Salamo 86 - Iaai Bible 1901 (New Caledonia)

Hic hiji Davita.

¹ IEHOVA lö, ta jem hnyikönyâm, me thu könya; Anyin a iny vec me theduoc.

² Tuö ju hanuk; anyin a inya ang at ot köu: Khonguk lö, ö u omelo thö athnyabaem, at ame labageju köu.

³ Than lö, betenge ju gak; Anyin oge me hongot bala köu hnyi je bong.

⁴ Osenyinâ thö hanon athnyabaem; Anyin oge me ogöranyâ hanuk köu Than.

⁵ Anyin a Than lö, u thibi at ae so, me at ame thang, Me se hia ibetengiö kodra hia adre me hongot köu.

⁶ Iehova lö, tevehlöng ju hijik hic; Me long ju hok hwakhöû.

⁷ Hnyi bonginy anyik vec, oge me he ka hongot köu; Anyin a u me he ka thu könya.

⁸ Than lö, e ba at ae ûcû möu ge ta je khong; Ke ba je huliwa ae ûcû me ânyâm ta je huliwa.

⁹ Than lö, ame he ta je hnyei hia thithö u je op ka o me khudrung ju hnyi hnyimâkâm, Me adre me be ka ogânâ iâm.

¹⁰ Anyin a u gan, me at ame ânyâ je ûnyi hnân lâiâ: U thibi Khong a khaca.

¹¹ Iehova lö, nö nya thö ge dem gethen; oge me he ka vheno ânyâm hnathu: Othabongonâ ju hnyekuk me inye ot ge iâm.

¹² Than a Khonguk lö, oge me he ka oganö u ge hnyekuk ae bekhot; Ke oge me he bala ka olungâ iâm.

¹³ Anyin ae gan hmâ ânyâm betenge könya: Ke u je hia but thang hanuk ûnyi hnyi erkemok ae dit hmonyin.

¹⁴ Khong lö, ame tot könya tavat bi gan, Ke ame elâm hanuk hnen ûkhacaköu anyin tavat ûokonguny, Kʼ adre me ca ip u hnyi hnyimaködra.

¹⁵ Than lö, u thibi Khongon ibetengiö me betenge baû, At ame ca ie hmonyin bi, ke ti hu gam ibetengiö me hnathu.

¹⁶ Ö u hwio thö könya me betenge gak: Hna but hwegiâm ka athnyabaem, Me omelo nokon baga athnyabaem a momo.

¹⁷ Omanenâ thö könya haten ae sa; Me me he ka wâ me hmehma bi hnen tavat adre me hûkötiö nya, Anyin a u Iehova at ame hadruo nya, me otubweli nya.