1 Corintios 4 - Táurinakene máechejiriruwa’i ema Viya tikaijare

Eta nakatupara'aira'i ena apústuleana

¹ Nuwara'a némecha'e eta vikatupara'aira'i viti maye'eana'i apústule ema Cristo. Mamusura'avi'i víti. Tiwaneka'avi'i eta vímitusira'eyare eta mapanereruana ema Viya, eta tayumururewanaini'i.

² Puíticha, mákani tikatupara'ayare taye'e eta ematanekana, takamunu'i yátupiyare eta máitauchiraina.

³ Te natiari'ipuka ena tikunenuana'i eta yátupipuka nicha eta taurikeneana, etachuchapuka nicha'i eta tamaurikeneana, tayanapane nakaunenu ena akenukana wa'isera ti'apasamurekanu. Nutinapukaini nukaunewa'ini.

⁴ Wa'isera nukasiñawawaika'ini, taicha nécha'i ema Viákenu, máima'a'i ema tamutu eta nukaemataneasira'i ema, te tiúri'ipuka, wá'ipuka.

⁵ Eta taka'e, wa'i táurika'ini tatiwaina'ini ekaune'ini eta júkana, te wicha'a ímatiekene'a'i, ekuchapaya eta mápechirawayare títeka ema Viákenu, ema tímikaecherachayare eta tayumururewa'i te timapiku, ema tímereucha'aviya eta vipanereruana te visamureanapachu. Taka'e, ema Viya tikunacha'avinapa eta viúriwana'i.

⁶ Nuparapenaveana, numetaka'e eta juka eta tiúricha'eyare apaesa ákuti eta máuriwa ema Apolo, ákutinuware nuti apana eta núriwa'i, taicha étanaichu'i eta vímiturapiana'i taye'e eta vé'iru'i. Wa'i táurika enerejika'ini nákani émunaruanaya, wakutikakasera eta émunasira'avina viti vímitura'iana'i. Nakuijaware épurukenéna nákani tímitura'iana'i.

⁷ Taka'e, ¿najina apanaina naijaraka'e'ini eta ekunachakarewa'i naye'e ena apamuriana achaneana? ¿Tamutu eta ekaye'ekene ejakapa'i maye'e ema Viya? Eta taka'e eta émaira'i tijaraka'e tamutu ¿Tája'a takayema ímijachawa'i etijiwa'i ijarakawa eta ekaye'ekeneana?

⁸ Eti, eta esamirawa'i ekaemuñawaipa, tímikutijirikawaipa ekaye'e'ini tamutu, ekaima'akene'ini. Ímikutichawaipaware akenuka'ena'ini eta esamirawa'i. Ímijachawapa waipa nukamunukare'i eye'e. Jé'echapukaini masapi'a'ini yátupina'ini akenuka'ena'ini apaesa víti apanawa vémeña'awapaini eta eye'e.

⁹ Taka'e viti apústuleana, tinaka'avipa ema Viya te naijikimuri, tímikutijirikawaipa ena tikatupara'ana'i eta náepeniraya taniruanayare eta sárareana. Ichape eta vima'akarewa'i naye'e ena achaneana, énapa ena ángeleana.

¹⁰ Viti, eta vikaemataneasira'i ema Cristo, tisunsucha'aviana'i ena achaneana, étisera étaviuchaipa'iji eta ítupajijiasirawa'i taye'e eta títukakareana maye'e ema Cristo, takutikene náimijacha'iware matumeraira'avisami. Eti, tétavikawaipaji eta etúmewawaka'i, tipikaucha'eanaipáji ena achaneana. Vítisami tájinapa vipikauchakarewaina'ini.

¹¹ Puíti'ipa vinasi'ichu'i eta vikatajiwaira'i eta vinikakenerepi, eta vimaunewa, étapa eta véchuriasirapa eta vimuiri'arapi, ena achaneana té'aviana, tájina viviyawa vijunaiya.

¹² Vikávitarakawa'i te viwa'uana eta vikaematanera. Ena achaneana tewajiriaka'aviana'i. Vítisera tájina wákayema'ini naye'e, tiúri'i eta vijikapirawaka'i ena, tipanajirika'aviana, vítisera vikamicha'i tamutu.

¹³ Tamutu sácheana téchejikana'i eta viye'e, vitisera tiuri'i eta vijikapira. Puiticha tíñema'i eta nakayemaina'avi, ichape eta vépurukarewa'i naye'e timikuticha'aviana'i eta nairimera taye'e te juka apake'e.

¹⁴ Eta juka nukajure'eira'i, wa'i étaina nupanerecha nímikatsiriaka'e, nuwara'a'isera nechejirikawaka, tétavikawa eta némunasira'e'i, takutirichu eta nukachichaira'e'i.

¹⁵ Tayanapane kamuriana'i ena eye'eana'i máestroana tímituka'eana'i eta é'isiraina ema Cristo, diez mil náina'ipukaini, nútisera tímikutijirikawa'i nákarichu'ini éyanuina'ini maestro taicha nuti nímimaticha'e'i taye'e eta iúchukuirayare maicha ema Jesucristo.

¹⁶ Eta taka'e, nékatiaka'e'i ímiyanawa eta e'isirainuina eta núriwa'i.

¹⁷ Eta taka'e, néwatakayare eta ara eye'e ema némunarukene nuchicha Timoteo títaura'i eta makaemataneasira'i ema Viákenu. Ema, temecha'eyare, eta takayemakeneana eta nímiturapiana eta vé'isira'i ema Cristo. Táurikene'i eta máimiturapiana taicha étaichu'i eta nímiturapi'i naye'e ena vichamuriana te jákani nupaisineanapa'i.

¹⁸ Etiari'ipapuka eti ekasiñawaipa eta numaitujisirawaipa néjirapana'e'ini. Ímijachaipapuka waipa nejira'ema'i;

¹⁹ nuwara'apaicha nuti níja'uchawa'ini nítekapaucha'e'ini. Nukuchapa'i eta nítujisirawaina'ini maicha ema Tata, te nítekapaucha'epa, níma'ainapa ena nákarana tisiñawawaikana'i, timijachawana'i narata'a tamutu nima'ainapasera te yátupi'ipuka naitaucha eta naechejiriruwana.

²⁰ Taicha eta vé'isira'i ema Cristo, takamunu'i vítauchayare vikaemataneakayare. Wa'i tákarichuima'iya eta véchejiriruwana.

²¹ ¿Taja'a tiuripana eye'e eti eta nitekapauchira'eya: eta timiyananuya etachucha nemecharepana'eyare, té'eserapuka tiuripanapuka nítekapaucha'e núrisamurewayarepa'i eta nímaira'eyare, nétserajika'enapa?