Salamo 80 - Iaai Bible 1901 (New Caledonia)

Hobi kâu at vhʼik khumöng: adre hai hnyi Sosani-Edutha. Salamo anyi Asafa.

¹ AT tue mamoe a Isaraela lö, loug ju, At ame su Josefa helâ me hnahat mamoe; At ame laba hon li kerubi, öumumelamâ but.

² Bwebwelâ thö tang hwegiâm hnyi hnyimakö Eferaima, me Beniamina, me Manase, Me o but jem he ka omeli ohmun.

³ Khong lö, ohmetu ohmun ju; Me öumumelamâ thö hnyimâkâm, mʼ ohmun e he ka möt.

⁴ Iehova lö, Khongon sabaoth, U me he ka hmonyin ke ne o but kehö ge hic hijin lakem?

⁵ U je hia but haödra ge jeûiny tenge Me habelidra gan hmâ ge deköien ecmak.

⁶ U je otilʼ ohmun hnân iwatretra ka tavat adre me laba hakekenyi ohmun: Kʼ ame hluma je iwahnaihmiöny möhmun.

⁷ Khongon sabaoth lö, ohmetu ohmun ju; Ke omelamâ thö hnyimâkâm me ohmun e he ka möt.

⁸ U je hom vine ûnyi Aigupito: U je obâ je hnyei, me ta ju e hnyin.

⁹ U je bi hnyimakan e, Me ame hwân dut me öunöngötâ hnyei.

¹⁰ Ame khavâ je bucen hnen hmenon, Ke je vheiny e, helâ me je arasi anyin Khong.

¹¹ Ame hlau ta je anginy ke ne o but hnyi köiö, Me je vheiny ke ne o but hnyi Wagewe.

¹² Ieû gam u je kia degecâ haginy je hak, Me adre me tau e hnen tavat hia adre me gethen eling?

¹³ Ame oloû usukia e hnen buakainy hnyot, Me an e hnen menoiny hnyot.

¹⁴ Khongon sabaoth lö, Ö u hmetu ju: Wâ ju ûnyi hnyi drany, me wâ me senâ vine ang,

¹⁵ Ke tuö ju hna ta hnen hnyamâm a metâm, Me anginy u je hat hobi köu bi.

¹⁶ Adre thong degecâ e ge meic, ke adre sö degecâ: A hiʼ ödra but ge hna û ödra hnen hnyimâkâm.

¹⁷ E so e bala bi hnyamâm hon aten a hnyamâm a metâm Hon lakon at waleji u je hat hobi köu bi.

¹⁸ Me ohmun e ca he ka hmetu gam: Omeli ohmun ju, mʼ ohmun e he ka hawâ iâm.

¹⁹ Iehova lö, Khongon sabaoth, ohmetu ohmun ju; Omelamâ thö hnyimâkâm, mʼ ohmun e möt ut.