2 Amonu 16 - O̩TAKADA O̩LA O̩JO̩ 1970

Ehaz jʼonu Juda

¹ O̩do̩ Peka o̩ma Re̩malaya e̩ke̩gwebie̩, Ehaz o̩ma Jotam onu Juda chane̩ ejʼonu-wñ.

² O̩do̩ Ehaz chʼogu e̩gba kʼi chane̩ ejʼonu. I la jʼonu o̩do̩ me̩gwe̩fa Je̩rusale̩m. I la nʼe̩wñ ki nyo̩ ache eju Jihofa O̩jo̩-wñ, alu ki Defid ata-wñ che n,

³ i muda le tʼo̩na amonu Israe̩l. Ochochi, i ño̩ je̩ ñw o̩ma-wñ lale gu ef una du teju alu kʼe̩wñ ihie̩ne̩ abo uche̩ichi de̩, owñ chʼabo ki Jihofa ko ma rikpolo rinyo̩ bʼo̩gba amo̩ma Israe̩l te̩ le̩.

⁴ I laño̩ fʼiche̩bo̩ che kpai otulale egujo oj otete otete lale kpʼoj uwo uwo kpʼofe oli emimi du.

⁵ Taku Re̩zin, onu Siria, kpai Peka o̩ma Re̩malaya, onu Israe̩l, mute̩gu wa Je̩rusale̩m ku ma jo̩gu; oñ ma kpalo nyʼEhaz, ma muda neke dʼu n.

⁶ Iko le̩ Re̩zin onu Siria mudabi gba Hat ñwu Siria, i la fʼabo Ju ne bʼIlat te̩. Tak abo Siria lewa Hat, oñ ma fʼodo do o̩mo̩ gbogbo tʼojolu eñini.

⁷ Todule̩ Ehaz fʼamonuche̩ kpe̩ ru Tiglat-pilesa, onu Asiria, kakini, Omi chʼadu-we̩ kpai o̩ma-we̩, mute̩gu wa kʼe̩ gba mi kwʼo̩wo̩ onu Siria, kpai kwʼo̩wo̩ onu Israe̩l ku ma kwane̩ tʼumi o̩la-i.

⁸ Tak Ehaz mʼajifa kpai o̩jamalia ku ma li ef unyi Jihofa kpai ef o̩pata unyi onu ko, i la mʼu ko kpe̩ru onu Asiria ele.

⁹ Oñ onu Asiria netirʼu; tak onu Asiria mute̩gu akogubo̩ Damaskus oñ i fʼu du, tak i fʼuma mu nyi Kir, i la fu Re̩zin kpa.

¹⁰ Tak onu Ehaz nyi Damaskus kʼi fejudo Tiglat-pilesa onu Asiria, oñ i fʼubo̩ iche̩bo̩ kʼi de̩ Damaskus li. Tak onu Ehaz fʼalu kʼi de̩ ñwa oñ i mʼu du kpuche̩ ru Uraija atama, kpai alu kʼuwo̩li-wñ de̩, teju alu ku ma chuko̩lo̩-wñ.

¹¹ Tak Uraija atama fʼubo̩ iche̩bo̩ ne teju alu du kʼonu Ehaz kpuche̩rʼu kwo Damaskus le̩, alu le̩ Uraija atama fʼu che anede ewa onu Ehaz kʼi akwo Damaskus wa.

¹² Tak e̩gba kʼonu kwo Damaskus wa, onu fʼubo̩ iche̩bo̩ le̩ li, oñ onu te̩me̩ru ubo̩ iche̩bo̩ le̩, i la fʼiche̩bo̩ che oji-wñ.

¹³ Tak i ño̩ fʼe̩wñ e̩gujo kʼi du wa gujo oji-wñ, kpai e̩wñ ele-wñ. I la mʼiche̩bo̩ omi-wñ du danyʼu, i laño̩ fʼe̩bie̩ iche̩bo̩ ure̩do̩-wñ tafio̩ oji ubo̩ iche̩bo̩ le̩.

¹⁴ Tak i mʼubo̩ iche̩bo̩ ebije ekpikpa kʼi dʼo̩gba Jihofa le̩ du kwʼo̩gba unyi le̩, wa, owñ chʼekwʼagbagba ubo̩ iche̩bo̩ e-wñ kpai unyi Jihofa, oñ i mʼu du gugu o̩wo̩ o̩pata ate̩ ubo̩ iche̩bo̩ e-wñ le̩.

¹⁵ Tak onu Ehaz ñwa ñw Uraija atama kakini, Uwe̩ agu e̩wñ iche̩bo̩ e̩gujo e-odudu kpai iche̩bo̩ ele olane̩, kpai iche̩bo̩ e̩gujo e-onu, kpai iche̩bo̩ ele-wñ manyʼiche̩bo̩ e̩gujo e-amone̩ ane̩-i chaka, kpai iche̩bo̩ ele-ma, kpai iche̩bo̩ omi-ma jo oj ubo̩ iche̩bo̩ lile-i; uwe̩ la atʼe̩bie̩ e-iche̩bo̩ e̩gujo chaka kpai e̩bie̩ iche̩bo̩ chaka ño̩ oji-wñ; ubo̩ iche̩bo̩ ebijeikpa le̩ muda ado̩mo̩ ñwu mi kʼu tene ugbo-wñ.

¹⁶ Abe̩le̩ Uraija atama che teju alu du kʼonu Ehaz ñwa ñw u.

¹⁷ Tak onu Ehaz mʼoli o̩ka-wñ ko̩da tinyo̩, oñ i mʼukpachi ugwo̩wo̩ du bʼoji-wñ te̩, i la mʼohimini-wñ du tane̩ bʼubi amokuno̩ e-ebije ikpa le̩ te̩, oñ i mʼu du gugu oji ajita okuta.

¹⁸ Tak i mʼo̩na e-o̩jo̩ uñmi e-ki nʼojokunyi ku ma ko̩ ef unyi le̩, kpai ugbo kʼonu agudu wa rida tʼunyi Jihofa, todu onu Asiria.

¹⁹ Oñ o̩la Ehar kibo̩, inabali-wñ che̩ko̩ rʼef o̩takada Iko E̩wñ Amonu Juda n?

²⁰ Tak Ehaz cholu manyʼamata-wñ, oñ ma mʼu du ji manyʼamata-wñ ef ewo Defid; taku He̩ze̩kaya o̩ma-wñ jʼonu koji-wñ.