Marcos 10 - Táurinakene máechejiriruwa’i ema Viya tikaijare

Ema Jesús tímitureka'i máechejisi'a'i mákani achane tínajika'i esu mayena

¹ Ema Jesús tiuchukapa taye'e eta Cafarnaúm, tási'a tiyanapa te Judea, tinapaika te táuchusine eta sache, apachara eta Jordán. Ánaki tiápechawanaware tiúrujimuriawana ena achaneana, tási'a ema tepanawaware tímitureka'i.

² Natiari'isera ena fariséuana, napauchapa ema Jesús, tási'a natanuka'i eta tiviuchayare'i ema, nayaserekapa táurikapuka máinajika ema achane esu mayena.

³ Ema Jesús majikapawarepa: –¿Tája'asika eta mawanairipi ema víyara'aini Moisés?

⁴ Najikapapa: –Ema víyara'aini Moisés máisapa'i eta náinajisira esu mayena. Makawanairipisera májucha eta Ajureka, eta náinajikakairaya.

⁵ Taka'e, ema Jesús máichawakapa: –Ema víyara'aini Moisés tijaraka'e'i eta juka mawanairipi taichavene eta emurakasamurewa taka'e majucha'i eta juka.

⁶ Te'esera te taepaninewa, ema Viya maepiyakapa ema achane esupa esu esena.

⁷ Eta taka'e mákani amaperu achane majunijikainapa ema maiya, esupuka esu maena típutsikawainapa te mave'apa esu mayenayare.

⁸ Énajiwainapa títátikakanayare. Eta nave'akakaira'i, tímikutijirikawaipa étanaine'i eta náke'eana.

⁹ Eta taka'e, ema achane wa'i taurika'ini eta mainajika'ini esu mayena, taicha emakene'i ema Viya tímive'a'i.

¹⁰ Te táekenepa, ena máimitureana nayaserekapa ema Jesús eta taichararakawa'i eta juka máechejiriruwana'i.

¹¹ Ema Jesús máichawakapa: –Te máinajikapuka esu mayena mákani achane, eta maviraya esu apana esena, tikapekaturaipa'i ema me Viya. Ichapeware eta máejekapirawa'i suye'e;

¹² takutikene súkani esena, te suínajikapuka ema suima, eta suviraya ema apana achane, tikapekaturaipaware ichape esu.

Ema Jesús mayujaraucha ena amuyana

¹³ Taka'e, námawakapaipa'i ena amuyana eta maye'e ema Jesús. Nawara'a'i máemama'akawakayare'i, énasera ena máimitureana tepanawanapa nakájacha'i ena tiámanapa'i ena amuyana.

¹⁴ Te máima'apa ema Jesús eta juka, tisemapa, tási'a maka'epa: –Ésamirikachucha ena amuyana, náitekaicha'a eta nuye'e. Taicha eta mawasa ema Viya akenuka te anuma, naye'eyare'i ena nani nakutiana'i ena.

¹⁵ Nutupiruwa numetaka'e, mákani wa'i makukuti ema amuya eta masuapajiraiwa, wa'i tisiapaima'i te mawasa ema Viya akenuka te anuma.

¹⁶ Taka'e, majupakawakapa ena amuyana, máemamasikawakapa, tási'a mayujarauchawakapa.

Ema achane riku téchejirikawa maye'e ema Jesús

¹⁷ Te tiyanayarepa ema Jesús tipaika, maka'epainecha ema émana achane. Tijunapapaipa'i matupirupa máepuyumiraucha te mamira'u ema, tási'a mayaserekapa: –Tata maestro, ¿tasája'apukaini nícha'ini eta taurikene, apaesa máichekuarakirena'ini eta nítaresira?

¹⁸ Ema Jesús majikapapa: –¿Tája'a takayema pímijarechanu piti piúrikene? Émanaichu ema Tiúrina: ema Viya.

¹⁹ Pechaipa eta mawanairipiana: ‘Wa'i pikukapareka, wá'iware pikuve'a esu esena apayena, wá'iware pikuamereka, nakuija pepiyáekeneruina, wá'iware pikuwayuareka, pipikauchayarewa ena tikachichaviana.’

