Hechos 4 - Táurinakene máechejiriruwa’i ema Viya tikaijare

Ema Pedro émapa ema Juan te namira'u ena tuparairukana

¹ Téchejikanaicha'a ema Pedro ema Juan te namira'u ena achaneana, títekapanapa ena tuparairukana, énapa ena tímiturekara'iana tikaijareana saduceoana. Námapa'iware ema nákenuru'a ena tasuntarurana eta templo.

² Tisemanapa taicha wa'i náurika'ini eta nasamairirisira'i ena apinana apústuleana náimitusira'i ena achaneana. Wa'i náurika'ini eta nametasira'i eta yátupikenera'i eta máechepusira'i ema Jesús te máekari, mápechirawa'i títareka.

³ Taka'e, nakaratakawakapa, náimisiapawakapa te nakaeratairare. Wáipasera nakayasesere'i'ini, taicha kapere'ichíchaine'i. Tiámainukawapa te apanapa sache.

⁴ Kamurianasera ena tisuapana'i táichavene'i eta nasamararasira'i eta náechejiriruwa'i ena apústuleana. Eta natupa'i ena té'ikanaipa ema Viákenu Jesucristo sinku mil ena achaneana ajairana. Kamurianaware ena esenana énapa ena amaperuana.

⁵ Te apanakenepa sache, tikurujikakanapa te jerusalén ena tuparairuka nakenumuri ena juriyuana, ena naiyakara'ana enapa ena escriwánuana.

⁶ Matiari'i'iware ema akenuka Anás, emapa ema Caifás, ema tikaijare'iware Juan émapa Alejandro, natiari'i'iware ena apamuriana machichanaveana ena akenukara'ana.

⁷ Taka'e, náemepanapa ema Pedro ema Juan te nakaeratairare, nakatupiakapa te namira'u, nayaseserekapa. Ánipa naicha: –¿Nája'a tiwaneka'e'i icha eta juka nája'a ema tíjaraka'e'i eta ítupajijiasirawa'i?

⁸ Taka'e, ema Machanewa Viya máimikataka'i ema Pedro eta majikapira'i ena tiyaserekana'i, ánipa maka'e: –Tátanaveana akenukara'ana víyakarana te juka viáwasa.

⁹ Ewara'a echa eta juka táurikeneana táicharakawa'i eta vikanarasira'i ema maka achane makajumakeneni'i.

¹⁰ Vimetaka'eyare puiti, viwara'a vémecha'eyare, eti énapa ena achaneana te juka viáwasa Israel. Ema maka achane, íma'akene'i eta manarasira'i, viwara'a vímimaticha'e eta máitupajijiasirawa ema Jesucristo ema Nazareno takanaraka'i eta vipiarasira'i te máijare ema, émetataru'i te crusu, ekaparu'i, émasera ema Viya makaechepuka'i te máekari.

¹¹ Eti, épuru'i ema Jesús, ema manerejirukene'i ema Viya. Puiti, ekutipa ena máitukara'ana tépiyarekana peti, náepurupuka eta tatumekene esuiki táesuikirayare'ini ta peti puitisera etapa ichape'i taetumeara'i.

¹² Najina apanaina makuti'ini nakatiucha'avi'ini, taicha ema Viya manerejiru'ichu'i ema Jesús eta makuchukuira'aviyare. Nájina apanaina manerejiruina'i te vimuri viti achaneana eta te juka apake'e.

¹³ Taka'e, ena tuparairukana náramine'i eta náitusira'i téchejikana ema Pedro ema Juan, tájina wa'i napikakarakawa'ini, ena naka'epa, nani tájina náitukakenena eta letra, máiturereana'i, tájina náimatiya'ini eta viye'e escuela. Máijarakawaka'ipuka ema Jesús eta náitupajijiasirawa'i te makachanewakaicha'a ema.

¹⁴ Tájina naviya'ini nakayema, taicha matiari'i ema achane masarini, titupi'a'i te namira'u. Taicha náima'a'i eta yátupira'i eta manarasira'i.

¹⁵ Taka'e, nawanekapa eta nakuchusiraya ena apústuleana eta te náurujisiawa'i. Nanasipa ena akenukana téchejirikawanaipa énajirikakanaipa.

¹⁶ Naka'epa: –¿Tája'a vícharakawayare naye'e ena nani? Taicha namutu ena achaneana tikawasana'i te juka Jerusalén náecha'i eta náichira'i ena nani eta tiáramikare. Tási'a, wa'i visuapakarema'i te vépiyaekene'awaka.

¹⁷ Wá'isera táwara'a vísapa náimiyanawa náimitureka naye'e ena achaneana. Vípikararekawakaya, apaesa wa'i nakuimiyanawa náechejisi'a eta máechepusira'ipuka ema Jesús.

