Gálatas 2 - Táurinakene máechejiriruwa’i ema Viya tikaijare

Ema Pablo enapa ena apamuriana apústuleana

¹ Catorce áñuipa eta táetavisirawa'i, nupaenumawapa nápechawa'i nuchawa te Jerusalén, émapasera ema Bernabé nukachane'i, émapa ema Tito.

² Taicha numetakasiwa'i me Viya te nuwapure eta nuyanirayare'i taye'e eta Jerusalén. Ánaki etapa numetasi'a'i ena tachutiri'ana'i eta nukametarairuira eta maechejiriruwa ema Viya naye'e ena apawasana. Apaesa naecha yatupina eta nematane'i nuti

³ Énasera wa'i nákanesa'avi'ini eta nanaka'i eta vikutiarana, émaipa ema Tito apawasana'ineni ema.

⁴ Natiari'isera te viye'e viti ena maejiakawara'ana timijachawana vichamuriana'i, tiyumurukawana'i eta nasiapamurira'avi'i, enasera etachucha nawara'a'i na'apapikayare'i eta viuriwa'i maye'e ema viákenu Jesucristo, nawara'a'i timichawa'aviana vicha'ini eta naye'erepiana.

⁵ Tájinasera wa'i vísapawa'ini nakachuriaka'avi'ini, taicha víti viwara'a'i takuija'ini ta'apapika'e'ini eta é'isira'i eta Arairu maechejiriruwa ema Viya.

⁶ Taka'e, énaipa ena apamuriana náiyara'ana ena tikutinuana'i eta nupanereru'i, (nutisera wa'i nesacha necha eta naichararakawa'i, taicha ema Viya wa'i maima'a'ini eta vima'iana).

⁷ Ema Pedro matupara'a'i máimitusirayare'i ena israelítana. Ema Viya máijaraka'i eta máwakure'i ema apústule'i naye'e ena israelítana, maimituka'i eta Arairu maechejiriruwa, ene nuka'e'i nuti tíjarakanu'i eta náwakure'i apústulenu'i naye'e ena apawasana.

⁸ Émaichu'i ema Viya tiwaneka'i ema Pedro apústuleyare'i naye'e ena israelitana, taka'e nuti tiwanekanupa apústulenuyare'i naye'e ena apawasana.

⁹ Ema Santiago, ema Pedro émapa ema Juan tímiyanawanayare tímiturekana'iware ena israelítana, tépurunuanaichuchapuka eta náimairanu'i, tayanapanesera wá'ipuka nujakapakare'i naye'e eta apústulenuira'i, nútisera nécha'i eta manerejisiranu'i ema Viya eta apústulenuirayare.

¹⁰ Takarichu tituparaka'aviana'i eta vímikatasirayare'i ena páureana, eta taka'e'i puiti, nítaucha'i nuti eta nuwanekasiwa'i nímikatasirawakaya ena páureana.

¹¹ Te táekenepa, te jena áñuana'i, títekapaucha'avipa ema Pedro te awasare Antioquía, étasera eta mávi'aira'i viye'e, téjekapawainapa, eta taka'e, nukajachapa ema.

¹² Eta máitekapirapa ema Pedro, tájinaipa máichirawaina'ini eta masamirawa'i eta makachanejirisirawaka'i ena apawasana vichamuriana'i, tinika'i eta naye'e, taka'e, te jena sácheana, títekapanapa ena máemunakasareana'i ema Santiago, israelítana vichamuriana'iware. Te máima'awakapa ema Pedro, titsiri'apa ema eta makachanerawaka'i ena apawasanana vichamuriana'i. Waipa máwara'a'ini makasirikiwaka'ini. Tipika'i eta nakaeka'ira'i ena tímikapikauchana'i eta naye'erepiana'i ena israelítana.

¹³ Taka'e, ena apamuriana israelítana vichamuriana'i, énerichuware ena náe'ikapa eta máejekapirawa'i ema Pedro, térajikawanaware ena apanawa, émaipa ema Bernabé máe'ikawarepa eta naejekapirawa'i ena.

¹⁴ Taka'e, te níma'apa nuti eta naejekapirawa'i, wa'i táuri'ini eta náichakene'i, nukajachapa ema Pedro te namira'u ena vichamuriana taicha máejeki'apa eta tawanairipi'i eta yátupikeneana máechajiriruwana ema Jesús. Níchapa ema Pedro: “Piti juriyuvi'ineni, wa'isera pimikaecheracha'ini, ¿tája'a takayema puiti eta piwara'a pipamikawaka ena apawasana naicha'ini eta naye'erepiana ena juriyuana?”

Eta viuchukuiraya tiasi'a te vikasiñawa me Viakenu Jesucristo

¹⁵ Viti sera yátupikene'avi juriyu'avi'i taicha vimiuchure'i, wa'i wakuti'ini ena kapekaturara'iana apawasana.

¹⁶ Tasi'asera vecha'i eta najinaira'i emanaina'ini majakapakare'ini eta tauriwaina'ini eta maitaresira taichavenena'ini eta maitauchira eta wanairipiana, je'ewaresera makaini tikasiñawa maye'e ema Viakenu Jesucristo. Eta taka'e éneichuware viti visuapa'i ema Jesucristo, apaesa ema Viakenu majakapa'avi eta viuriwaina taichavenena'i eta vikasiñawaira'i, wa'isera etaparakaina eta vitauchiraina'ini eta wanairipiana.

¹⁷ Natiari'ipuka ena téjekapawana'i te napanereruana, ánipuka naka'e'i eta náechejiriruwa'i, yátupipukaji eta vijakapakare'i me Viya táichavenechucha eta vé'isiraya ema Cristo, ¿Vivetijinapaserapuka tiápajukawainapapuka eta visipekaturaiwaya taicha vínajikainapa eta wanairipiana, taka'e, émapapuka ema Cristo táemesiawaya eta vikapekaturaiwaya taka'enapapuka eta napanereru'i? ¡Wa'ineni taka'e'ini!

¹⁸ Taka'e te nepuru'ipuka eta wanairipi, tasi'apa eta tayerewa'i nuchawauchaware eta nepurukene'i, ichapepa eta nimereuchirawa eta nejekapirawa'i.

¹⁹ Puitisera timikutijikawaipa'i nepeneipa'i taye'e eta wanairipi taichavene eta waipa ne'ika'ini, taitsiwasera emapa ema Viya tikaitarekanu'i taicha emapa maepeninanu'i taye'e eta crusu,

²⁰ Eta nusuapira'i eta máepenira'i ema Cristo te crusu, nujakapakare'i me Viya, puiti, waipa nútijiwaina necha eta nítaresira'i, émapa téchanu'i ema Cristo tamutu eta nítaresira'i. Émapa nukasiña'i taicha yátupi'i eta makasiñakarewa'i taicha yátupikene'i Machicha'i ema Viya. Eta máemunasiranu'i, tímijararekawa'i níchavene'i nuti.

²¹ Wa'i némepururekaima'i nuti eta máemunasiranu'i ema Viya. Narari'isera ena tímijachawana'i tijakapakareana maye'e táichavenechucha eta nawaraira'i naitaucha eta wanairipiana. Ena nani, tímikutijirikawa'i náemepurureka'i eta mapanereru étapa eta máemunasirawaka'i. Tímikutijirikawa'i náemepurureka'iware eta máepenira'i ema Jesucristo te crusu.