Santiago 2 - Táurinakene máechejiriruwa’i ema Viya tikaijare

Échapawaicha wa'i ekuepurukaka

¹ Nuparapenaveana, eti é'ikana'i ema máitupajiji'akene'i Viákenu Jesucristo, wa'i táurika'ini épurukaka'ini naye'e ena echamuriana ejákapakeneanaya.

² Étaipa te natiari'inapuka nákani nasiapaucha'e te iúrujisirarewana, wa'i makarichuima'i tiuri eta ejakapiraya mákani tiúrina'apa'i eta makamuiri'aira'i, tikasurutijapa'ipuka eta uru, éneichuware ejakapayare mákani paure, tévichiji'apa'ipuka.

³ Taicha téjekapawa'i eta epanereruana, te makarichu'i mákani tiúrinamuiri'apa'i, échapajirika'i eta ekaejasira'i, mákanisera paure, te wáipapuka ekuechejirika'i, wáipapukaini ekuijaraka'i eta máejasi'a, tasapi'a ewanekainapapuka téja'apaika.

⁴ Eti, waipa étupikawaima'i eta juka enerejisirawakaichucha nákani ejákapakeneanaya.

⁵ Némunarukeneana nuparapeneveana, esamanucha'a. Ena páureana'i te juka apake'e, majakapawaka'i ema Viya, táichavene'i eta nakasiñaira'i. Ena, tiápajupanawana'i eta náuriwaya taicha ena tikaikuchiana'i eta máwasa ema Viya, taicha machanerana'i. Nakachaneyare'i ena apamuriana témunakana'i ema;

⁶ Étisera ewara'apa ímitsiri'awaka ena páureana, nasapi'apa échapajirika'i ena ríkuana. Takutipa wa'i ímatiwaka'ini eta náemeratasira'eipa.

⁷ Tikuti'ipaware wa'i ímatiwaka'ini eta nakaeka'ira'i ema Cristo, nakaeka'iware eta iámira'i eta máijare takapika'ukene'i.

⁸ Eti, yátupiya ítaucha eta tikunachakarepana'i mawanairipi ema Viya taye'e eta Takapika'ukene Ajureka. Ani taka'e'i: “Pémunakayare ema piparaepiya tákuti eta pémunasirawa'i píti.”

⁹ Té'esera enerejikaichucha nákani émunaruana'i, ekapekaturaichucha eta emasuapira'i eta mawanairipi ema Viya, eta tiviucha'eya.

¹⁰ Taicha te natiari'ipuka nákani naitaucha tamutuyareni eta wanairipiana, té'esera apaesaichu eta néjekapirawa'i, étapa tiviucha'i eta náikuñayare, tímikutijirikawa'i wa'i náitaucha'ini.

¹¹ Taicha ema Viya, ani taka'e'i eta mawanairipi'i: “Wa'i pikuve'a esu apana esena. Wá'isera pikukapareka.” Piti, te wá'ipuka pive'a'ini esu apana esena, pikapareka'iserapuka, piáviraichu'i pikaviurewa'i, taicha wa'i pisuapa'ini eta mawanairipi ema Viya.

¹² Eti iúri'aine'i ejakapara'i'ini naye'e namutu, táuri'ini eta échejirisirawana. Wa'i ekuemitisika eta tatiari'iraya eta sache ekayasere'iraya taye'e eta juka wanairipiana. Étara tétupirika'avi'i.

¹³ Taicha nákani majapanuraira'ana'i naye'e nákani apamuriana, tájinaware najapanukarewaima'i te nakayasesere'ipa. Nákanisera tijapanura'iana'i, ichape eta najakapakarewanaya me Viya te jena sácheyare.

Vímerekaya eta visuapajiraiwaya étapa eta vikaemataneasiraya ema Viya

¹⁴ Nuparapenaveana, ¿tajina taichakenena eta waka'e'ini viti vikasiñawa me Viya, étasera eta vitaresira wa'i vimereka'ini eta vichakeneana'i? ¿Tarata'apuka katiucha'avi eta vikasiñawaira'i?

