Abo Galatia 2 - O̩TAKADA O̩LA O̩JO̩ 1970

Abogijo Je̩rusale̩m chema e̩te̩-wñ

¹ Ubi le̩ abu kʼo̩do̩ me̩gwe̩le̩ muda omi kpai Barnabas dabi te̩gu nyi Je̩rusale̩m; u mu Taito̩s du le bʼumi.

² Ete̩gu kʼu te̩gu le̩ teju alu kʼo̩la bite̩. Oñ u mʼUche̩nyo̩ e-kʼu natakoya-wñ ef abo uche̩ichi du kajane̩ ñwu ma. U muda ka ej ubi o̩gba abojima, tode̩gba kʼule kʼu ra akwobi abe̩k e-kʼu nara abajo̩-i amud ofofo.

³ Ama ichaka chʼiTaito̩s kʼi lebʼumi, abu kʼi chaka chʼiGriki, ma chʼo otila e̩pi eda n.

⁴ E-ku ma muda che chutodu amo̩maye olemi ku ma ji we̩e̩le̩ wa. Ma wa we̩e̩le̩ le̩ todu ku ma ki tu ane̩ o̩da o̩mone̩-wa kʼa ne̩ efu Kraist Jisus, todu ku ma ki ko wa nyʼef adu.

⁵ A muda bʼuña ñwu ma kʼa fʼo̩la-wa kamuhi te̩ ñwu ma auwaʼkate n: todu kʼochochi e-Uche̩nyo̩ le̩ ki nadʼugbo me̩ waa.

⁶ Ama ugbo abojima kʼamone̩ ka ku ma chʼe̩wñʼka (e̩wñ du ku ma chaka che, i nʼile ñwu mi n. I chʼeju one̩ oñ O̩jo̩ agba n); u kakini, I nʼe̩wñ du kʼabo ki nʼojima le̩ du manyu ñwu mi n.

⁷ Oñ o̩la le̩ mudabi tubi, abu ku ma li kakini, Ma ke̩do̩no mi oñ ma mʼUche̩nyo̩ e-abo ku ma ma de̩pi n du ñwu mi, alu ku ma mʼe-e̩pi-eda du ñwu Pita le̩.

⁸ (Todu e̩ne̩ ki chu-ko̩lo̩ ñwu Pita kʼi tef e̩nukpuche̩ e-abo e̩pi-eda ño̩ chuko̩lo̩ ñwu mi kʼu tef e-abo ucheichi ge̩.)

⁹ Oñ abu ku Jeme̩s kpai Kifas kpai Jo̩n, ku ma dabe̩ne̩ kʼugbogaga-ma, chema ufe̩de̩nyo̩ ku ma mudu ñwu mi, ma mʼo̩wo̩-awo̩to̩ e-uta O̩jo̩ Ata du ñw omi kpai Barnabas, todu kʼa ki nyʼugbo abo uche̩ichi, kʼama ki nyʼugbo abo e̩pi-e̩da;

¹⁰ chai kʼa ki dibekado ame̩nale dee; e̩wñ le̩ gbage̩de̩ oñ nachʼe̩do̩ chacha-wñ.

I dʼo̩la biu Pita

¹¹ Ama e̩gba ku Kifas lewa Antio̩k, eju-wñ u ko̩ nyʼo̩wo̩, todu i dʼugbo kʼi akpʼo̩la-wñ abi.

¹² Todu o̩gba tak abo iche̩ka kwʼugbo Jeme̩s wa, i nabʼabo uche̩ichi je̩ e̩wñ; tak e̩gba ku ma lewa i nahiwubi, i fʼo̩la-wñ date̩ ojoji, abu kʼi arʼailo abo-e̩pi-e̩da.

¹³ Tak amaJu ki bo̩ ño̩ bʼowñ do̩wo̩ yʼuma eju ge̩, todu abe̩le̩ ayechi-ma le̩ ño̩ mu Barnabas du le bʼuma ge̩.

¹⁴ Ama e̩gba kʼu li ka ku ma ma lule̩ tʼo̩kpoolo teju alu kʼochochi Uche̩nyo̩ de̩ n, u ka ñwu Kifas eju ma chaka kakini, Iche̩wñ kʼuwe̩ kʼe̩ chʼiJu do̩mo̩ ache e̩wñ ile̩-i alu kʼabo uche̩ichi ache, kʼe̩ ma la che dab amaJu n, abile kʼe̩ kute̩ abo uche̩ichi kʼama ki che e̩wñ dab amaJu ke?

One̩ bʼo̩lo̩da O̩jo̩ jo̩ n

¹⁵ Awa ku ma bi wa amaJu, kʼa ma la chʼame̩nadure e-abo uche̩ichi n,

¹⁶ oñ abu kʼa la chema ka ku ma adale ñw one̩ kwef uko̩lo̩ o̩lo̩da eche n, chai lef e̩do̩-ekono e-Jisus Kraisti, oñ awa onugo la ke̩do̩no Kraist Jisus, todu kʼama ki dale ñw a kwef e̩do̩ ekono e-Kraisti le̩, i la chʼekwef uko̩lo̩ o̩lo̩da eche n; todabu ku ma ma adale ñw o̩re̩la du kwef uko̩lo̩ o̩lo̩da eche n.

¹⁷ I muda che̩wñ kʼabu kʼa jʼafeju ku ma dale ñw a efu Kraist, ma ño̩ li ka kʼawa onugo chʼame̩nadure kpo̩ ge̩, Kraist chʼe̩ne̩ ki ache e̩wñ ñw adure? O̩jo̩ ki kpo̩na.

¹⁸ Todu iche̩wñ kʼu nada-bi ane̩ e̩wñ kʼu fugulo̩ le̩ mak u dʼo̩la-mi te̩ pee ka kʼu chʼajada.

¹⁹ Todu omi leku ñw o̩loda lef o̩lo̩da le̩, todu kʼu deju ñw O̩jo̩.

²⁰ Ma fʼumi kamoli manyu Kraisti; i la chʼomi ño̩ deju-i ge̩ n, chai Kraist deju ef umi; oñ edeju kʼu nadeju ef año̩la fai, nadeju ef e̩do̩-ekono e-O̩ma O̩jo̩ kʼi afe̩do̩ mi kʼi laño̩ mʼo̩la-wñ onugo du chele todu mi.

²¹ Nade̩yakpo̩ ufe̩do̩-enyo̩ O̩jo̩-i n: todu iche̩wñ kʼo̩kpakpa lef o̩lo̩da wa, maku Kraist leku o̩bo̩ ofofo.