2 Pita 1 - Ibani New Testament

Pita Ḅara Saghị Ḅoo Sịbịpị

¹ Irị Saimọn Pita, Jizọs Krais fịrịnwangịḅọ pịghị Jizọs Krais fịrịmaḅọ anịị mị dii ma gịẹ ọ fịrịmaarịḅọ. A gịẹ pa ọ fịrịmam wamịnị na gbẹ́rẹ́ nyẹ́la minini nyánáapụ, wámịna Tamuno na wámịna dụaḅọ́rọ́maḅọ Jizọs Krais karakárá ibiamịẹnyẹ ḅụ ḅọ́rọ́.

² Tọ́rụ́kụrụkụ́rụ́ na diin bii ḅara pa ọmịna nyẹ sọọ, o ḅo Tamuno na wámịna Nyánáḅọ Jizọs Krais nimiḅara ma.

Tamuno Kị́nị́ Sị, Na Ọrẹ Kị́nị́ Sẹlẹ

³ Tamuno ori kụ́rọ ḅụ ḅọ́rọ́, wa binyẹ gonyẹ́ gonyẹ́ pa wa pịrịmam mịẹsị wamịnị ine kuu pa Tamuno pịrịbẹ duma kọọ. Ori wa sịḅọ ma ori ipine na ori ibi ḅụ ḅọ́rọ́ mịnanyẹ ma pa wa pịrịm wamịnị ori ma nimi ḅụ ḅọ́rọ́.

⁴ Mịná ipine na mịná ibi ḅụ ḅọ́rọ́, ori ọmịnị wa pịrị opuma dụḅa na nyẹ́la dienyẹ ma pa wa pịrịmam. Mịná diepịrịnyẹ ma ḅụ ḅọ́rọ́, ọ tuminikiri bie fịnị sị tuminiḅaarị pụghọ tarịarịnyẹ ma ḅarabie mangị págháḅobẹm, sị ori tọ́ntọ́ duma ma nyáná.

⁵ Mịma go, ọmịnị ọmịna ịnyọ la ḅara mịẹsị ọmịna minini ḅụ ibiamịẹnyẹ pa anị ḅụ sua, ibiamịẹnyẹ ḅụ níminyẹ pa anị ḅụ sua.

⁶ Ọmịna níminyẹ ḅụ, ḅụ ọlọ pa anị ḅụ sua, ḅụ ọlọ ḅụ ingịrịma pa anị ḅụ sua, ingịrịma ḅụ Tamuno dighi ḅáláfaa pa anị ḅụ sua.

⁷ Tamuno dighi ḅáláfaa ḅụ, ibitẹ́mẹ́ nyáná mịnaapụ pịrịị, ibitẹ́mẹ́ nyáná mịnaapụ pịrị ḅụ ḅẹlẹma pa anị ḅụ sua.

⁸ Mịnanyẹ ma anịị o binyẹ ọmịna duma bie, ọ ḅọ́rọ́ nyáná bima ọmịna duma bie, anị mịẹbẹm ọ gárágárá pịghị sọọ nyẹ ḅụ sọ, ọmịna níminyẹ Jizọs Krais wámịna Nyánáḅọ ḅụ.

⁹ Kụ́ma ḅọ́rọ́ mịnanyẹ ma nyanagha mininiḅọ imi imi, anị dughoarị ḅẹ, anị tumḅọ ma tọ́rụ́ kẹ́lẹ́ pụụm, ine nyẹ arịgha, nḅọ pịghị bieḅárámámam ḅẹ́ nnị n ḅọ sii ḅụ nḅọ sịrị simam.

¹⁰ Anịgo ị́yẹ́ ibi mịnaapụ, ọmịnị ibima ḅụ́kọ́rọ́ma árị ḅẹ́, Tamuno pa ọ sị́ sị ma, na pịghị ọ pa ọ sẹ́lẹ́akị sẹ́lẹ́ ma, anị ọ nana fịnị gbámásom. Ọ ḅọ́rọ́ ọkọ mịẹmịẹ, jẹ́ éné jẹ́ éné ọmịnị ọmịna minini pa ọḅụ gbibịgha.

¹¹ Mị ḅara ma, nnị kụrọ gonyẹ́ gonyẹ́ pa ọ pịrịbẹm sị ọmịnị ine wámịna Nyánáḅọ na wámịna Ḅọ́rọ́máḅọ Jizọs Krais gbámásó amadakiri ma sọ.

¹² Anịgo a sámámgba mịnanyẹ ma pa o biekórómabẹm, karakárányẹ ḅẹ́ ọmịnị ibiḅara pa anị nimim, ọ nyanaḅo maá karakárá ma ḅụ ọ pịghị sẹ kụrọm.

¹³ A pa dumafịnị sa, anị ḅụ́gbẹm ḅẹ́ a mịnanyẹ ma pa ọmịna biekóróma.

¹⁴ A nimim ḅẹ́ ḅọlọgha sa ḅụ a mị ojumẹnị ma síkórómabẹm, wámịna Nyánáḅọ Jizọs Krais dughofindi i pịrị ḅara ḅụ.

¹⁵ A ị́yẹ́ ịnyọ la ḅara mịẹbẹm si asọ dọghụ ọ ḅara warị mịnanyẹ mamgba pa biekóróma bẹ ḅara sámámgba, a fịị ḅọ́rọ́maa sa.

Tọ́rụ́ Pa Krais Ipine Árịapụ

¹⁶ Wa Krais ma kụ́rọ na ori ḅoo gbolomanyẹ dugho ọ pịrị sa, wa túminị́ gbáa wa pịrị papa lụghụ gba ọ pịrịgha. Wamịnị wámịna tọ́rụ́ pa ori opu ma arịm.

¹⁷ Wamịnị anị ngaa imim Tamuno Daḅọ kuu na ipine pa ọ pịrịarị sa. Pụghọ kóróḅo ọ pịrị sa Sóghóloḅa Ipine ma bie, ḅẹ́, <>

¹⁸ Wamịnị wa biri pa mị pụghọ ma naam anị saghị koro sa sobie, wamịnị ọ nana tọ́ntọ́ tụ́ndụ́ ma ọgọnọ imi.

¹⁹ Wámịna ḅụ, mịma dugho kụ́rọmamam ikiakoroapụ ma dughonyẹ olomsa biri, anị ibim ḅẹ́ ọ birifama anị pughu tegó anị kánákánábie kọrịarị tọndọ kịkam, kọrịarị nyẹ ákị mú énéḅama, dede ḅálōló baá ma sọ ḅo kọrị ọmịna tẹ́mẹ́bie sọ.

²⁰ Nyẹ́ mamgba nẹ́ngị nyẹ, biekóróma ḅẹ gbẹ́rẹ́ḅọ sọ ine nḅọ níminyẹ ḅụ ḅọ́rọ́ Tọ́ndiri ma bie Tamuno gbẹ́rẹ́ ikiakoro puu findibịgha.

²¹ Tegó ikiakoro okú ma anị tumḅọ ḅara saghị ḅogha, kụ́ma Tọ́ntọ́ Tẹ́mẹ́ ma anịị túminị́ dighi si n Tamuno pa n pịrị oku ma fịrịmaarị nyẹ.