Judu 1 - Ibani New Testament

Judu Ḅara Ḅo Sịbịpị

¹ Irị Judu, Jizọs Krais fịrịnwangịḅọ na pịghị Jems numboru owitụ́wọ, mịị diri ma gịẹ pa ọ fịrịmam Tamuno sịmáapụ, pịghị Tamuno Daḅọ ma ḅẹlẹma bie duma kọọapụ, pịghị Jizọs Krais ọ ḅara na kokoapụ.

² Ḅẹẹ, lolomakúkúbie, diin na ḅẹlẹma bifụfụụ́ ḅara ḅụ ọmịna nyẹ sọọ.

Iruo Nyẹ́dieapụ Kuruarị Fomḅara

³ A opuma kórómaarị a diri gịẹ ọ fịrịma wamịnị kị́nị́mamgba nyáná dụaḅọ́rọ́ma gbólómanyẹ ḅụ. Kụ́ma anị ḅoo ịḅụ korom ḅẹ, a ábálálá gịẹ pa ọmịna tẹ́mẹ́ kụrọma, ḅẹẹ ọmịnị owusọọ tórúku mú Tamuno gbẹ́rẹ́sa pa ori a túminị́ pịrị sị pịrị fama minini.

⁴ Jẹa túminị́ Tamuno nímighaapụ ḅọghu ḅara pa ikirisọḅomam ọ mịnị ogboku bie sị Tamuno tọ́rụ́kụrụkụ́rụ́ oku ma dima, nnị pa nna yáakuu ḅụ ofori nwángị ma kọ, pịghị Jizọs Krais wámịna kpọ́kpọ́ Daḅọ na wámịna Nyánáḅọ sịghị. Ḅọlọmaa sáá Tọ́ndiri ma dugho kórómamam nnị nyanamaá ḅẹ́rẹ́kọ.

⁵ Karakárányẹ ḅẹẹ ọ mị mamgba nimim, a papa ọ biekóróma ḅẹ́ Kị́nị́nyánáḅọ Izirẹlịapụ dụapághámaḅo ḅara Ijipitiapụ ḅarabie kụ́ma anịma ḅọ́rọ́fáma sa, mininighaapụ ma gulugulumam.

⁶ Ọmịnị sookumuapụ ma pa biekóróma, mịnị nna ḅụ pa nna kụrọ láa kunema angaá ḅụ warighaapụ, kụ́ma nna fịnị yọ warisom: n gbámásó ịkóli pa n suamam sughubie fịnị kánákáná ma bie, Tamuno n pa warị pa anị opu éné ma kúru nna ḅẹ́rẹ́kọ éné nnị n guluguluma bẹ sáá.

⁷ O Sodom na Gomora na nnị na kikia ama gbọrụ, pa biekóróma mịná sookumuapụ ma dua yáakuu ḅụ ofori nwángị na ḅụrụamịẹnyẹ mịẹapụ, n kọrị gbámásó fịnị ma tọ́rụ́siarị arịm, mịma warị birinụ́nụ́nyẹ sọ kị́nị́mamgba pịrị.

⁸ Pịghị anị gbẹ́rẹ́ ḅara ma mịị túminị́ ma kịrị dáwọkọm mịẹsị n siinyẹ mịẹ nna oju pilemaarị nyẹ, nnị Tamuno kụ́rọ dighisimam warị pịghị ọgọnọ fịnị ipineapụ ma dughosima.

⁹ Maikel sookumuapụ ma sịbịdá oku muḅọ sọ mịma mịẹgha, ori ẹ́kpẹ́dua ma na nụ́nányẹ nyáná sáá ḅẹ tụọ Mosis dua akị bẹ, Maikel ẹ́kpẹ́dua ma dughosimagha kụ́ma dughom ḅẹẹ, <>

¹⁰ Kụ́ma mịnaapụ ma nnị akanyaḅogha nyẹ gonyẹ́ gonyẹ́ dughosimaarị, nnị fịnị ḅara so ḅọ́rọ́ pirinama, nnị ine sịbịbie kiẹgha tẹrẹmẹ n ḅẹnyẹ ḅẹnyẹ mịẹ. Samangba ḅụ n tẹ́mẹ́bie sọọ nyẹ gonyẹ́ gonyẹ́ anịị n mịẹarịnyẹ. Nnị kọarị mịẹnyẹ mamgba sịarị ḅẹẹ n nimim n mịẹarịnyẹ, anịị n ḅaarị nyẹ.

¹¹ Anị opuma sii n pịrịbẹm! Nnị Keni asọ duamam, igbii gosi nnị n ḅụ pa Balaam mịẹ irima nyẹ ma ḅụ suumam. Nnị Kora kụrọsịbịbie mịẹḅara pa nyẹ mịẹm, anị gbẹ́rẹ́ ḅara ma anịị n pịghị n guluguluma ḅara.

