1 Corintios 16 - Táurinakene máechejiriruwa’i ema Viya tikaijare

Eta nanakiruwanayare

¹ Étasera eta juka enakikisirawayare eta naye'eyare ena vichamuriana tikawasana'i te Jerusalén, étaichu é'ikayare eta nímitusirawaka'i ena vichamuriana tikawasana'i te awasareana tinapaika eta Galacia.

² Puiti, nuwara'a nutuparaka'eyare: Te luminkumu'uana, íputsisinawayarepa'i, émanapachu eta manakiruwanayare. Étisera échinawa'i áyana'ipuka jákani ewachasana'i. Iúnasinawapaipa, apaesa takuijapa étaparakaima'i te nítekapaucha'epa.

³ Te nítekapapa eta ara eye'e, véwatakapa ena enerejiruana'i eti, nayana te Jerusalén. Ena tiámanayare eta enakiruwana'i eti. Nijarakayaresera eta ajureka, eta náimerakiyarepa'i.

⁴ Té'eserapuka nútinapaichu náwara'a nuyana, apaesa nákachanenupa'i ena wanairukanayare.

Ema Pablo mawara'apa tiyanaya máejirapanawakaya

⁵ Eta nítesirayare, nuwara'a nétawajikayarepa'i te awasareana taye'eana eta Macedonia, nítekapirainapa eta ara eye'e.

⁶ Nuwara'a nunasipanayare eta eye'e. Tijurikati nukuchapa eta táetavisira'avina eta muraka wanamu'u tikasara'i. Tijurikati ímikatakanu eti eta nímiyanirawayare nupaika.

⁷ Taicha wa'i náwara'a'ini ánipinaichu'ini eta néjiraira'eyare. Nuwara'a'i nunasipanayare. Émapasera téchanuyare ema Viákenu;

⁸ nuwara'a'iwaresera nunasipananumayare ani te juka Éfeso. Tiámainukawa te táetavikawapa eta piesta Pentecostés, nútijapainapa,

⁹ taicha nuwara'a'i nukamapurawanumayare nukametarairu, taicha kamuriana'i ena tiwara'ana'i tisamararakanuana. Éneichuwaresera narari'iware kamuriana ena viánarana'i.

¹⁰ Nutuparaka'eya, te máitekapaucha'epa ema Timoteo, tauri eta ejakapiraina. Échapajirisinanuyare, taicha émaichu'i nukutikene'i eta vikaemataneasira'i ema Viákenu.

¹¹ Nutuparaka'eware nakuija nakuepuru ema. Ímikatakasera eta mapaisirayare ema, apaesa máitekapauchanuwane, émapaicha nukuchapa'i nuti, énapa ena apamuriana nuchamuriana te juka.

¹² Nuwara'a'iwaréni mayana'ini ema vichamuri Apolo eta ara eye'e, máe'ikawaka'ini ena tiámana'i eta najure'i. Wa'isera máisapawa'ini mayana'ini puiti. Te'énaineware apa'enaware, mayanapa.

Táichekuaraki eta majure ema Pablo

¹³ Ekuneuchawa yátupina. Túme'ena'i taye'e eta juka vé'iru'i. Yátupina eta éjairawawakaina. Wa'i ekupika eta vikatajiwairana'i.

¹⁴ Yátupina eta émunaraiwaya, táuchuka te esamureana, étaina táemesiawa tamutu jákani íchakeneanayare.

¹⁵ Puiti nuwara'a némecha'e ena tínapukana'i té'ikana ema Viákenu te awasare Acaya, ema Estéfanas, esu mayena, énapa ena machichanaveana. Ichapemuri'i eta náijarasirawa'i eta náitatira'i ena apamuriana vichamuriana'i.

¹⁶ Puiti nuwara'a epikauchawaka, esuapawaka ena nani. Éneichuware epikauchaware esuapa ena apamuriana tímikataka'aviana'i eta vikaemataneasira'i ema Viákenu.

¹⁷ Ichapeine'iware eta núrisamurewa'i puiti eta náitekapauchiranu'i ema Estéfanas, ema Fortunato, émapa ema Acaico. Tímikutijirikawaine'i ámutu'ini ítekapauchanu'ini eti eta nímairawaka'i ena nani mapanana tiási'ana'i eta ara eye'e

¹⁸ técharara'aine'i eta nusamure, túmenuine'i eta nusamirawa'i. Ene eka'eyare eti eta táetumechirawayare eta esamureana, eta ímairaina'i ena nani te nachawapa eta eye'e.

¹⁹ Téchejika'eana namutu ena vichamuriana tikawasana'i taye'e eta awasareana te juka Asia. Téchejika'eware ema Áquila ésupa esu Priscila, énapa namutu ena tiúrujirikawana'i te napena, taicha énaichu'i vikutikeneana'i eta vé'isira'i ema Viákenu.

²⁰ Te iúrujikawapa, ejupakakayare eti, táikutiaraina'i eta émunajirisirakaka'i.

²¹ Nuti Pablo, eta nímiamaresira'i eta néchejiriruwa eta eye'e, nútijakaruwapa nájucha eta táichekuaraki'i eta najure.

²² Nákanisera máesachara'ana'i ema Viákenu náimainawapainepa ena eta náikuñayare te machawapa. ¡Tata Viákenu, pítekawaneni!

²³ Nuyaseucha'eparaka me Viákenu Jesucristo táetaviucha'ini eta iúrikakarewaya máicha.

²⁴ Nuwara'a ejakapa'ini ámutu eta némunasira'ewaka'i máichavene'i ema Viákenu Jesucristo.