Ta je Vejec 3 - Iaai Bible 1901 (New Caledonia)

¹ NÖKUK lö, ca he ka hnying anyik hnanyibu; Ke hna bi hnyekom he ka tuö hnok je hna hûna:

² Anyin ame he ka oû kâu hnahic, Me je bong ae se hia, me möt ae beû.

³ E so e ca hia gam ibetengiö me hnathu: Vekiny ju li ûnyi e hnyi nyem; Ke sihnalimen ju hnyi laulauiny hnyekom:

⁴ Me u me he bi ka wâ ibetengiö me laba wia Hnyi hnyimakan Khong me at.

⁵ Labageju thö kö Iehova ge hnyekom ae bekhot, Ke ca labageju bi ka hnâm hna wâ ûnykûme:

⁶ Ûnykûme ju kâu hnyi dem ta je gethen hia, Me e ame he ka owisa dem ta je gethen.

⁷ Ca oûnyihnathoâ ânyâm bi metâ; Ot ju ga Iehova, me kec do ge hulo:

⁸ Kʼ ame he ka hnân tang hwegien bibikâm, Me onyen bi ka je jeiâm.

⁹ Oganö Iehova thö ge je omjehem, Me wan a bân hnyi em ta hnyei hia:

¹⁰ Me me he ka ti unöngöt umâm je uma jeû, Kʼ ame he ka bahihingölö ge waina ânyâm je hna hlic vine.

¹¹ Nokuk lö, ca hûkotiâ bi je hna nö u ga Iehova; Ke u ma ca sënyin e ka fuc:

¹² Anyin a Iehova ame nâ at wale e ame betenge gan; Helâ me man kamen ame nâ nokon e ame senyin kâu.

¹³ Hnahic hnen at ame wâ metâ, Me at ame hom wâhmakhmeto.

¹⁴ Anyin ae gan hmâ hwaban e hon hwa ban sileva, Ke troban e hon gol.

¹⁵ E ûnyi hnathu e hon je penina; Ke haba ta je omjeû u je ne bewem hia e ca ûcû më.

¹⁶ E se hia ta je bong hnyi benyin a metân; Ke tang omjeû, me hna ogânâ hnyi benyin a meny.

¹⁷ Je gethen ae hmanenang deny ta je gethen, Ke hnahic deny ta je gethen hia.

¹⁸ Obiny möt e, ka tavat hia adre me kât e: Ke hnahic tavat adre me kât hmâ e.

¹⁹ Iehova ame bi taben hmeledrany hnen metâ; M otilâ drany hnen wâ ûnykûmâ

²⁰ Ame hmetruhmetru je dok ae dit ge hnen hna wâ tremângâ, Ke je ûlâ ame ota but ûnyâ hau.

²¹ Nokuk lö, e so e me ca he ta je ûnyi e ka hia hnyi hnyimâkâm; Kât hmâ ju metâ me hna ûnykûme;

²² Kʼ ame he ka hnân melen hanom, Me theibiny nyem.

²³ Me u me he ka he khötkic hnyi dem gethen, Kʼ ame ca he ka haû cam.

²⁴ Hnyi ûen u me he ka mokut u me ca he ka ot: Eke, u me he ka mokut, kʼ ame he ka hnebwia hnâm hna mokut hnying.

²⁵ Ca he bi ka outen ûnyi hnân ie outen, Me hna okongoâ anyin tavat ae kong e ka o but:

²⁶ Anyin a Iehova ânyâm hna gejon, Ke e ame he ka tuö li cam wâ e nye hnok.

²⁷ Ca behânâ so ge tavat ae ûcû he ka kap e, A ne khanö u he ka ânyâ.

²⁸ Câ ha bi ka waem, ka habe, Mē he thö, ke u hmetu thö, Ke nyi oge me he ka ham; Ke ka e bi ûnyi unyâm.

²⁹ Ca vak ûnyi ae kong ka waem, Anyin a e ame laba hnahic unyâm.

³⁰ Ca iwatretra baû me waem, E ka ba ûnyi ae kong e ame ânyâ koa.

³¹ Ca behnyokâ bi at ûokonguny, Ke ca ûca bi deny ke gethen.

³² Anyin ae ikiki Iehova ge at ae hwali hwakecin: Ke e unyin tavat ae wisa anyin ûsabâ ae iyong.

³³ E bi hnyi uma umen at ae kong hnaûhango ûnyi ga Iehova; Ke e ame ohnahicâ uma umen at ae wisa.

³⁴ E hnathu, e ame hlumā tavat ûhlumöny, Ke e ame ham betenge baû ka tavat ae ûhnyûkong.

³⁵ Kʼ ame he tavat ae metâ ka hu hmanenang; Ke haba tavat ae monu adre me he ka hom bi hmehma.