2 Samiue̩l 20 - O̩TAKADA O̩LA O̩JO̩ 1970

Joab fu Shiba du

¹ Oñ e̩nebiliʼka wa gbajiko o̩la le̩ o̩mo̩, odu e̩ne̩ le̩ ko̩ Shiba, o̩ma Bikri, e̩ne̩ Be̩njamin i che. Tak e̩ne̩ le̩ fʼo̩kakachi fa, oñ i kakini, Awa nʼukpe̩ du efu Defid in, i la ne̩ e̩wñ ogu du kʼa aje̩ ugbo o̩ma Je̩si-i n; e̩ne̩ne̩ne̩ne̩-me̩ ki nyʼunyabo-wñ, O abo Israe̩l!

² Abe̩le̩ aboke̩le̩ Israe̩l chaka kwobo̩ Defid ubi te̩, oñ ma kwo tu Shiba o̩ma Bikri ubi; abo Juda muda manyʼonu-ma, akwo Jo̩rdan gbogbo wa Je̩rusale̩m.

³ Abe̩le̩ Defid lewʼunyi-wñ Je̩rusale̩m; tak onu mʼabobule̩ me̩gwa ku ma chʼamabadu-wñ le̩ ko, owñ chʼabo kʼi tʼuma no̩ jʼubi ku ma dejutʼunyi, oñ i ko ma jʼef o̩wo̩ one̩, owñ la nʼuje̩wñ-ma ku ma aje̩, i muda nyʼejefu ugbo ma n. Abe̩le̩ ma fʼuma dahi jʼejefu gbogbo mʼo̩jo̩ uku-ma, ma kwojo̩ dab amo̩yaukuo̩ko̩.

⁴ Tak onu ka ñw Amasa kakini, E̩ fʼaboke̩le̩ Juda do̩ jeju ñw mi gbogbo tak o̩jo̩ me̩ta ki jo̩, eju-we̩ onugo ki la dʼane̩.

⁵ Abe̩le̩ Amasa le nyʼadʼabo Juda jeju; i muda kpo̩kpe̩ tʼiko ku ma da ñw u le.

⁶ Taku Defid ka ñw Abishai kakini, Fai taku Shiba, o̩ma Bikri, achʼuwa e̩bie̩ne̩ tʼe-kʼAbsalom che wa le; e̩ mʼabuko̩lo̩ odu-we̩-i ko, kʼe̩ ranʼo, tode̩gba kʼi alo tef ewo ki nʼaku, kʼi la kwo bʼuwa eju te̩.

⁷ Tak abo Joab ledufu atʼo̩ ubi kpai abo Ke̩re̩t kpai abo Pe̩le̩t kpai ame̩nugbiti chaka; oñ ma kwo Je̩rusale̩m dufu ku ma rano Shiba, o̩ma Bikri le̩.

⁸ E̩gba ku ma lewa ugbo okuta lile ki de̩ Gibeo̩n, Amasa lewa de kpai ama. Joab la kʼe̩wñ ogu-wñ bʼo̩la ma, e̩wñ lʼago-wñ de, oñ o̩kwo̩chageli tunyʼako-wñ ji mʼago-wñ; oñ abu kʼi dufu alo i muwo̩ tane̩.

⁹ Taku Joab ka ñw Amasa kakini, E̩ raa, o̩maye-mi? Taku Joab nʼo̩wo̩-wñ awo̩to̩ gwo̩nyʼilagba Amasa kʼi dʼalu kʼalu-wñ.

¹⁰ Amasa la nyeti o̩kwo̩chageli ki dʼo̩wo̩ Joab le̩ n; abe̩le̩ i fʼu ro̩nyʼu o̩la, oñ ifi-wñ mu dajʼane̩, i laño̩ dabi dʼu gwunyʼu ge̩ n; tak i leku. Taku Joab kpʼAbishai o̩maye-wñ rano Shiba, o̩ma Bikri le̩.

¹¹ Okolobia Joab oka la dago kpenyʼoku-wñ o̩mo̩, kʼi ka kakini, E̩ne̩ ki Joab chenyʼo̩ eju, kpai e̩ne̩ kʼi chʼe̩ne̩ Defid, i ki tu Joab ubi.