¹² Mịnaapụ ma fịnị ḅara sọ́ḅọ́rọ́ kpọ koro sị ọ pilemaarị ịlọ́lị ọ sọsị kubiri ogbo fị́nyẹ ma fịị gbólomaarị sáá. Nna ḅụ ngéré siḅearị ánáná siḅeapụ. Nnị anịị fọ́rụ dighiákị nwángịarị oḅuto kụ́ma iti kórómagha. Nnị fịnị ḅara anịị anịsáa ḅụ sọ ine sịmgbọlụ suagha sị, n kune ḅụ saghị sughu pághámaḅo sịmgbọlụ fịịfamamaa nyẹ fịnị ḅara anịị n fịnị ḅara.

¹³ Nnị kụ́rọ dinọngụ kịkam tọ́rụ́ ḅụ. Nna ḅụ́gịrịriị́ma fịrị anị ḅụ diearị, dinọngụ anị ọ kọkọ die ḅara. Nnị ikelekelé ma ḅọ́rọ́arị lolia kịkam, Tamuno gbámásó yọ tẹ́lẹ́ma pịrịmáapụ póghólóḅa kánákánábie.

¹⁴ Enọkụ, ḅụọ ḅụọ ḅụ sọ́nọ́ma kárámáḅọ Adam ḅụọ ḅụ, anị mị íkia ma kórónyẹ Ḅọlọmaa sáá, anị mgbọloma ḅara ḅẹẹ, <

¹⁵ si ọ ḅẹ́rẹ́kọ bẹ ḅara kị́nị́mamgba sịbị ọgọnọ, Tamuno gbarịgha ḅara ḅụ mịná sii túminị́ ma pa tọ́rụ́siarịmabẹm n nwángịmáa Tamuno nimigha fịrị na pịghị ọ sịbị n kọmaá sii ẹ́gẹ́rẹ́ gosi.>>

¹⁶ Mịná túminị́ ma sáá mamgba nnị gụ́nụ́gụ́nụ́arị ḅẹ́rẹ́ pa jẹ́apụ sịbị sẹ, nnị nna ojumẹnị biiarị siinyẹ duaarị, nnị opuamịẹnyẹ mịẹarị sị jẹ́apụ gbolomanyẹ ḅụ ibi bịpịfie sị n binyẹ n ḅara la bẹ ḅara.

Birinụnụ Na Againma

¹⁷ Kụ́ma o biekóróma, ị́yẹ́ nangwọapụ nfịrịmaapụ ma dughonyẹ ḅọ́rọ́maa sáá wámịna Nyánáḅọ Jizọs Krais gbolomanyẹ,

¹⁸ Nnị dugho ọ pịrịm ḅẹẹ kunema éné ma ḅomaẹrẹ, túminị́ págháḅobẹm ọ kpọtibẹapụ, Tamuno nimigha sị nna ojumẹnị binyẹ duabẹapụ.

¹⁹ Mịnaapụ ma, anịị puama dighiapụ, nnị nna ojumẹnị tarịarịnyẹ anịị n sumaarịnyẹ, Tọ́ntọ́ Tẹ́mẹ́ ma nyánágháapụ.

²⁰ Kụ́ma ọmịnị ị́yẹ́ nangwọapụ ọ pa jụghọ jụghọ mịẹ sẹ́nịma ọmịna tọ́ntọ́ḅa minini ma ḅụ, Tọ́ntọ́ Tẹ́mẹ́ ma kụrọ pa tẹ́ghẹ̄.

²¹ Ọ Tamuno ḅẹlẹma ḅụ ọmịna ḅụ warị ọmịnị Wányánáḅọ Jizọs Krais kụ́rụ́arịsa ḅẹ́ o ḅọ sị duma gbámásó pá ọ́ pịrị ori lolomakúkúbie ḅụ.

²² Lolomakúkúbie nyáná tẹ́mẹ́ mmẹẹ́ mmẹẹ́ mịẹarịapụ pịrị,

²³ fịnị ma bie isiapụ nụnụ pághámaḅo sị n dụaḅọ́rọ́maa, isiapụ lolomakúkúbie nyáná n pịrị ḅáláfa anị na gwanyẹ, kụ́ma ḅẹlẹma nyáná nna suabịtẹ pịrịma nna siiamịẹnyẹ mịẹsị anị ịlọ́lị nyẹ.

Túminí Tẹ́ghẹ̄

²⁴ Ori ma, ine ọ warịị sị ọ bịghịbịgha ḅọ ma, pịghị ọmịnị akuoo sii ḅụ ófórigha ḅụ, na pịghị opu bieḅẹlẹ ḅụ ọ tọ́rụ́kuu, ipine bii yọ,

²⁵ wámịna Kpọ́kpọ́ gbẹ́rẹ́ Tamuno pịghị wámịna dụaḅọ́rọ́maḅọ, Jizọs Krais wámịna Nyánáḅọ ḅụ ḅọ́rọ́, ipine na, pẹrẹ na ịnyọ na kụ́rọ na, ḅọ́rọ́maa kụ́rá gbọrụ mamgba, na pịghị mị́sa akị mú ḅẹsá ḅẹsá láa! Anị ọkọ fịnịị.