2 Tesalonicenses 2 - Táurinakene máechejiriruwa’i ema Viya tikaijare

Eta machavirayare ema Viakenu

¹ Puíti'ipa, nuparapenaveana, eta machavirayare ema Viákenu Jesucristo eta viurujusirawayare maye'e, puiti viyaseaka'e

² wa'isera ekuitsiwacha enewanena eta epanereruana, wa'iware ekuisapawa nakarameka'e ena tepiyakawana eta naimaira'iji ema Machanewa Viya, machuware nawayuaraka'e eta najachapira'i eta naimitukasiwa'i, etapa eta najachapira'iji eta ajureka, taichavene'ji eta vika'era'iji viti eta machaviraipa ema Viakenu.

³ Wa'isera ekuisapawa nawayuaraka'e ena tepiya'ira'iana. Taicha wicha'a titekapaima'i ema Viya, tiamainukawa te mauchukapa ema achane tikaticha'i ema Viakenu taicha ema techepukainapa makanarainapa, je'ewarenapasera tiane'inapa eta maitekapirayare ema Viya, te'esera te maitekapapa émainapa tikuñakayere.

⁴ Ema maka achane ema tikanara'i ema Viya namutu ena te'ikana'i tisuapana'i ema Viya, tási'a ema maka achane tinakawainapa te templo, timijachawainapa yatupikene emakene ema Viya.

⁵ ¿Échawaichu'i eti eta nímitusira'eparaka'i kape juka te návi'aicha'a'i eye'e?

⁶ Puitisera eti écha'i eta tichejikaicha'a'i eta maimeresirawayare ema achane wínaraji, eta taitauchirawayare eta mapanereru'i ema Viákenu.

⁷ Taicha eta mapanereru'i maeñaure'i ema achane wínaraji tepanawaipa'i tiuchuka etanecha takamunu eta mayanirainapa ema tichejirika'i ema achane wínaraji.

⁸ Je'ewarenapasera tiuchukainapa ema achane wínarajikene, ema maikuñaruyare ema viakenu Jesucristo, taicha taratayarechu'i eta machajurapa takamitiekene'ayare taicha tijara'iyarepa'i eta maitekapirayare, taicha ichape eta maitupajiniasirawa'i.

⁹ Tási'a, mapaenumawainapa tímerekawayare ema achane wínarajikene, tuparairukayare maye'e ema Wínaraji. Ema, tijarakayare'i eta máitupajijiasirawayare'i, tamutuyare máimereka eta tiáramikareana takutiyare yátupikenena'ini.

¹⁰ Ema maka, máetaviuchainapa eta mawayuaraiwaya naye'e ena achaneana. Ena, tísapawanainapaipa náe'ika eta táiñe'ikeneana mawayuarakianapa'i. Wá'isera máyerema'i. Taka'e, ena nani achaneana máiturewana'i témitiekene'anainapa. Tikaikuñanainapa, taicha wa'i náwara'a'ini náe'ika eta yátupikeneana tiúriana echéjirirukawana.

¹¹ Taicha eta namasuapira'i ema Viya, máisapayare'i ena nani achaneana nasuapa eta mawayuarakiana ema achane wínarajikene,

¹² taka'e, namutuyare tikaikuñanayare ena, taicha wa'i náwara'a'ini nasuapa eta yátupikeneana vímiturapiana. Nawapinaichucha eta náichiraya eta tamaurikeneana.

Tiúchuku'anayare ena té'ikana'i ema Viya

¹³ Étisera, nuparapenaveana, máemunaruana'i ema Viya. Víti tatuparaka vi'ásulupayachaparakayare ema Viya íchavene'i eti, taicha manerejiru'e'i ema Viya te tépanawainapa. Táitusiawa, te esamapa eta vimetarairu'i, etupiruwapa ejakapa'i; taicha esamapa eta máichuira'e'i ema Machanewa Viya.

¹⁴ Ema tikuchuku'a'eyare, taicha ímiyanawa'i esuapa eta Arairu maechejiriruwa, yátupikeneana máimiturapiana ema Cristo. Tási'a, ítujikawainapa esiapa taye'e eta mávi'a'i ema Viákenu Jesucristo, íma'ainapa eta majaraiwa.

¹⁵ Tiuri puiti, nuparapenaveana, ímiyanawa eta é'isiraina ema Jesucristo. Wa'i ekuemitisika eta vímiturapiana'i, te vimutuicha'a eta eye'e, étapa eta véchejiriruwana'i te juka viajure, vémewataruana'i te eye'e.

¹⁶ Nuparapenaveana, tétavikawa'i eta máemunasira'avi'i ema Viákenu Jesucristo, émapa ema Tata Vikaiyakene. Tayanapane wa'i viúri'ini, énasera nawara'a'i tikurisamurecha'avianaya. Tási'a, vikunewainapa eta viúrikakarewaya, máichekuarakirenapa náicha,

¹⁷ esamawaini eti eta nakurisamurechira'e te esamureana. Náetumechawareni eta ímiyanirawaya icha eta táurikeneana, táuri'iwareni eta échejirisirawana.