Marcos 8 - Táurinakene máechejiriruwa’i ema Viya tikaijare

Ema Jesús máenika ena kamurikeneana achaneana

¹ Jena sache'i tiúrujikawanapa ichapemuri ena achaneana, tási'a tájinaware naviya'ini, eta nanika, ema Jesús máichu'awakapa ena máimitureana, tási'a máichawakapa:

² –Nujapanuwaka ena nani achaneana, taicha mapanapa sache eta naka'e'i ani nuye'e, tási'a tájinaware naviya'ini eta nanika.

³ Tási'a te néwatakawaka, machu naviraji te achene, taicha natiari'i ena tiási'ana'i te tiyere'i.

⁴ Ena máimitureana najikapapa: –¿Távi'apuka viviya'ini eta vénimuri'a ena nani eta te juka tájina vítusiawaima'i eta tinikakareana?

⁵ Ema Jesús mayaserekawakapa: –¿Áyanacha'a eta pan iámakeneanapa'i eti? –Siéteine –najikapapa ena.

⁶ Taka'e, makawanairipipa eta náeja'apaimuri'a'ini te apake'e namutu ena achaneana, mave'apa eta siétekene pan. Ma'asulupayachapa ema Viya. Mayuvetukapa, máijarakapa ena máimitureana. Apaesa ena, náijarakawaka ena achaneana.

⁷ Tatiari'iware eta jímachichana ma'asulupayachaware ema Viya. Tási'a mawanekapa eta náijarasirawakayare ena achaneana.

⁸ Namutupa tinikana'i, tisatu'eanapa. Tási'a nañupaikapa eta náemacharajiana, siete'i sáyeana.

⁹ Ena achaneana tinikana'i táetavika'i eta cuatro mil keneana. Taka'e te tamutupa eta juka, máewatamuri'apa ena achaneana nayana nachawa te napenana.

¹⁰ Taka'e ema tiáwaku'apa te pakure, tási'a énapa ena máimitureana, tiyananapa eta te awasare tikaijare Dalmanuta.

Ena fariséuana nawara'a naima'a eta tiaramikareana

¹¹ Títekapanapa ena fariséuana. Tépanawanapa nakanarajirika'i ema Jesús. Tási'a nawara'apa naimiakipaikaya'i, nayaseakapa máimereka'ni eta tiáramikareana, te yátupi'ipuka wanairuka'i me Viya.

¹² Tási'a ema, tichuruamichawaine muraka. Taka'e, máichawakapa: –¿Tája'a takayema eti achaneana eyaseakanu, nímereka eta tiáramikareana? Mavine'ipukani ásapi'ani nimecha'e'ini eta tiáramikareana.

¹³ Taka'e, majunijikawakapa ena, tiyanawarepa tiáwaku'a te pakure. Tiyananapa tiánuekana te apachara eta kákiure.

Eta naimiturapi ena fariseona

¹⁴ Taka'e, náemitisika'i ena máimitureana eta naniruruku'a. Tatiari'i'isera eta étana'i pan eta te pakure.

¹⁵ Ema Jesús, máimitumuri'apa ena, máichawakapa: –Íma'a échapawa taye'e eta lewadura naye'e ena fariséuana etapa eta lewadura maye'e ema Aluresi.

¹⁶ Taka'e, jajairikakanapa ena máimitureana. Eta eta naémitisisira'i eta pan.

¹⁷ Ema Jesús máimatiakawakapa, tási'a, máichawakapa: –¿Tája'a takayema'i eta eka'echejiriruwa'i eta émitisisira'i eta pan? ¿Wícha'akaru ákaikutiara'ini wa'iware epanerecha? ¿Enasikene murakasamure'e?

¹⁸ ¿Ekauki'a wa'isera imairika, ekakiña wa'isera esámara'i? ¿Wa'ikene échawa?

¹⁹ Wá'iware écha'ini eta nukaejapasira'i eta sinsukene pan, naniru'i ena sinku mílkeneana achaneana, ¿áyana'i sáyeana eta náemacharajiana eve'akeneana'i?. Taka'e, najikapapa: –Doce sáyeana.

²⁰ –Étapa eta siétekene pan naniru'i ena cuatro mil keneana achaneana ¿Áyana'iware saye eta náemacharajiana'i eve'akeneana'i?. Najikapaware: –Siete sáye.

²¹ Taka'e, máichawakapa: –¿Wícha'akaruwa ákaikutiara?