¹⁸ Taka'e, nakasiapawarepa ema Pedro ema Juan. Naichapa ena, wa'i viwara'a ímiyanawa échejisi'a eta juka, wá'iware ekuimitureka naye'e ena achaneana eta máechepusira'ipuka ema Jesús.

¹⁹ Najikapapasera ema Pedro ema Juan: –Ema Viya timetaka'avi eta véchejisi'airayare. Étisera ekatichapa véchejisi'a ema. Émakene'isera tisuapakarepana'i eye'e eti.

²⁰ Víti, wa'i vimatinaima'i eta véchejisi'airaya tamutu eta juka víma'akeneana'i visamakeneana'iware maye'e ema Viakenu.

²¹ Taka'e, ena tuparairukana, tisemanapa eta nasamira'i eta namasuapira'i. Taka'e, náipikararekapa. Tájinapasera náicharaka'ini. Nakaitikapa, tájina naviurewaina'ini. Taicha namutu'i ena achaneana nakunacha'i ema Viya táichavene'i eta náima'akene'i.

²² Cuarenta añuipa eta ma'añura ema maka achane masarini. Tétavikawa'i eta tiáramikarewa'i eta manarasira'i.

Ena té'ikana ema Jesús tiyaseserekana eta natumesamurewaina

²³ Eta náuchukuiraipa ema Pedro émapa ema Juan, tiyananapa eta te návi'a'i ena nachamuriana. Nametakapa tamutu eta nakatianasira'i ena tuparairukana.

²⁴ Te náechapa, ena nachamuriana tiyujarakanapa namutu. Ánipa naka'e: “Tata Viákenu, píti pépiyaka'i eta anuma, eta apake'e étapa eta ichape une. Pétupirika'i tamutu eta juka víma'akeneana'i puiti,

²⁵ píti pimetaka'i ema víyara'aini David eta májukunachiraya eta taichakenevi'i eta Machanewa ema Viya: ‘Taja'a takayema emáchanenejikawakapa ena achaneana. ¿Taja'asika eta epanerecha'i eti máetupikushiana?

²⁶ Ena reyeana, enapa ena akenukara'ana te juka apake'e tási'a tisemauchawanapa tikurujikakanapa nakapanereruya nakanaraya ema Tata, nakanarayarewa ema Cristo.’

²⁷ “Étaipa te juka viáwasa, tikutikaka'i eta napanerechira'i ema Herodes, ema Poncio Pilato, ena apawasana, énapa ena vijaneanana israelítana, nawaraira'i nakapaka ema santukene pichicha Jesús, ema pinerejirukene'i.

²⁸ Títauchawa'i naicha eta juka pipanereruana etairayare'i taka'eyare'i eta péchejiriruwana.

²⁹ Pítisera, Tata Viákenu, pímararaka'avi'i puiti eta náichira'avi'i viti piwanarana'i. Píjaraka'avisera vitumesamurewaina eta véchejisi'airaya eta péchejiriruwa.

³⁰ Píjaraka'avi eta vítupajijiasirawaina virata'airaina vikanaraka ena nakajumakeneana, vímeresiraina eta tiáramikareana táichavene'i eta vikasiñaira'i ema santukene'i pichicha Jesús.”

³¹ Te títapirikanapa eta nayujarasira'i, tíja'úchawapa tiyayakare eta apake'e te návi'a'i ena. Taka'e'i eta máwa'asirawaka'iware namutu ema Machanewa ema Viya, wáipasare napikakarakawa'ini eta náechejisira'i eta máechejiriruwa ema Viya.

Tikajikakana'i tamutu eta náima'akeneana

³² Namutu ena te'ikana'i, tisuapajira'iana'i, tikutikaka'i eta napanereruana eta nakajikakaira'i. Namutu nákani téchana'i eta náima'akeneana nakaye'ekeneana'i, wa'i nayawani'akaka'ini.

³³ Taka'e, tímiyanawana'i ena apústuleana eta náechejisi'aira'i eta máechepusira'i ema Viákenu Jesucristo. Máimikatakawaka'iware ema Viya, namutu ena,

³⁴ nájina émanaina'ini te nataraku máemepaurechawa'íni. Taicha ena tikaye'eana apake'e, pétipuka, náijararekapaipa, tási'a eta plata

³⁵ nanakikapaipa te namira'i ena apústuleana enapasera techanayare'i, náijarakawakayare namutu nákani kamunuwanapana páurepanana'i.

³⁶ Matiari'iware ema achane tikaijare José. Ema máuchure'i te tiúrupu'i te tikaijare Chipre. Ema maka José náumuriwaicha'a ena levitana. Ena apústuleana nanakapa eta máijare'i Bernabé (te véchejiriruwa tikaijare: “Tikaurisamurera'i”.)

³⁷ Ema maka achane máijararekapa eta mapenapa'ini. Tási'a, máijarakapa eta plata ena apústuleana.