3 Jọn 1 - Ibani New Testament

Sịbịpị

¹ Irị Jọn sẹnịḅọ ma anịị mị diri ma gịẹ ọ fịrịmaḅọ. A gịẹ pa ị́yẹ́ ibi nangwọ Gayọs, a karakárá ḅara pa ḅẹlẹma ḅọ fịrịmam.

² Ị́yẹ́ ibi nangwọ, a tẹ́ghẹ̄m ḅẹ́ nyẹ gonyẹ́ gonyẹ́ ị nana loghuloghu ị pịghị oju kụrọ ḅụ fịnị, a nimiḅara ḅụ ḅẹ́ tẹ́mẹ́ju ịḅụ kụrọm.

³ Anị opuma ibieḅẹ́lẹ́mam jẹ́ mininiapụ ḅo dugho sa, ị karakárá ma ḅụ sẹ́kụrọ ḅara, ị pa pịghị sámámgba karakáráma ḅụ asọ nwángịarị ḅara.

⁴ Mịma nẹ́ngịma bieḅẹlẹ ofori a ḅo náa sa ḅẹ́ ị́yẹ́ awọ karakáráma ḅụ asọ nwángịarị.

⁵ Ị́yẹ́ ibi nangwọ, ịrị opuma kụ́rọsẹm ị nwángị Krais ọḅụduaapụ pịrịarị fịrị, karakárányẹ ḅẹ́ nna ḅụ jẹ́apụ igoniapụ ị fịnịngaa.

⁶ Nnị ị́yẹ́ ḅẹlẹma dugho págháma mịnga fịnị Tamuno kubiri ogbo ma pịrịmam. Páisisi ḅárásua n pịrị sị nnị muarịnyẹ ma mú anị Tamuno ma ḅụ́ḅẹlẹḅara.

⁷ Nnị muarịnyẹ ma muarị Krais fịrị ma gosi, ḅárásua pịrị daákịgha ḅụ mininighaapụ ma ḅarabie.

⁸ Anịgo wamịnị mininiapụ ḅárásua mịị túminị́ ma pịrị na ibim, wamịnị nnị na fịrịnwangị karakárá ma pịrịbẹ ḅárá.

Diyotirifes Na Demetirọs

⁹ A gbulu ábálálá gịẹ Tamuno kubiri ogbo ma fịrịmam kụ́ma Diyotirifes dọghụḅọ bẹ ọ sịbịdaa n pịrịm, biri pa ị́yẹ́ dughonyẹ náa dọghụgha.

¹⁰ A ḅo sa, anịsa, a pa o biekórómabẹm ọ mịẹmáa nyẹ mamgba, ọ tọ́rụ́kịrịkị́rị́ ḅara pa wa dughosima ḅara na pịghị o dugho iruonyẹ! Anịma o furobịgha, mịnaapụ ma ḅo sa sọ ori n dakórómagha, n dakóróma dọghụapụ ori n kikim pịghị n deepágháma Tamuno kubiri ogbo ma bie.

¹¹ Ị́yẹ́ ibi nangwọḅọ, Gayọs siiamịẹnyẹ daa nyẹ mịẹma, kụ́ma ibinyẹ daa nyẹ mịẹ. Ibinyẹ mịẹarịḅọ gonyẹ́ gonyẹ́ Tamuno ju saghịḅom. Siinyẹ mịẹarịḅọ gonyẹ́ gonyẹ́ na Tamuno nimigha.

¹² Kị́nị́mamgba Demetirọs ibi dughoarị, karakárá ma so ọ ḅụ ibi dughoarị, wamịnị so ọ ḅụ ibi dughom, ọ pịghị nimim ḅẹ́ wámịna dugho págháma nyẹ ma karakárányẹ.

Kunema Sịbịpị

¹³ A tọgha nyẹ nyánam a dugho ọ pịrịbẹnyẹ, kụ́ma a dugho dọghụgha ábálálá gịẹnyẹ na ábálálá gịẹ ḅuruma ḅụ.

¹⁴ Ḅọlọgha sa ḅụ a ị́yẹ́ árịbẹm, anịsa wa tọ́rụ́ na tọ́rụ́ na ḅụ ẹ́gẹ́rẹ́bẹm.

¹⁵ Diin ọmịnị na fịnịị. Ọmịna nangwọapụ mamgba fịrịmam ḅẹ́ a obii. Ḅara na nangwọapụ ma gbẹ́rẹ́ḅọ gbẹ́rẹ́ḅọ bii.