²⁰ Ema achane máichapa: –Maestro, tamutuipa'i eta juka nítaucha'i eta námaperuwa'i.

²¹ Ema Jesús máimararakapa, máemunakaine'i, tási'a májikapapa: –Jukaicha'a'i eta pítauchakeneyare: piyana, píjararekaya tamutu eta píma'akeneana, tási'a píjarakawakapa ena páureana. Jé'eware eta pijakapayare eta píma'akeneyare te anuma. Tási'a pitekapa pé'ikanu.

²² Ema achane teñamawaine'i eta masamira'i eta juka, tiyanapa katisamurewaine'i, taicha ema mawayucha'i eta marrikuwa'i.

²³ Ema Jesús máesenikapa ena tichayakana'i, tási'a máichawakapa ena máimitureana: –¡Máitujianaya eta nasiapiraina'ini ena ríkuana, eta te mawasa ema Viya akenuka te anuma!

²⁴ Ena máimitureana náramine eta nasamira'i eta máechejiriruwana. Tási'asera, ema Jesús mápechawakapa máicha'i: –Nuchichanaveana, ¡máitujianaya eta nasiapiraina'ini te mawasa ema Viya akenuka te anuma!

²⁵ Maejerarepana eta tasiapira eta vipera camello taye'e eta ánikuchicha tapaja, eta masiapiraina'ni ema achane riku taye'e eta mawasa ema Viya akenuka te anuma.

²⁶ Eta nasamira'i náramine'i ichape, tási'a énaikakapa yaserejirikakana: –¿Tási'a nája'apapuka títujikawanayare tiuchuku'ana?

²⁷ Ema Jesús maímararakawakapa, tási'a majikapapa: –Nájina émanaina achane émajiwaima'ni tikuchuku'awa, émasera ema Viya, makarichu marata'a tikuchuku'a'avi.

²⁸ Ema Pedro, tépanawapa máicha: –Vítisera, vinakika'i tamutu eta vikaye'ekeneanaini, viwaraira'i vé'ikavi.

²⁹ Ema Jesús májikapawakapa: –Nutupiruwa numetaka'e, namutu nákani nakikana'i eta napenana, najunijika'iware ena tikachichana, ena naparapenaveana, ena nayenana, ena nachichanaveana, étapa eta naye'eana apake'e, táichavene'i eta najachapira'i eta Arairu téchakare,

³⁰ najachapayare puiti, kamuripanayare ena naparapenaveanaya ajairana, énapa ena esenana, ena náenana, ena nachichanaveana, étapa eta naye'eana apake'e. Tási'a te táitekapapa te apana víitaresira tavetijinapa, máichekuarakirenapa.

³¹ Tási'asera mavera'e eti etiari'ikeneana'i puiti. Te jena sácheyare, ichapepanainapa eta ekapika'uiraya. Ena puiti tikapika'uana'i, te táitauchawapa te jena sácheyare, énapawainapa tékene'anayare.

Ema Jesús tiápechawaware máechejisi'a eta máepenirayare'i

³² Nakaiju'epa'i te Jerusalén, ema Jesús tínapukapa'i naye'e ena máimitureana. Ena náramine'i, tási'a ena tékene'anapa'i tipikanaine'i. Ema Jesús mapechaware maichu'amuri'i ena dósekeneana máimitureana, tási'a tépanawapa máichawaka'i eta máichararakawayare'i.

³³ “Íma'a puiti eti, vikaiju'eyare te Jerusalén, ánaki nakaratakainapa ema Machicha ema Ajaira. Ena tikaratakanayare, énayare ena tachutiri'ana ena tiyujarakara'iana, tási'a énapa ena escriwánuana, naíjararekayare naye'e ena suntaruana rumanuana, énainapa tikapakanayare,

³⁴ nakaeka'inapa ema, nátutukichainapa, nae'ainapa, tási'a naemetatarekainapa te crusu, tási'a te taekenena'i eta mapanakenenapa sache, téchepukainapa te maékari.

