1 Tesalonicenses 2 - Táurinakene máechejiriruwa’i ema Viya tikaijare

Eta máematanerepi'i ema Pablo te Tesalónica

¹ Échaichu'i eti nuparapenaveana, eta vipaipiuchira'e'i eti wa'i tamapuruji'ini.

² Échaichu'i tamutu eta náichira'avi'i ena achaneana, tímikuñaka'aviana'i ánaki te awasare Filipos, wá'isera wákatsimawa'ini te vítekapaucha'epa ani, vímiyanawarichucha vikametarairu taicha tétumecha'avi'ichucha ema Viya eta vímitusira'e'i eta máechajiriruwa.

³ Taicha wa'i véjekapawa'ini eta vímitusira'e'i, wá'isera étaina'ini vipanerechapa'ini eta tájiparakana tamaurikeneana, wá'iware viwayuarakina eta véchejisirapa'i.

⁴ Víti manerejiru'avi'i ema Viya taicha máecha'i eta vítauchirayare'i eta vituparakasiwayare'i maye'e, eta taka'e, tituparaka'avi'i muraka viámayare eta máechajiriruwa naye'e ena achaneana eta náuchukuiraina. Wa'i étaina viwara'a táememunaka'avi'ini naye'e ena achaneana. Vítaucha'i eta mawara'akeneana ema Viya eta vikurisamurechi'a'i ema, taicha ema, máimararaka'i eta visamureana.

⁵ Écharichu'i eti eta vikayemakeneanapa'i, wa'i vémetserajirikawapa'ini eye'e. Wá'iware étaina vétseraruinapa'ini vivereaka'e'ini eta eplatane. Vitupiruwapa'i eta vikayemakene'i te mamira'u ema Viya.

⁶ Wa'i vipanerecha'ini náetserajika'avi'ini ena achaneana, éti'ipa, virata'a'ineni vímereka eta vitupara'akene'i maye'e ema Viákenu Jesucristo, wá'isera wáwara'a'ini vímerekawa wakuti'ini mákani achane tikamusura.

⁷ Viti'ineni mawanara'avira'i ema Cristo, wa'isera etaina'ini vikamapura'e'ini vikamesa'e'ini eta échapajirisira'avina'ini. Véchapajirika'e'isera takuti'i eta suéchapajirisira suémunasira súkani esena ena suchichanaveana,

⁸ éneichuwa vicha'e'i eti eta venunasira'e'i, wa'i takukarichu'ini eta vimecha'e eta maechejiriruwa ema Viya, etaipa eta vitaresira vijaraka'e'ini taichavene eta vimikatasira'e'i. ¡Ichape eta vemunasira'e'i te visamureana!

⁹ Nuparapenaveana, te vinasikeneipa eta eye'e, eta vikametarairuira'i eta máechejiriruwa ema Viya, ímararaka'avichu'i eti eta vikaematanera'i muraka eta vítatijirisirawa'i. Tamutu'i sácheana, yátiana vikaematane'i, taicha wa'i wáwara'a'ini vétsepanaraka'e'ini eta vinikakenerepi.

¹⁰ Eti enekapaekene'a'i tamutu eta víchararakawa'i. Tímararaka'avi'iware ema Viya. Vitupiruwa'i yátupi eta viúriwa'i eta eye'e eti vichamuriana'i. Tájina naviya'ini nayunaka ena apamuriana achaneana.

¹¹ Éneichuware écha'i eta vétumechira'e'i, émanapachu'i vechejirika, vikuti'i mákani achane tiuri eta maechejirisira ema machicha.

¹² Vékatiaka'e'i ichape eta iúriwaina eti, ímerekaya eta makáchichaira'eipa ema Viya, taicha íchuarekasiwaipa maye'e eta ekachaneraya ema taye'e eta máwasa te anuma, te távi'a'i eta majaraiwa.

¹³ Eta taka'e, vi'asulupayachaparaka ema Viya eta táuriwa'i esama eta máechejiriruwa. Eti, etupiruwa'i ejákapa eta vimetasira'e'i, taicha eta esamira'i yátupikene'i, tási'akene'i ema Viya. Wa'i vipanereruinachuchaini víti, émainapukaini mákani apana achane. Eta juka eta tiúricha'e'i eti esuapana'i.

¹⁴ Éneichuware tiúri'i eta ekamichira'i eta ekatajiwaira'i nakatianasira'e'i ena ejaneanana, ekuti'i ena apamuriana vichamuriana tikawasana'i te Judea. Nuparapenaveana, ene naka'e'i eta nakatajiwaira'i naicha ena najaneananaichu israelítana, táichavene eta náe'isira'i ema Viákenu Jesucristo.

¹⁵ Ena nani nujaneanana nakapaka'i ema Viákenu Jesucristo nakuti'i ena eta nakapasirawaka'i apaikape ena profetanaini. Tipanajirika'avianaware víti. Ena nani náimiyusemaka'i ema Viya. Wá'isera náwara'a nasama'ini ena apamuriana achaneana eta máechejiriruwa ema Viya.

¹⁶ Taicha te viwara'ainipa vímitukawaka ena apawasana apaesa náuchuku'a'ini ena apanawa, nakatichaware ena nujaneanana eta vímitukawaka ena. Tíchejimiraucha'avianapa. Eta tiviucha'i, tiwayuchawapaichucha eta natapirawana. Ema Viya waipa makamicha'ini eta náejekapirawana. Puítisera táitekapauchainapa eta náikuñaya máicha.

Ema Pablo mawara'a tiápechawa máejirawaka ena machamuriana

¹⁷ Nuparapenaveana, tayanapane viyere'ikaka'i puiti juka kajeana, wa'i víma'aka'ini, tanasi'isera vikaimairu'e'i te viúki'ana. Viwara'aine víja'uchawa'ini vítekapaucha'e víma'a'e'ini.

¹⁸ Núti'ipa nuti Pablo, ichapemuri'inéni nuwara'a níteka eta ara eye'e. Émasera ema íinaraji tíchejimirauruka'avichuchapuka jákani.

¹⁹ Véñamawa'i víti eta eye'e taicha viwara'a'i tánasi'ini eta iúriwa eta machimapira'eya eta machaviraya ema Viákenu Jesucristo.

²⁰ Tási'a, viti vikuchapawainapa eta vijakapirayare eta víkuchi'i maye'e ema. Viúrisamurenapa víti te jena sache, íchavene'i eti.