Abo Galatia 1 - O̩TAKADA O̩LA O̩JO̩ 1970

Ugwa

¹ Po̩l, e̩nukpuche̩ ki ma chʼone̩ kpe̩ n, kʼo̩da-wñ ma la lef one̩ wa n, chai lefu Jisus Kraist kpai O̩jo̩ Ata ki dʼowñ kwane̩ kwef abo ki ku,

² Po̩l-i manyʼamo̩maye du ku ma jʼugbo mi tʼugbo ujeju ujeju abudo̩ Ondu ojane̩ Galatia.

³ Ufe̩de̩nyo̩ kpai ure̩do̩ ki dʼugbo me̩ kwugbo O̩jo̩ Ata kpai Ondu-wa Jisus Kraist,

⁴ kʼi mʼo̩la-wñ du chele tod adure-wa, todu kʼi gba wa kwef o̩kpanachi bibi-i, alu ki dʼO̩jo̩ kpai Ata-wa e̩do̩.

⁵ Ojima ki chʼe-wñ ogbegbele̩ nyile̩wa. Ami.

E̩do̩ Po̩l kpabie̩

⁶ I chʼaye ñwu mi kakini, Ame̩ hika adʼawubi bʼe̩ne̩ ki do̩ me̩ ef ufe̩de̩nyo̩ Kraist te̩ tef uche̩nyo̩ omune̩ ojoji;

⁷ i la chʼomune̩ i che n, abo iche̩ka muda do̩mo̩ ku ma mi me̩ ejo, abu ki dʼuma e̩do̩ ku ma rʼUche̩nyo̩ Kraist da.

⁸ Ama dagba i ma chaka chʼawa abe̩k onuche̩ ki kwʼefojale wa nʼuche̩nyo̩ aje̩rʼume̩ tʼUche̩nyo̩ e-kʼa je̩rʼume̩ le̩ le, ama ki fʼe̩ne̩ le̩ mu.

⁹ Alu kʼa ka o̩gbo̩gba le̩, abe̩le̩ naño̩ dabi ka fa-i ge̩, Iche̩wñ kʼe̩ne̩ du nʼuche̩nyo̩ aje̩rʼume̩ tʼe-kʼame̩ gba le̩ le, ama ki fʼe̩ne̩ le̩ mu.

¹⁰ Todu one̩ nache kʼu gbʼo̩ ibe-i? abe̩kʼO̩jo̩? abe̩k one̩ nafeju kʼu nyo̩ eju? I ma chʼone̩ u che kʼu nyʼo̩ eju ta, u ma chʼadu Kraisti n.

Uche̩nyo̩ kwʼugbo Kraisti, i kwʼugbo one̩ n

¹¹ Todu, amo̩maye, naje̩ ñwu me̩ ma ka kʼUche̩nyo̩ kʼomi je̩rʼamone̩ le̩, teju alu kʼone̩ añwa n.

¹² Todu, i chʼugbo one̩ oñ omi gba n, one̩ la ko̩ mi n, chai lef ebite̩ e-Jisus Kraist oñ omi gba.

¹³ Todu ame̩ gbo̩ alu kʼu te̩tache akwoubi ef e̩wñ amaJu kakini, U doli ujeju abudo̩ O̩jo̩ dabo̩ta, u laño̩ fʼu chile̩che̩;

¹⁴ u la hito̩gba ef e̩wñ amaJu ñw amoje̩go̩-mi wewe ef abo-mi, abu kʼu do̩mo̩ adikpala ef e̩wñ-o̩gu e-amata-mi tʼuma le ololo.

¹⁵ Ama e̩gba ki rʼO̩jo̩ kʼi fʼumi date̩ kwʼefu iye-mi, kʼi laño̩ fʼumi do̩ lef ufe̩de̩nyo̩-wñ e̩do̩,

¹⁶ kʼi mʼO̩ma-wñ dubite̩ ef umi, todu kʼu du owñ chʼUche̩nyo̩ kʼu naje̩rʼabo uche̩ichi; ababale̩ u nyʼojuju kpʼo̩re̩la kpʼe̩bie̩ n;

¹⁷ u la te̩gu nyi Je̩rusale̩m ugbo abo ku ma chʼame̩nukpuche̩ dʼo̩gba mi n. U muda kwʼo̩mo̩ le tʼArabia, tak u ño̩ mudabi wa Damaskus ge̩.

¹⁸ Ubi e-le̩, abʼodo me̩ta muda, u te̩gu nyi Je̩rusale̩m kʼu fu Kifas ma, oñ u bʼo̩ gugu o̩jo̩ me̩gwe̩lu.

¹⁹ I muda chʼe-ame̩nukpuche̩ omune̩ ki bo̩ u li ma n, chai Jeme̩s, o̩maye Ondu.

²⁰ O̩la e̩wñ kʼu nako̩takada-wñ rʼume̩-i, go, eju O̩jo̩ naka-i, u remi n.

²¹ Ubi le̩ tak u lewa ane̩ Siria kpai Silisia.

²² Ujeju ujeju abudo̩ Judia ku ma jʼefu Kraist la ma mi kpai eju e̩gba le̩ ta n.

²³ Chai egbo̩ ma gbo̩ kate kakini, E̩ne̩ ki doli wa e̩gbaʼka le̩, fai i nʼUche̩nyo̩ e̩do̩-e̩kono e-kʼi du tʼachile̩che̩ e̩gbaʼka le̩ aje̩rʼone̩;

²⁴ taku ma dojima ñw O̩jo̩ ef umi.