodama ibali ukpo ku ma ta le̩ ekeji; ate ukpo meji le̩ akpejurʼomune̩.

⁶ Tak uwe̩ ki nʼo̩jamalia che atanyi-wñ ooje, kʼe̩ ne̩ atanyi le̩ fʼukpo ku ma ko ta le̩ gamʼomune̩: abe̩le̩ oñ uña ugugu le̩ achʼokate.

⁷ Tak uwe̩ ki ño̩ nʼedudu ewo hi ibali ibali ukpo kʼi chʼunyabo kʼi abʼuña ugugu le̩ ma; uwe̩ ki che ibali-wñ me̩gwaka.

⁸ Ujiji ibali-wñ okoke achʼohibo̩wo̩ ogue̩gwa, unabe̩ ibali-wñ okoke achʼohibo̩wo̩ me̩le̩; e̩ñwa ibali ibali me̩gwaka le̩ achʼalukate.

⁹ Tak e̩ namʼibali ukpo ku ma ta le̩ me̩lu ko̩ gamʼomune̩, e̩ ki ño̩ kʼibali me̩fa gamʼomune̩ ojoji, ibali e̩ke̩fa ki bale nʼo̩gba unyabo le̩.

¹⁰ Uwe̩ ki la chʼate ooje nyʼeti ibali ukpo ku ma ko ta e-kʼi dʼotitala o̩wo̩ʼka ñw abʼe-ku ma gamʼomune̩ le̩; kpai ate ooje nyʼeti ibali ukpo otitala ef abo ekeji ku ma gamʼomune̩ le̩.

¹¹ Tak e̩ ki fʼatanyi ebijeikpa ooje che, kʼe̩ kʼatanyi le̩ tunyʼate, kʼe̩ la fʼunyabo gamʼomune̩ kʼi mud okate.

¹² Tak ukpo ku ma ko ta kibo̩ le̩ kʼi a bale unyabo, ukpe̩reji ibali ki bo̩ le̩, e-le̩ abale ejubi uña ugugu.

¹³ Tak ohibo̩wo̩ʼka o̩wo̩ʼka-wñ kpai ohibo̩wo̩ʼka o̩wo̩ ekeji-wñ, owñ chʼe-kʼukpo ku ma ko ta le̩ jiji tʼunyabo le̩, e-le̩ abale nʼiba uña ugugu ej emi-wñ kpai ejano̩mo̩-wñ, kʼi bʼo ma.

¹⁴ Tak uwe̩ ki kʼaño̩ okolo ku ma hi ekpikpa che e̩wñ ki abʼoji unyabo le̩ ma, kʼe̩ la nʼaño̩ e̩la omi le̩ che e̩wñ ki abʼoji e-le̩ ate̩ ma.

¹⁵ Tak uwe̩ ane̩ oli akesia che akatakpo uña ugugu le̩, edago i adago.

¹⁶ Ujiji akatakpoʼka ache ohibo̩wo̩ me̩gwa, unabe̩ akatakpoʼka oka la ache ohibo̩wo̩ʼka nyʼukpe̩re̩ji.

¹⁷ Akatakpo du ane̩ e̩re̩ meji e̩ji, ku ma jo̩ okujo̩; abe̩le̩ uwe̩ ki che nyʼakatakpo uña ugugu le̩ du.

¹⁸ Uwe̩ ki fʼakatakpo che todu uña ugugu le̩; akatakpo ogu achʼutodu o̩wo̩ o̩pata-wñ o̩gane̩;

¹⁹ uwe̩ ki la ane̩ ajifa che o̩ka o̩gbo̩ meji kʼoli akatakpo ogu le̩ ki dago jo̩ oji-wñ, o̩ka meji ajʼofe akatakpoʼka todu e̩re̩-wñ meji, o̩ka meji ki ño̩ jʼofe akatakpo omune̩ todu e̩re̩ e-wñ meji;

²⁰ akatakpo ogu ñʼade̩ todu uña ugugu le̩ akolo-wñ ekeji, o̩wo̩ o̩pata-wñ ate̩,

²¹ kpai o̩ka-wñ o̩gbo̩ meji ku ma nʼajifa che le̩, o̩ka meji ajʼofe akatakpoʼka, o̩ka meji la ajʼofe akatakpo omune̩;

²² e̩ ki la fʼakatakpo me̩fa che todu ejubi uña ugugu o̩wo̩ o̩lane̩-wñ.

