Salamo 89 - Iaai Bible 1901 (New Caledonia)

Salamo hnân ûnö anyi Ethana at Ezera.

¹ OGE me he bi nya ka khumöngö ibetengiö anyi Iehova nyiele balua: Oge me he ka omanenâ ânyâm hnathu ge hnyimök ka ta je dö hia.

² Anyin a oge hia but ha, ka habe, Adre me he ka op goranyai Betenge baû nyiele balua; U me he ka otethmâ ânyâm hnathu hnyi je drany.

³ Oge hia but ûhihinyköu me hnok hna ûca, Oge hia but khemanyin kö Davita athnyabaik, ka habe,

⁴ Oge me he ka otethmâ je mâtrânâm nyiele balua, Me otilâ ânyâm theron ke ne o but hnyi ta je dö hia. [Sela.

⁵ Iehova lö, ame he ta je drany ka olungâ ânyâm ta je ûnyi hnân lâiâ; Me ânyâm hnathu minya hnyi ûkhacaköu anyin wakap.

⁶ Anyin a ie ke at ethö hnyi drany ae ûcû me Iehova? Ie ke at unyin lakon tavat ae hwege ae ûcû me Iehova,

⁷ Wale Khong adre outen hnyi ûkhacaköu anyin wakap, Me hnân outen hudra hia adre me laba igigilö e?

⁸ Iehova lö, Khongon sabaoth, Ja lö, ie at ae ûcû möu, at ae man? Ke ame igigili u ânyâm hnathu.

⁹ U je muso hmanenanginy köiö: E ka o thö ta je waköiöiny, u thibi at ame otahauâ.

¹⁰ U je hia but thuthu omomonu Rahaba, helâ me at adre hia but hlingâ; U je hia but oveseâ je iwahnaihmiöny möu ge hnyamâm ae hwege.

¹¹ Ânyâm drany me hmeledrany minya; Me hon kânâ me unöngötiny, u je bi taben e.

¹² Haba hwadro me hwaiöu me u je up li dok e: Tabora me Heremona ame senyinâ iâm.

¹³ E hwege hmönyin hnyamâm: E man benyâm, ke gorany hnyamâm a metâm.

¹⁴ Haba taben ânyâm theron me wisa me hna owisa: Ame he ibetengiö me hnathu ka bân hnyi hnyimâkâm.

¹⁵ Hnahic hnen hnyei a long ut hwan senyin: Iehova lö, adre me he hnyi melaminy hnyimâkâm.

¹⁶ Adre me senyin hnyi je bong hia ge iâm: Ke adre me ogöranyi ödra hnyi hwakecin ae wisa ûnyi gam.

¹⁷ Anyin a u thibi hmanenanginy hwegiödra: Ke adre me he ka ogöranyâ anyihmun faoiny meno hnyi ânyâm ibetengiö.

¹⁸ Anyin a e unyi Iehova becihmun Ke tuhöhmun unyin At ae Kap anyi Isaraela.

¹⁹ U je ha eji ka latâm ae kap deny hna; omanenâ, Haingâm, ka habe, Oge hia but ip ûhadruo unyin at ae hwege; Oge hia but ogöranyâ hna ûca unyin tavat.

²⁰ Oge hia but ō Davita athnyabaik; Me hû e ge anyik wakaco ae kap:

²¹ Ame he bala hnyamok ka tha e mē; Kʼ ame he benyik ka ohwegiâ e.

²² Ame ca he iwahnaihmiöny ka okongoâ e; Kʼ ame ca he nokon at ae kong ka ovecâ e.

²³ Ke oge me he ka kot omomono hnyi hnyimakan ta je iwahnaihmiöny mē, Me kot tavat adre me hûkotiâ e.

²⁴ Ke ame be ka tha e me anyik hnathu me anyik ibetengiö; Kʼ adre me he ka ogöranyâ anyin faoiny meno hnyi iök.

²⁵ Oge me he ka otilâ minya hnyamen hon köiö Me hnyamen a metân hon je wagewe.