¹² Amasa la dachi ef e̩bie̩-wñ ajilo̩ku oj ikpadala o̩mo̩. Tak e̩gba kʼe̩ne̩ le̩ li kʼamone̩ kwodago jo̩, i mʼoku Amasa du bʼoj ikpadala te̩ tef oko, i la mʼe̩wñ o̩laʼka ko bʼo ma, owñ chʼabu kʼi li ka kʼe̩ne̩ du kʼi lewʼugbo-wñ kwodago.

¹³ E̩gba ku ma mʼu du bʼoj ikpadala te̩, amone̩ le̩ chaka daru Joab ubi, ku ma rano Shiba, o̩ma Bikri.

¹⁴ Oñ i lale gu o̩lo̩pu o̩lo̩pu Israe̩l du wa Ebe̩l; kpai Be̩t-maaka, kpʼabo Beri chaka, tak ama le̩ kʼo̩la-ma jeju, oñ ma ño̩ tʼo̩ ubi.

¹⁵ Taku ma lewa kpala nyu Shiba, Ebe̩l e-Be̩t-maaka, oñ ma fʼike̩te̩ gba dago o̩la ewo le̩ dab uwo, i gbadago ef o̩kpe̩-wñ; tak amone̩ du ku ma jʼugbo Joab dʼe̩wñ nu o̩do̩ le̩ ku ma gʼu lo̩.

¹⁶ Tak onobule̩ʼka ki nʼibe ef ewo le̩ kwado̩ ma, kakini, Neti, neti; o̩ko̩ nagbabʼuwe̩, me̩ ka ñwu Joab kakini, Te̩ me̩rʼemi kʼu nako̩la ñw e̩.

¹⁷ Tak i te̩ me̩rʼu; oñ onobule̩ le̩ kakini, Uwe̩ che Joab? Oñ i dohi kakini, Omi de̩. Tak onobule̩ le̩ ka ñw u kakini, E̩ nanetirʼo̩la adu-we̩ onobule̩-i. Oñ i dohi kakini, Nagbo̩.

¹⁸ Tak onobule̩ le̩ ko̩la kakini, Ma te̩taka kwʼigbelegbele kakini, Ma anyʼEbe̩l atene chuu: abe̩le̩ taku ma kpoji o̩la.

¹⁹ Tak omi dʼef abo ure̩do̩ kpai abo ku ma chubi O̩jo̩ Israe̩l; uwe̩ tene kʼe̩ kpʼewo kpai iye bie̩ Israe̩l; e̩wñ chi kʼe̩ neku ekʼe̩wñ ogu Jihofa mi?

²⁰ Taku Joab dohi kakini, E-le̩ ki me̩ru mi n, e-le̩ ki me̩ru mi n, kʼomi ki kʼe̩wñ mi abe̩k ekpʼo̩ bie̩.

²¹ I chʼabe̩le̩ o̩la-i de̩ n; ama e̩ne̩ ka kʼi chʼabo ane̩ uwo Ifraim, kʼodu-wñ ko̩ Shiba o̩ma Bikri, dʼo̩wo̩ nyate̩ chagwunyu onu, owñ chʼachagwunyu Defid; me̩ dʼowñ kate dufu wa, tak u nakwo bʼewo-i te̩. Tak onobule̩ le̩ ka ñwu Joab kakini. Go, ma adʼoji-wñ rikpolo lʼoj o̩do̩ ñw e̩.

²² Tak onobule̩ le̩ nyʼugbo amone̩ le̩ chaka ibe ibe. Oñ ma fʼoji Shiba, o̩ma Bikri, ko̩da, ma la mʼu du rikpolo tʼo̩do̩da ñwu Joab. Tak i fʼo̩kakachi-wñ fa, oñ ma muchi kwʼewo le̩, e̩ne̩ne̩ne̩ne̩ le tʼunyabo-wñ. Oñ Joab mudabiwa Je̩rusale̩m ugbo onu.

²³ Joab la chʼonu abogu Israe̩l chaka. Oñ Be̩naya, o̩ma Jiho̩yada chʼagboji abo Ke̩re̩t kpai abo Pe̩le̩t;

²⁴ Adoram la chʼagboji amilebula; oñ Jiho̩shafat o̩ma Ahilud chʼako̩takada iko iko e̩wñ;

²⁵ Shefa la chʼako̩takada; Zedo̩k kpai Abayata chʼamatama;

²⁶ Ira, abo Jair, la chʼe̩ne̩ ki tʼo̩gba ef abo ku ma che e̩wñ ñwu Defid.