Ema Jesús makanaraka ema achane púchuki te awasare Betsaida

²² Taka'e, títekapanapa eta te awasare Betsaida. Ánaki, námapa ema achane púchuki. Náechejiuchapa ema eta makanarasiraya ema Jesús.

²³ Taka'e, ema Jesús makaratawauchapa ema púchuki, mámapa te tachachaku eta awasare. Taka'e, mayaji'aukichapa eta mátuture eta te máuki'ana, manakapa eta mawa'uana eta te machuti, mayaserekapa te timairikapapuka apaesachicha.

²⁴ Taka'e, téseninikapa ema púchuki, maka'epa: –Nímairikapa apaesa. Eta nímaira'i ena achaneana, tikutima'ichuchasera yukukiana, tipaikana.

²⁵ Taka'e, ema Jesús mápechaware manaka eta mawa'uana eta te máuki'ana ema púchuki. Te mave'apa eta mawa'uana, yátupipa tijara'ipa eta máimairisira'i. Tamutupa máima'a.

²⁶ Taka'e, ema Jesús mawanekapa ema púchukini'i, mayanapa te mapena, máichapa: –Wá'isera pikusiapa te jena awasare eta piyani'aya.

Ema Pedro máimereucha ema Jesús émaira'i ema Cristo

²⁷ Te táekenepa eta juka, tiyanawarepa ema Jesús, tási'a énapa ena máimitureana. Nakaiju'epa te awasarechichana, te tinapaika te Cesarea, máepiyaru'i ema Filipo. Te achene, ema Jesús mayaserekawakapa ena máimitureana: –¿Tája'a nakayema ena achaneana. Nája'apuka tímijachanuana'i nuti?

²⁸ Ena najikapapa: –Ena apamuriana náimijachavi'i ema Juan Tíkachasirikara'i tichawa'i téchepuka'i. Ena apamuriana tímijachaviana'i ema profeta Elías, tási'a ena apamuriana tímijachaviana'iware ema mákani apana profetaini.

²⁹ –Tasi'a eti, ¿nája'a ímijachanu'i nuti? –Mayaserekawakapa. Ema Pedro majikapapa: –Pítira yátupikenevi'i Cristo.

³⁰ Émasera ema Jesús, matuparakawapa muraka, eta nakuija nakumetaka eta émaira'i ema Cristo.

Ema Jesús tímereuchawa eta máepenirayare

³¹ Ema Jesús, tépanawapa máimitukawaka'i eta táichararakawayare eta máepenirayare. Ema Machicha ema achane, matupara'aichu'i ichapemuri eta makatajiwairayare, náepuruyare'i ena naiyakarana, enapa ena tachutiri'ana naye'e ena tiyujarakara'iana enapa escriwánuana. Mametakapa ena eta náimikapakayare'i, mapanayaichu'isera sache eta maka'eyare'i eta maepenirayare'i, tási'a tichawayarepa téchepuka.

³² Eta juka, máimikaecherachapa eta makayemakene'i. Taka'e ema Pedro máiputsikapa, mámapa makarichu'i, tási'a tépanawapa makajacha'i.

³³ Émasera ema Jesús tichawapa, máesenikapa ena máimitureana, tási'a makajachapa ema Pedro, máichaipa'i: –¡Péwisi'atataji te nuye'e piti Wínaraji! Piti wa'i pikaikutiara eta mapanereru ema Viya, etachucha pimararaka eta naicharakawa ena achaneana.

³⁴ Taka'e ema Jesús máichu'awakapa ena máimitureana, tási'a énapa ena achaneana. Tási'a máichawakapa: –Nákani nawara'a náe'ikanu, takamunu náinajikawa tamutu eta ti'apapirikawaka'i, náijarakawa eta táimikapasiraina eta náe'isiranu'i.

³⁵ Taicha mákani téñama'i eta máitaresira, émajiwayare tikamitiekene'awaya. Émasera mákani jachapa'i eta Arairu téchakare, tíjarakawa'i eta máe'isiranuyare, ema tiúchuku'aya.

³⁶ Tájina taiturena mákani achane takaeñamararu eta maima'akeneana te juka apake'e.

³⁷ Taicha éneichuwa, wa'i márata'aima'i mákani achane mawachacha eta maítaresira.

³⁸ Énaipa nákani timitsiri'anuana'ipuka eta náe'isiranu'i, étapa eta nímiturapiana, te namira'u ena achaneana tikapekaturara'iana, eneichuware ema Machicha ema Ajaira titsiri'ayarewa. Te jena sácheyare, námainapaipa eta nujaraiwa, étapa eta majaraiwa ema Tata. Nukachanénapaipa ena Santuana ángeleana.