²⁶ E ame he ka hawo nya, ka habe, U thibi kamök, Me Khonguk, me kiciny melik.

²⁷ Ke oge me he ka wia e me me nokuk a bân, At ae beönua hon je than eang hmeledrany.

²⁸ Oge me he bala ka tuö anyik ibetengiö hobi kâu e, Kʼame he ka tethmâ anyik ûhihinyköu unyin.

²⁹ Ke oge me he ka otethmâ je mâtrâniny nyiele balua, Me anyin theron helâ me ta je bong hnyi drany.

³⁰ A ne he lakon ka hna degecâ anyik hnanyibu, Ke ca vheno hnok je hna owisa;

³¹ Adre me ne hanyâûâ hnok je hna otilâ, Me ca tuö anyik ta je hnanyibu;

³² Awe, oge me he bi nya ka bi hwaban hnödra ta je hna hanyâûâ ge osö, Me anyidrin ta je hulo ge ta je hna hmatä.

³³ Ke so bi, oge me ca he ka hom anyik betenge hia ûnyi gan, Me ohaûâ anyik hnathu.

³⁴ Oge me ca he ka oûnyibaûâ anyik ûhihinyköu, Ke oge me ca he ka wia hofuc ame he but ûnyi hnyi li esongodik.

³⁵ Oge hia but okhaca khemanyin hnyi hwakecik ae kap; Oge me ca he ka thoi kö Davita;

³⁶ Ame he ka tethmâ je mâtrâniny nyiele balua, Me anyin theron helâ me seûno hnyi hnyimakök.

³⁷ Ame he ka tethmâ balua e bi helâ me tehi, Me helâ me ûnyi hnân ohnathoâ ae hnathu hnyi drany. [Sela.

³⁸ Ke u je hia but hna degecâ me ounyibaûâ, Ke u je hia but hmönyin ka at u je hû.

³⁹ U je hia but hûkotiâ hna ûhihinyköu me athnyabaem; U je hia but okongoâ anyin korona hnyikânâi.

⁴⁰ U je hia but kia haginy je hak hia; U je hia but okongoâ anyin je hnabâ.

⁴¹ Adre me söh e hnen tavat hia adre me vheno gethen: Adre me hiâ e hnen tavat adre me laba hakekenyâ e.

⁴² U je hia but ogöranyâ hnyamen a metân tavat adre me ovecâ e; U je hia but osenyinâ ta je iwahmaihmiöny hia mē.

⁴³ Eke, u je öönua homakan anyin hele vat, Me ca otethmâ e hnyi vat.

⁴⁴ U je hia but ohia anyin hmanenang, Me hagutâ hnyikânâi anyin theron.

⁴⁵ U je hia but owakhaletâ je bonginy hidröu a e: U je hia but tube e ge hmehma. [Sela.

⁴⁶ Iehova lö, ke ne o but kehö, hawa u me he ka ikhölö u nyiele balua? Ke ne o but kehö ame he ânyâm hmönyin ka ubâhlâ helâ me meic?

⁴⁷ Ö u ûnykûme ju ae okhulit bonguk ta je bong: Ieû gam u je hia but op gufa lakon tavat hia thithö!

⁴⁸ Ie at ame he ka möt, kʼ ame ca he ka wâ mok bi, At ame he bi ka omelo hanon ûnyi hnyi hnyamen erkemok? [Sela.

⁴⁹ Than lö, ewa ânyâm tang betenge ehac, Waleji u je khemanyin kö Davita hnyi ânyâm hnathu?

⁵⁰ Than lö, ûnykûme ju hnödra hna hiâ lathnyabaem; Me hnok hna kap tilâ hnyi ûlaik hna ûhiö hnen ta ogo hnyei hia;

⁵¹ Iehova lö, ânyâm ta je iwahnaihmiony adre me ûhiö, Waleji hnyi hnödra hna ûhiö ta je hna okca anyin at u je hû.

⁵² E so he ka haisoi Iehova thö nyiele balua. Amen, me Amen.