2 Tesalonicenses 3 - Táurinakene máechejiriruwa’i ema Viya tikaijare

Ema Pablo mayaseakawaka eta nayujarauchiraina me Viya

¹ Títekapa, viwara'a puiti, eti nuparapenaveana, eyaseucha'avi te eyujarasirana. Tasuápakarewaina'ini muraka naye'e ena achaneana eta vimetarairuana máechejiriruwana ema Viya, tákuti'ini eta esuapirawane'i eti. Táitekapauchawane'ini ena tikawasana'i te tayere'ikeneana awasareana.

² Éneichuware, eyaseucha'avi makátiuchira'avina'ini ema Viya naye'e ena achaneana wínarajikeneana. Taicha kamuriana ena masuapajiraira'ana'i me Viya.

³ Wá'isera táeñamawakare'ini eta máuriwa'i ema Viya eta viye'e, yátupi'i eta máitauchira'i tamutu. Tétumecha'eyare ema, eta ímiyanawairaya. Tijaneaka'eyarewa maye'e ema Wínaraji.

⁴ Víti vikasiñawa'i eye'e eta esuapira'aviya tamutu eta vitupararu'eana'i, taicha eti é'ika'i ema Viákenu, táicha esuapaipa eta táinapureana'i vitupararu'eana'i kape juka.

⁵ Máimikataka'e'ini ema Viya eta ímatiraina etapa eta máemunasira'e'i. Máijaraka'ewareni eta etumewaina taye'e eta ekajapanurawaira'i.

Tatuparaka vikaemataneyare

⁶ Nuparapenaveana, te natiari'inapuka ena echamuriana'i plújuana, wá'ipuka náesacha'i tikaemataneana, te wá'ipuka náwara'a'ini náetumechawa'ini, nasuapa'ini eta vímiturapiana'i, viwaneka'e eti te máijare ema Viákenu Jesucristo, wa'i ekuemeña'awa naye'e.

⁷ Échaichu'i eti eta etupara'a'i ítusiraina ítatijirikawa e'isirayare'i eta viye'erepiana'i: víti te viávi'aicha'a eta ara eye'e. Wa'i plúju'avima'i,

⁸ wá'isera vinikairi'i'ini te epenana. Víti vikaematane'i muraka eta vítatijirisirawa'i. Tamutu sácheana, yátiana, vikaematane'i, taicha wa'i wáwara'a'ini vétsepanaraka'e'ini eta vinikakenerepi.

⁹ Tatuparaka'ineni viyaseaka'e'ini eta énisira'avina'ini, viwara'a'isera vímecha'eyare'i eta vikaemataneraiwana, apaesa étainaichu'ini é'ika eti.

¹⁰ Étaipa te vinasikeneicha'a eta eye'e, viwaneka'e'i: Wa'i ekuenika mákani wa'i mawara'a'i tikaematane.

¹¹ Puítipasera visamairika'i eta natiari'ira'i ena echamuriana tinerejikawana'i plújuana. Wa'i náesacha'ini tikaemataneana, tinikairi'iana'i. Tímiapitawairikawanapa'i te pétiana.

¹² Eti'i íchana'i eta juka, viwaneka'e te máijare ema Viákenu Jesucristo, yátupina táuri eta ekaemataneraina, eviyayare eta ekamunukeneana.

¹³ Eti apamuriana nuparapenaveana, wa'i ekuinajika eta táuriwa'i eta ekaematanerana.

¹⁴ Te natiari'inapuka nákani wa'i nakusuapa eta viwanairipiana'i te juka viajure'i, ekuneyare ena. Tási'a, waipa ekukachane ena, apaesa nátsiri'a ena nani eta namasuapajiraiwa'i.

¹⁵ Wá'isera ekukatichawaka, échejirikasera taicha echamuriana'i ena.

Ema Pablo mayujaraucha'i ena machamuriana

¹⁶ Ema Tata Viakenu, ema tiúricha'avira'i, máimiyanawa'ini máijaraka'eni eta iúriwaya tamutu jukana sácheana te epanereruana, taicha mawara'a'i eta iúriwaya. Ámutu'ini máwa'aka'e'ini.

¹⁷ Nuti Pablo, nútijakaruwapa nájucha eta juka táichekuaraki'i eta najure, apaesa ímati eta táima'i'i eta nuye'e letra nuwa'urupaji'i.

¹⁸ Nuyaseucha'eparaka'i emutu eti me Viákenu Jesucristo, táetaviucha'ini eta iúrikakarewaya máicha.