²³ E̩ ki chʼakatakpo meji todu alo alo uña ugugu ej ubi-wñ;

²⁴ ma a gamʼomune̩ e̩re̩-wñ o̩gane̩, tak i amanyʼomune̩ kʼoji-wñ ki tunyʼelikaʼka; abe̩le̩ i ade̩ ñw ejeji-wñ; ab e-le̩ achʼalo-wñ meji.

²⁵ Akatakpo la ache e̩jo̩, kpai o̩ka-wñ e-ajifa le̩ achʼe̩gwe̩fa; o̩ka meji ajʼofe akatakpoʼka, Oka meji ñʼajʼofe akatakpo omune̩.

²⁶ Tak uwe̩ ki fa ugbo̩lo̩ oli akesia; oli ugbo̩lo̩ me̩lu chʼutodu akatakpo uña ugugu le̩ akolo-wñ oka,

²⁷ oli ugbo̩lo̩ me̩lu la chʼutodu akatakpo uña ugugu le̩ o̩wo̩ ekeji-wñ, oli ugbo̩lo̩ me̩lu la chʼutodu akatakpo ejubi uña ugugu, o̩wo̩ o̩lane̩-wñ.

²⁸ Oñ ugbo̩lo̩ oli ki dʼalumeji akatakpo le̩ agudu akwo ejuʼka-wñ tʼeju ekeji.

²⁹ Uwe̩ ki dʼo̩jamalia bʼo̩la akatakpo ma kʼe̩ la che elika o̩jamalia ñw u, todu ki gwo̩nyʼugbo̩lo̩ oli le̩; e̩ ki la dʼo̩jamalia wenyʼugbo̩lo̩ oli le̩.

³⁰ Tak uwe̩ ki ko uña ugugu le̩ dago alu ku ma dʼoji-wñ te̩ ku ma du ñʼe̩ oj uwo-i.

³¹ Uwe̩ ki la nʼukpo odufa kpai odufa ekpikpa kpai ekpikpa kpai ukpo line̩n ku ma hi reju kʼowu-wñ chʼe̩da bie̩ che ukpo ugbeju unyi; abo ku ma chʼo̩ka uko̩lo̩-wñ ache kʼamiche̩rub ki jʼo̩la-wñ;

³² e̩ ki la dʼu ta tʼoli urane̩ akesia me̩le̩ kʼo̩jamalia wenyʼu kʼi jʼoji o̩ka me̩le̩ ku ma nʼajifa che; uko̩-wñ ache o̩jamalia.

³³ Uwe̩ ki kʼukpo ugbeju le̩ ta nyʼatanyi-wñ. Tak e̩ du akpati ibenu wa ejefu ukpo ugbeju; oñ ukpo ugbeju unyi le̩ afʼuña kiafo̩ daru bʼuña efo̩ e-e̩fo̩ te̩ ñw e̩.

³⁴ Tak uwe̩ ki dʼugugu unye̩do̩ nʼoj akpati ibenu efu uña efo̩ e-efo̩.

³⁵ Tak uwe̩ adʼitebulu-wñ dago ejo̩do̩da ukpo ugbeju unyi, akete agege-wñ la adago ef uña ugugu o̩wo̩ o̩pata o̩gane̩-wñ, owñ kpʼitebulu akpejurʼomune̩; uwe̩ ki la du itebulu le̩ dago o̩wo̩ o̩pata ate̩.

³⁶ Tak uwe̩ ki chʼukpo uro̩na todu alugbo̩na unyabo, ukpo odufa kpai odufa ekpikpa kpai ekpikpa kpai line̩n ku ma hi reju kʼowu-wñ chʼe̩da bie̩ kʼuko̩lo̩ e̩ne̩ ki achiya nyʼo̩la ukpo adʼo̩la-wñ.

³⁷ Uwe̩ ki la afa oli urane̩ akesia me̩lu todu ukpo uro̩na le̩, kʼe̩ la fʼo̩jamalia wenyʼo̩la-wñ me̩lu; uko̩-wñ achʼo̩jamalia ge̩; uwe̩ ki ne̩ ebijeikpa da o̩ka me̩lu todu-wñ.