Salamo 83 - Iaai Bible 1901 (New Caledonia)

Khumöng wale Salamo anyi Asafa.

¹ KHONG lö, ca laba hnyibû bi: Khong lö, ca hum bi, ke ca laba hmâ bi.

² Anyin a wâ ju, a imonumonuny je iwahnaihmiöny möu: Ke haba tavat adre me hûkötiö u adre hia but ogöranyâ je bödra.

³ Adre me vak wia he ka okongoâ lakem, Me ûhanyinyâ ge tavat u je ikhâlâ.

⁴ Adre hia but ha, ka habe, Ötin e he ka ohiʼ ödra me me ca hnyei hmetu bi; Mʼ adre me ca he hmetu ka ûnykûme iö Isaraela.

⁵ Anyin adre hia but tha ûhanyinyâ hwegeâ; Ke adre me ohmâ ûhihinyköu ûö bi ûnyi möu:

⁶ Je uma mano umo Edoma, me at Isamaela; Me Moaba, me at Hagara;

⁷ Me Gebai, me Amona, me Amaleka; Me Filisiti, tha e me ta vat aten Turo:

⁸ Ke ame ûkhacaköu mödra Asuria; Kʼ adre hia but hom hadruâ laku Lota. [Sela.

⁹ Ânyâ thö kodra helâji me hna ânyâ kö Midiana; Me Sisera, me Jabin, hnyi wagewe Kisona:

¹⁰ Waleji adre ohiʼ ödra hnyi Eni-dora; Adre me wiʼ ödra me me helâ me tatet hobi kâu kânâ.

¹¹ Öûco ju ta je tuhödra me Oreba me Zeeba; Eke, öûco ju je tuhödra hia me Zeba me Zalemuna:

¹² Waleji tavat adre me ha, ka habe, E so ate me hûgûnâ Je hnyei iny Khong.

¹³ Khonguk lö, oûcû ödra me sesâ ame khenyi ge ang; Me thatûnyin hwit ame oû ang dö.

¹⁴ Me meic at ame thong hnyot, Me bâhlân meic at ame thong je bucen;

¹⁵ Helâe u me he ka hnu ödra tilʼ ödra ge ânyâm höu, Me ooti ödra ge ânyâm weneû.

¹⁶ Iehova lö, tube ju je hnyimakodra ge hmehma; Mʼ adre me he ka elâm iâm.

¹⁷ E so adre me he bala ka hmehma me ot; Eke, e so adre me he ka hmak, me hia but:

¹⁸ Me me khanʼ ödra a u thibi, wale a iâm Iehova, At ae Beönua hon hmeledrany hia thithö.