Salamo 94 - Iaai Bible 1901 (New Caledonia)

¹ IEHOVA lö, wale Khong at ame bi hwaban hulo, Khong lö, at ame bi hwaban, umumelam but.

² At ame owisa hmeledrany lö, todrö: Bi hwaban dö ka tavat adre me hnyok bi gan.

³ Iehova lö, ke ne o but kehö ame he tavat ae kong, Ke ne o but kehö ame he tavat ae kong ka ton?

⁴ Adre me fuc, adre me ha bi gan: Adre me hai ödra bi hnödra hia tavat adre me ânyâ hulo?

⁵ Iehova lö, adre me kot omomono lakem, Me ovecâ jekhom.

⁶ Adre me hlingâ safac me atkanyua, Me hlingâ ta je nakahme.

⁷ Haingödra, ka habe, Ame ca he Ja ka wâ, Kʼ ame ca he Khongu Jekob ka wâhmakhmetoâ.

⁸ Ûnykûme ju öbun tavat ae ba hnyekubun unyin tavat: Ke haba öbun tavat ae monu, ie ûen öbun e he ka meta hnyin?

⁹ Hawa ge at ame op hnyiköny, e ame ca he ka long? Haba at ame op ecmak, e ame ca he ka wâ?

¹⁰ Haba at ame osoâ ta je hnyei, e ame ca he ka bi obiny, Wale at ame nâ tavat mʼ adre me metâ?

¹¹ Iehova ame wâ ta je ûnykûmenen tavat, Ae ûnyi baû bi

¹² Ja lö, hnahic hnen at u je osoâ, Me nâ e ûnyi hnyi ânyâm hnanyibu;

¹³ Me u me he ka omenâ e ûnyi hnyi je bong ae kong, Ke ne o but hnyi hna hiny thop hobi kâu at ae kong.

¹⁴ Anyin ame ca he bi Iehova ka hna degecâ lakeiny, Kʼ ame ca be ka hna but hwajekhon.

¹⁵ Anyin ame he ka hmetu thö hna owisa ka hwakecin ae wisa Kʼ ame he tavat adre me hnyok wisa hia ka hnu hoton e.

¹⁶ Ie at ame he ka tot hobi könya ka tavat adre ânyâ hulo? Ie at ame he ka tot hobi könya ka tavat adre me ânyâ ûnyi ae kong?

¹⁷ A ne ca hadruo nya Iehova, Me logotâ laba hanuk hnyi dok adre laba hnyibû hnyin.

¹⁸ Hnyi ûen eji oge me ha, ka habe, Ame haûhaû but cak; Haba ânyâm ibetengiö, Iehova, ame kop nya goranyai,

¹⁹ Ame okahwa hnyekuk ge ta je ûnyi hnân otubwelâ unyi gam, Hnyi hnok ta je hna ûnykûme ae se hia eû hnyik.

²⁰ Hawa, ame he ka tha e möu taben lap anyin hwakecin ae kong, Waleji at ame tretrao ûkonguny me hnân hnanyibu?

²¹ Adre me tha ûkhacaköu he ka okongoâ hanon at ae wisa hwakecin, Me ohnaûbangöâ dra ae ba hnyikongon.

²² Ke Iehova thibi hnok hnabâ ae beû göranyai; Ke Khonguk thibi kicin hnok hna lubaduöng hnyin.

²³ Ke e ame hia but bi hwaban kodra bi hwakecidra aa monu, Ke e ame he ka subâ degeci ödra hnyi anyidra monu bi; Kʼ ame he Iehova a Khonguta ka ohiʼ ödra.