Puu Findi 1 - Ibani New Testament

¹ Mịị diri ma bie fịnịnyẹ anịị Jizọs Krais diepágháma nyẹ́. Tamuno mịị diepágháma nyẹ ma pa ọ pịrịm sị ọ pa ori fịrịnwangịapụ die pághá bẹnyẹ ḅọlọghaa sáá ḅụ. Krais mịẹm sị ori a fịrịnwangịḅọ Jọn mịnanyẹ ma nimii ori ọrẹ sookumuḅọ fịrịma ọ pịrị ḅara.

² Jọn warị ori árị nyẹ́ mamgba dugho págháma anịma anịị Tamuno ẹ́gẹ́rẹ́ ma na pịghị Jizọs Krais dugho págháma nyẹ.

³ Nnị karịibimaapụ anịị mị diri ma gooapụ, nnị karịibimaapụ anị pịghị mịị ikiakoro oku ma pughuapụ sị pịghị anị bie n gịẹnyẹ ma koko! Ḅẹẹ sáá ma kikiamam nyẹ gonyẹ́ gonyẹ́ kiri ákị bẹ sáá.

Pa Sọ́nọ́ma Sọsị Ma Sị Sịbịpị

⁴ Sịbịpị ma Jọn ḅara anịị anị saghị ḅo Esiya ḅẹrẹtọ yọ ḅụ fịnị sọ́nọ́ma sọsị ma pịrị nyẹ́ẹ́: Tamuno, mị́sa fịnịḅọ, ḅọ́rọ́maa sáá fịnịḅọ na pịghị ḅo bẹ sa fịnịḅọ pịghị ori imine tórúku fịnị sọ́nọ́ma Tẹ́mẹ́ ma ḅara saghị ḅo tọ́rụ́kụrụkụ́rụ́ na diin fịnị ọ pịrịị.

⁵ Na pịghị Jizọs Krais ḅara, karakárá onyésẹ̄ḅọ ma, parị fịị ḅụ saghị ḅọ ori anịị pịghị tuminikiri ámányánáapụ ma táarịḅọ. Ọ wa ḅẹ́lẹ́mam, ori ọrẹ ọmbịnyẹ́ pa wa dụaḅọ́rọ́māmám wámịna sii ḅụ.

⁶ Warị pịghị igwagwaapụ amadakiri pa wa mịẹsị wa fịrịnwangị ọ Daa na Tamuno ma pịrịị. Boma na ịnyọ fịnị Jizọs Krais pịrị ákị mú ḅẹsá ḅẹsá láa! Anị ọkọ fịnịị.

⁷ Dighi, ori oḅuto na ḅoarị! Fịnịḅọ fịnịḅọ ori árịbẹm, sụḅa pa o gbiapụ ma sọọ; tuminikiri fịnị túminị́ gonyẹ́ gonyẹ́ dụadu ọ pịrịbẹm. Anịị anị fịnị bẹ ḅara!

⁸ Kụrọmamgba nyáná Kịnịnyáná Tamuno mị́sa fịnịḅọ, ḅọ́rọ́maa sáá fịnịḅọ na pịghị ḅoo bẹ sa fịnịḅọ ḅẹm ḅẹẹ, <>

Múnogha Ḅụ Árị Krais

⁹ Irị anịị Jọn, ọmịna mịnaḅọ owitụ́wọ, pịghị Jizọs duaarị gbẹ́rẹ́ḅọ irị ọ́ḅụ gbẹ́rẹ́ḅọ ngịrịma pa ori ásẹ́mẹ́kiriapụ laarị tọ́rụ́siarị ma arịarịḅọ. Nnị i pa Patmọs ogbosúányẹ ḅụ kórómam a Tamuno ẹ́gẹ́rẹ́ ma dugho wásámam na pịghị Jizọs diepágháma karakárá gosi.

¹⁰ Kị́nị́nyánáḅọ éné ma ḅụ, a tẹ́mẹ́ju imi, a warị ọdụ fịnị ḅara fịnị opu pụghọ náa ị́yẹ́ ọḅụju.

¹¹ Anị i ḅẹm, <<Ịrị árịnyẹ ma gịẹ kórómaa, sị diri ma fịrịma mịná opu ama bie fịnị sọsị mamgba pịrị: anịị Ẹ́fịsọs, Samaina, Pegamọm, Tiyatira, Sadis, Filadelfiya na Laodisiya>>.

¹² A pịghị ikelekelé sị dighim ẹ́gẹ́rẹ́ i pịrịarịḅọ a warị nnị odoḅala pa tẹ́mẹ́ sọ́nọ́ma tọndọ́gbana nyẹ arịị.

¹³ Nna ogbokúbie gbẹ́rẹ́nyẹ imii tumḅọ kịkamanyẹ, ḅoo ọ ḅụọ gbẹ́ẹ̄ opu bịtẹ suaḅọ, ọ pịghị odoḅala mpara bịtẹ pa ọ kúkúbie ọgọ́nọ́ kpọm.

¹⁴ Ọ sịbị núme woolu bia ḅara biam anịgha sunoo, ọ tọ́rụ́ warị fịnị kọrị ḅara pa kọrị;

¹⁵ Ọ ḅụọ n fịnịbie dọ́ghụ́ma sị ibima mụ́nụ́mụ́nụ́máa ḅala bia ḅara pa biarị, ọ pụghọ fiearị ḅara sọ́ḅọ́rọ́ ọgọ́nọ́ saghị sóghóró mingi silé ḅara.

¹⁶ Ọ sọ́nọ́ma ḅálōló ọlọm ori amaḅara na mmẹẹ́ a tọ́rụ́ nyáná oḅu áláápụ́-ágidi ọ bịpịbie saghị págháḅom. O tórúku éné ogbo ịrụa biarị ḅara pa biarị.

¹⁷ A ori árị sáá, a ọ ḅụọ sughu bị́ghị korom fịịmaaḅọ ḅara ori ọrẹ ámáḅara pa ị́yẹ́ ọ́gọ́nọ gbánam warị ḅẹẹ, <<Ḅáláfama! Irị anịị Parị ma Irịị anịị pịghị Kunema ma.

¹⁸ Irịị anịị duma fịnịḅọ ma! A fịị sáá imii, kụ́ma mị́sa a duma muu ḅẹsá ḅẹsá lam. A kụ́rọ nyáná ḅo fịị pịrịm na fịịmaapụ ma tuminikiri.

¹⁹ <

²⁰ Mịị ḅọghu sị túminị́ nimigha nyẹ, ị́yẹ́ amaḅara bie fịnị sị ọmịnị árị sọ́nọ́ma ḅálōló ma sẹ́pịrịnyẹ, na pịghị odoḅala pa tẹ́mẹ́ tọndọ gbananyẹ ma sẹ́pịrịnyẹ: Sọ́nọ́ma ḅálōló ma anịị sọ́nọ́ma sọsị ma sookumuapụ, Sọ́nọ́ma tọndọ gbananyẹ ma anịị Sọ́nọ́ma sọsị ma.