1 Corintios 8 - Táurinakene máechejiriruwa’i ema Viya tikaijare

Eta naeniriji naye'e ena nasiñarajiana

¹ Puiti numetaka'eya eta táicharakawa'i eta enisira eta tinikakareana nayujaraure'i te tamira'u eta nasiñarajiana. Vimutu viti vímatiekene'a tájinachucha táimanena eta juka. Wa'isera wákasiñawaima'i eta vítusira'i. Takamunu'isera eta vémunasirawaka ena vichamuriana, vímikatasirakakaya.

² Narari'i ena, tímijachawanapa náimatiekene'a tamutu. Eta juka náicha'i taimereka'i wicha'a náituka'ini, nakapayayaraka'ini eta mapanereru.

³ Nákanisera yátupi'i témunakana'i ema Viya, eta tímikaecheracha'i eta machichanaveanaira'i ema.

⁴ Puiti, numetaka'eyare eta juka nechejiriruwa taye'e eta juka enisirana eta tinikakareana takayujara'ukene'i te tamira'u eta nasiñarajiana ena achaneana. Tájinachucha táichawa, taicha eta nasiñarajiana wa'i yátupina'ini víyanaina'ini te juka apake'e, taicha émanaichu'i ema yátupikene'i Viya.

⁵ Ena achaneana náimijacha'i kamuriana'i ena víyana te anuma, étaipa te juka apake'e. Namáverakapa ena nákenuana'i ena naye'eana'i Viya.

⁶ Vítisera viti vímatiekene'a'i, émanaichu'i ema Viya Vikaiyakene. Ema Jesucristo, ema Tata mapanerechapa eta tatiari'iyare tamutu eta víma'akeneana'i; vítipa vimutu achaneana. Puiti émapa tíjaraka'avi'i eta vítaresira.

⁷ Tisimutuanasera ena wa'i náimatiekene'a eta juka. Énaipa ena vichamuriana, narari'i ena wicha'a náemitisika'ini eta nawaraira napikaucha eta nasiñarajianaini. Ena, tisamawana'i waipa náetupikawana'i eta nanisira'i eta tinikakare takayujara'ukene'i, wa'i táurika'ini eta nasamira'i.

⁸ Numetaka'esera puiti, wa'i étaparakaina eta tinikakare, vijakapakarema'i me Viya táicha. Wá'iware étaima'i tiúricha'avi'i maye'e ema Viya, te wa'i vinika'i.

⁹ Eta taka'e, ekuneuchawa yátupina, machu émejekapawacha ena apamuriana vichamuriana wicha'a náimatiekene'a'ini eta júkana.

¹⁰ Étisera eti ímatiekene'anaipa, te ísapawayare'ipuka enika eta tinikakare nayujaraureana'i te tamira'u eta nasiñarajiana; taka'e, te máima'a'epuka ema echamuri, éneichuware tísapawayare'i tinika. Táitsiwa'isera tipikakarakawa'i jákani te masamure.

¹¹ Taka'e, échapawaya eti ímatiekene'airaipa, machu émejekapawacha ema echamuri. Émaichu'i iúmuriwa'i eta mawacharesira'e'i ema Cristo eta máepenira'i te crusu.

¹² Eti, te e'apapikapuka eta táuriwa'i eta napanereruana ena echamuriana, eti ekapekaturaipa eta maye'e ema Cristo, taicha eta émejekapawachira'i ena echamuriana.

¹³ Taka'e te nútina'ipukaini némejekapawacha'ini mákani nuchamuri táichavene eta nunisiraina'ini eta waka, wa'i nunikaima'i, apaesa waipa nukuemejekapawacha'ini ema. Eti apanawa, ene eka'eyare. Wá'iware ekuemejekapawacha ena echamuriana.