¹⁵ Nuwara'a nímikutichina'eyare, te marari'ipuka mákani vichamuri tikamunuwa'i eta mamuiri'arapi, manikakenerepipuka te sacheana,

¹⁶ Tási'a mákani echamuri'i, tépiyakawa'ipuka tijapanura'i'i, máicha'ipuka: “Eyanasamine, taurini eta epaisira, te pikasarecha'ipuka pépakuchawa, te péku'apuka, pinika”, tási'asera te wa'i máijaraka'ini eta makamunukene'i, tamapurujichucha eta máichira'i.

¹⁷ Ene vika'e viti vikasiñawana me Viya: te wa'i vícha'ini eta táurikeneana, te wa'i vímereka'ini eta vichakeneana'i tamapurujichucha vikasiñawaira'i, waipa tásuapakare'ini.

¹⁸ Áninapapuka eka'eyare: “Piti yátupi eta pikasiñawaira'i me Viya, nutisera nimereka'i eta nichira eta taurikeneana. Pimechanu eta pikasiñawaira'i me Viya, tajinasera picha'ini eta taurikeneana, nutisera nimechaviyare eta nukasiñawaira me Viya, étapa eta nichira eta taurikeneana.”

¹⁹ Piti pisuapa'i eta émanairaichu'i ema Viya, tiuri'i eta picha, apanasika ena éreanana nasuapa'iware eta matiari'ira'i ema Viya, tiyayakareana'i eta napisira.

²⁰ Takuija eta maetupikushiravina, tási'a péchawa eta pikasiñawaira me Viya, wa'i takachanéma'i eta vichira eta taurikeneana, eta juka vikasiñawaira tajinachucha taimikatarapina, wa'i tiuri.

²¹ Nuwara'a némecha'e maye'e ema viáchukaini Abraham, eta akane, émaipa makaitsamaraji'i ema Viya, te yátupi'ipuka eta masuapajiraiwa, mawaneka'i máechatinukayare'i ema machicha Isaac, taka'e, ema Abraham, máechatinukayarepaini ema machicha, máimeresirayare'i eta masuapajiraiwa'i yátupi, eta taka'e, ema tétavikawa'i eta majakapakarewa'i maye'e ema Viya.

²² Étara íkutiaraya eta juka yatupira'i makasiñawaira'i me Viya ema Abraham, wa'i máeñama'ini ema machicha eta mawaraira'i máimerekayare eta makasiñawaira'i me Viya.

²³ Taicha eta táechejiriruwa'i eta Takapika'ukene Ajureka, ani taka'e'i: “Ema Abraham masuapa'i ema Viya, taka'e ema Viya tétavikawaine'i eta majakapaira'i ema eta mauriwa'i.” Taka'e ema Abraham tetavikawa'i eta maemunasira'i ema Viya.

²⁴ Ákaikutiara yátupina eta juka, viti achaneana vijakapakare me Viya táichavene eta vímeresira eta visuapira'i, wa'i tarata'a eta vika'eira, nuti nukasiñawa me Viya.

²⁵ Níminekapaekene'a'e eta akane taka'e'iware eta súchukuira'i esu esena tú'usikeneni'i tikaijaru Raháb, esu, tikatiuchawaka'i ena wanairukana'i maye'e ema víyara'a Josué, suímikatakawaka'iware eta náitujisirawayare'i tijunana naye'e ena tikaratakanayare'ini.

²⁶ Eta juka takuti'i eta viáke'e te tajunijika eta viáchanewa, enewanerine'i tésamirikawa eta viáke'e, tépenawaneyare'i, ene taka'e'i eta visiñawaira me Viya, eta taka'e eta te wa'i vikuimereka eta vichira eta taurikeneana.