Ema Santiago émapa ema Juan nayaseakapa ema Jesús eta makájupa'awaka'ini ena

³⁵ Ema Santiago, tási'a émapa ema Juan, machichanaveana'i ema Zebedeo, témeña'awanapa maye'e ema Jesús, tási'a náichapa: –Tata maestro, viwara'a pikatajika'avi'ini eta viyasearuviyare.

³⁶ Ema mayaserekawakapa: –¿Taja'a ewara'a etiana?

³⁷ Naichapa: –Te jena sácheyare te péjakapa te piáwakureyare akenukavirayare viwara'a pikaejaka'avi'iwareni te pichakaya, pijupa'a'avina'ini, véjaka'ini te piwaure, ema émana te sapa.

³⁸ Ema Jesús májikapawakapa: –Eti, wa'i echa eta eyasearapiana'i. ¿Erata'a ijarakawa eta ekamichiraina, eta ekatajiwairayare, ekutinuyarepuka nuti, tási'a eta ejachapirayare eta ikachasiyare, tákuti eta nujachapakeneyare nuti?

³⁹ Ena najikapapa: –Virata'ayare. Ema Jesús máichawakapa: –Eti, yátupi ichape eta ekatajiwairaya, vikutikakaya eta nakapasira'aviyare,

⁴⁰ étapasera eta éjasirayare eta te nuchakaya, waipa nútina necha nukaejaka'e'ini. Ema Tata nukaiyakene, éma'i tinerejikayare'i ena nujupa'anayare.

⁴¹ Taka'e, eta nasamira'i ena diéskeneana máimitureana, tisemanapa naye'e ema Santiago tási'a émapa ema Juan.

⁴² Émasera ema Jesús máichu'awakapa, tási'a máichawakapa: –Échaichu'i eti, ena akenukana taye'e eta awasare, muraka eta nakawanairipira. Énaipa ena tachutiri'ana narari'i, tétavikawa'i tisuapakareana'i eta nakawakurera'i ena.

⁴³ Wá'isera ekuka'e eti, naye'e ena echamuriana. Mákani tímerekawa'i tikapika'upana, takamunu'i máitatiwakayare ena apamuriana,

⁴⁴ tási'a te etiari'iwarepuka eti ewara'a'i ínapuka, takamunu'i nawanara'eyare'i ena apamuriana.

⁴⁵ Taicha, wa'i étaina tímiteka'ini makaitatikasi'ini ema Machicha ema ajaira, émayare'i títati'e eti.

Ema Jesús makaimairirika ema púchuki tikaijare Bartimeo

⁴⁶ Titekapanapa te Jericó. Tási'a te tiuchukayarepa te awasare, makachanewakapa'i ena máimitureana, tási'a kamurianapa'i ena achaneana te'ikanapa'i. Matiari'i'i ema púchuki, téjaka'i te achenechakaya, ema tikaijare Bartimeo, machicha ema Timeo.

⁴⁷ Te masamapa, eta émaira'i ema Jesús mapiarakapa: –¡Tátachicha, pítikeneipa'i yátupikenevi'i Cristo, pikatajikanupaini pájapanunu'ini!

⁴⁸ Namutu, ena natiari'ikeneana'i nakáwakapa, apaesa mamatina'ini, émasera tipiaraikapanapa muraka: –¡Tátachicha, pítikeneipa'i yátupikenevi'i Cristo pikatajikanupaini pájapanunu'ini!

⁴⁹ Taka'e, ema Jesús eta masamira'i, titupi'apa: –Íchu'a. Náichu'apa ema púchuki, náichapa: –Pétumechawa, taicha tíchu'avipa.

⁵⁰ Eta mananesiwa'i ema púchuki makamirikapa eta máepaku'a, tási'a, tiyanapa mapaucha'i ema Jesús,

⁵¹ taka'e, mayaserekapa: –¿Tája'a pikamunu nuye'e? Ema púchuki majikapapa: –Tátachicha, nuwara'a pikaimairikanupaini.

⁵² Ema Jesús máichapa: –Táichavene'i eta pikasiñawaira'i me Viya, pinarakapa puiti. Enurujine'i tímairirika, taka'e, máe'ikapa makachanepaipa ema Jesús eta mapaisirapa'i te achene.